ស្ងាត់ៗកាលពីម្សិលមិញនេះក្រុមហ៊ុន Nubia បានប្រកាសចេញនូវស្មាតហ្វូនជំនាន់ថ្មីរបស់ខ្លួនម៉ូដែលថ្មីដែលស្ថិតនៅក្នុងស្រឡាយនៃ Z50 series។ ស្មាតហ្វូននេះមានឈ្មោះថា Nubia Z50S ហើយក៏មានដាក់លក់នៅលើទីផ្សារនាថ្ងៃនេះហើយ។ ស្មាតហ្វូនថ្មីនេះ មានអេក្រង់ទំហំ 6.67-អ៊ីង ដែលមានការឌីស្សាញជាមួយនិងគែមកោង មានសមត្ថភាពអាចបង្ហាញចេញបានកម្រិត FHD+ ទំហំ 2400×1080pixels និងមានល្បឿន 144Hz refresh rate។ បន្ទះអេក្រង់នេះ គឺមានការបង្ហាញចេញជាមួយពន្លឺបាន 1000nits ថែមទៀតផង។
Nubia Z50S ត្រូវបានក្រុមហ៊ុនដាក់អោយដំណើរការនៅលើបន្ទះឈីប Qualcomm Snapdragon 8 Gen 2 មានរ៉េមទំហំ 12GB LPDDR5X RAM និងមានជម្រើសអង្គចងចាំទំហំ 256GB ឬ 512GB ប្រភេទ UFS 4.0។ សម្រាប់ការថតរូបវិញ នៅលើស្មាតហ្វូននេះ មានកាមេរ៉ាទំហំ 64MP ដែលគាំទ្រនូវឡែនកម្រិត 35mm និងប្រើប្រាស់សិនស័រ Sony IMX787។ សម្រាប់គ្រាប់ទីពីរ គឺមានទំហំ 50MP គាំទ្រនូវមុខងារ AF ultra-wide-angle និង macro ស្ថិតនៅក្នុងឡែនតែមួយ។ ស្មាតហ្វូននេះកាមេរ៉ាមុខទំហំ 16MP។
នៅលើស្មាតហ្វូននេះមានការដាក់អោយប្រើប្រាស់នូវបច្ចេកវិទ្យា 5G, WiFi 6E, NFC និង Bluetooth 5.3។ និយាយពីថាមពលថ្មវិញ ស្មាតហ្វូននេះមានថ្មទំហំ 5000mAh និងមានការគាំទ្រនូវកម្លាំងសាក 80-watt wired fast charging ដែលអាចសាកថ្មពី 0% ទៅ 100% ប្រើពេលតែ 30 នាទីប៉ុណ្ណោះ។ សម្រាប់ការលក់នៅលើចិនថ្ងៃនេះ Nubia Z50S មានតម្លៃ 2,199 Yuan (~$306) សម្រាប់ 12GB+256GB។ ស្មាតហ្វូននេះមានពណ៌ខ្មៅប៉ុណ្ណោះ។
