មេក្រុមហ៊ុន Samsung បានប្រកាសបង្កើតនូវសម្ព័ន្ធភាពជាមួយក្រុមហ៊ុន Zeiss នៅក្នុងការផលិតនូវបន្ទះឈីបកម្រិតខ្ពស់!

នៅពេលនេះ ក្រុមហ៊ុន Samsung Electronics កំពុងតែពង្រឹងទៅលើទំនាក់ទំនងរបស់ខ្លួនជាមួយនឹងក្រុមហ៊ុន Zeiss ដែលជាក្រុមហ៊ុនផ្គត់ផ្គង់តែមួយគត់ទៅលើប្រព័ន្ធ Optical Systems សម្រាប់ក្រុមហ៊ុនម៉ាស៊ីនផលិតបន្ទះឈីប EUV ឈ្មោះ ASML នៅក្នុងគោលបំណង ដើម្បីពង្រឹងទៅលើសមត្ថភាពនៃការផលិតបន្ទះឈីបជំនាន់ថ្មីកាន់តែអស្ចារ្យ។ ថ្មីៗនេះ លោក Lee Jae-Yong ដែលជាអនុប្រធានរបស់ក្រុមហ៊ុន Samsung បានជួបជាមួយនឹងនាយកប្រតិបត្តិរបស់ក្រុមហ៊ុន Zeiss លោក Karl Lamprecht នៅក្នុងដំណើរទស្សនកិច្ចមួយទៅកាន់ទីស្នាក់ការកណ្តាលរបស់ក្រុមហ៊ុន Zeiss នៅក្នុងទីក្រុង Oberkochen នៃប្រទេសអាល្លឺម៉ង់។

នាយកប្រតិបត្តិទាំង 2 រូបនេះ បានយល់ព្រមគ្នាក្នុងពង្រីកទៅលើភាពជាដៃគូនៅក្នុងបច្ចេកវិទ្យា EUV រួមជាមួយនឹងការស្រាវ ជ្រាវ និងអភិវឌ្ឍទៅលើបន្ទះឈីបជំនាន់ថ្មីក្នុងការបង្កើនទៅលើការប្រកួតប្រជែងរបស់ខ្លួន នៅក្នុងឧស្សាហកម្មនៃការផលិតទៅលើបន្ទះឈីប និងម៉េមូរីផងដែរ។ Extreme ultraviolet (EUV) Lithography គឺពិតជាសំខាន់ខ្លាំងណាស់ក្នុងដំណើរការនៃការផលិតទៅលើបន្ទះឈីបកម្រិតខ្ពស់។ ក្រុមហ៊ុន Zeiss គឺមានប៉ាតង់ច្រើនជាង 2000 ទៅលើបច្ចេកវិទ្យា EUV នេះ។ ក្រុមហ៊ុននេះបានក្លាយជាក្រុមហ៊ុនផ្គត់ផ្គង់ផ្តាច់មុខទៅលើផលិតផល Optical ជាច្រើនសម្រាប់ក្រុមហ៊ុន ASML នេះ ហើយនេះគឺជាក្រុមហ៊ុនតែមួយគត់របស់ពិភពលោកដែលផលិតនូវម៉ាស៊ីន EUV នេះ។

ក្រុមហ៊ុន Samsung មានក្តីសង្ឃឹមថា ការបង្កើននូវទំនាក់ទំនងជាមួយនឹងក្រុមហ៊ុន Zeiss អាចធ្វើអោយដំណើរការនៃការផលិតទៅលើបន្ទះឈីបរបស់ខ្លួនកាន់តែមានភាពងាយស្រួល និងបង្កើនទៅលើទំហំនៃការផលិតផងដែរ។ គោលដៅរបស់ក្រុមហ៊ុន Samsung គឺដើម្បីដឹកនាំទៅលើបច្ចេកវិទ្យា Microfabrication 3nm ហើយក្រុមហ៊ុននេះក៏មានគម្រោងក្នុងការផលិតទ្រង់ទ្រាយធំទៅលើបន្ទះឈីប  10-nano DRAM chips ជំនាន់ទី 6 ជាមួយនឹងបច្ចេកវិទ្យា EUV technology នៅក្នុងឆ្នាំនេះ។ 

ផែនទីបង្ហាញផ្លូវរបស់ក្រុមហ៊ុន Samsung នេះ គឺរួមបញ្ចូលនូវបន្ទះឈីប 2nm នៅឆ្នាំ 2025 និងបន្ទះឈីប 1.4nm នៅត្រឹមឆ្នាំ 2027 នេះ។ ក្រុមហ៊ុននេះ ក៏ចាប់ផ្តើមផលិតទ្រង់ទ្រាយធំទៅលើបន្ទះឈីប 3nm ចាប់តាំងពីឆ្នាំមុននេះ។ ក្រុមហ៊ុន Zeiss ក៏មានទំនាក់ទំនងខ្លាំងជាមួយនឹងក្រុមហ៊ុន Samsung ផងដែរ។ ក្រុមហ៊ុននេះ បានបង្កើតនូវមជ្ឈមណ្ឌលស្រាវជ្រាវ និងអភិវឌ្ឍដំបូងបំផុតរបស់ខ្លួននៅក្នុងប្រទេសកូរ៉េខាងត្បូងនៅក្នុងឆ្នាំ 2022 ហើយក្រុមហ៊ុននេះក៏មានគម្រោងក្នុងការបង្កើតនូវមជ្ឈមណ្ឌលស្រាវជ្រាវ និងអភិវឌ្ឍដំបូងបំផុតនៅក្នុងអាស៊ីសម្រាប់ដំណើរការនៃការគ្រប់គ្រងទៅលើដំណោះស្រាយជាច្រើនរបស់ Zeiss សម្រាប់ការផលិតបន្ទះឈីបកម្រិតខ្ពស់នៅទីនេះ៕