ជឿជាក់ថា គ្រប់គ្នាប្រាកដបានដឹងហើយថា ក្រុមហ៊ុន Samsung នឹងបង្ហាញនូវស្មាតហ្វូអេក្រង់បត់ជាច្រើនដែលស្ថិតនៅក្នុងត្រកូល Fold6 series ដែលជាស្មាតហ្វូនអេក្រង់បត់បានជំនាន់ថ្មីរបស់ខ្លួន។ ថ្មីៗនេះ មានការរំពឺងថា ក្រុមហ៊ុន Samsung នឹងប្រកាសចេញនូវស្មាតហ្វូនចំនួន 2 នោះគឺ Galaxy Z Fold6, Fold6 Ultra និង Fold6 FE ជាដើម។ បើក្រឡេកទៅមើលលើលក្ខណៈសម្បត្តិជាច្រើនរបស់ស្មាតហ្វូន Galaxy Z Fold6 series នេះ គឺត្រូវបានគេទម្លាយចេញជាច្រើនរួចមកហើយនារយៈពេលចុងក្រោយនេះ។
សូមជំរាបថា មកដល់ពេលនេះ ក្រុមហ៊ុន Samsung បាននាំមុខគេទៅលើទីផ្សារស្មាតហ្វូនអេក្រង់បត់បាននៅទូទាំងពិភពលោក។ ការទទួលបាននូវភាពជោគជ័យនេះ គឺតាមរយៈការបង្ហាញនូវស្មាតហ្វូនបត់បានជាច្រើន ហើយនិងមានលក់នៅលើទីផ្សារជុំវិញពិភពលោកតែម្តង ដែលខុសពីដៃគូរនានា មិនអាចលក់បាននៅគ្រប់ទីផ្សារនៅឡើយទេ ដោយមានជាប់បំរាម ជាក់ស្តែងដូចជា Huawei ជាដើម។ បច្ចុប្បន្ននេះ ក្រុមហ៊ុន Samsung ហាក់ដូចជានៅយឺតយ៉ាវនៅក្នុងការឌីស្សាញរូបរាងថ្មីរបស់ស្មាតហ្វូនបត់បានរបស់ខ្លួន។
បើមើលទៅលើដៃគូរ ដែលជាក្រុមហ៊ុនផលិតស្មាតហ្វូនជាច្រើនរបស់ចិនវិញ គឺបានចាប់ផ្តើមធ្វើការឌីស្សាញស្មាតហ្វូនបត់បានរបស់ខ្លួន កាន់តែមានរូបរាងតូចជាងមុន។ ក្រុមហ៊ុន Samsung ហាក់ដូចជាជាប់គាំងក្នុងការឌីស្សាញទៅលើស្មាតហ្វូនថ្មីរបស់ខ្លួន ពិសេសទៅលើស្មាតហ្វូនបត់បាន។ តាមការបញ្ជាក់នៅក្នុងរបាយការណ៍មួយចេញពី ITHome ដែលដកស្រង់ចេញពីសារព័ត៌មានThe Elec របស់កូរ៉េខាងត្បូង បានអះអាងថា អ្នកប្រើប្រាស់ជាច្រើនប្រហែលជាមិនទាន់ពេញចិត្តទៅលើការឌីស្សាញស្មាតហ្វូន Galaxy Z Fold6 FE នោះទេ។
បន្ថែមពីនេះទៀតនោះ ក្រុមហ៊ុន Samsung ក៏ត្រូវបានគេរាយការណ៍ថា នឹងពន្យារពេលទៅលើការបង្ហាញនូវស្មាតហ្វូនអេក្រង់បត់តម្លៃសម្យរម្យ Galaxy Z Fold6 FE ផងដែរ។ ស្មាតហ្វូន Z Fold6 និង Z Flip6 ត្រូវបានគេរាយការណ៌ថា នឹងបង្ហាញខ្លួននៅក្នុងព្រឹត្តការណ៍ Samsung នាពេលខាងមុខនេះ ខណៈដែលស្មាតហ្វូនអេក្រង់បត់ Galaxy Z Fold6 FE នេះ អាចនឹងបង្ហាញខ្លួននៅឆ្នាំក្រោយនេះ៕
