ក្រុមហ៊ុន Samsung ត្រូវបានគេមើលឃើញថា បាននឹងកំពុងតែបោះជំហ៊ានកាន់តែកៀកហើយទៅលើការប្រារព្ធកម្មវិធីសម្ពោធស្មាតហ្វូនថ្នាក់ប្រណិតរបស់ខ្លួននាព្រឹត្តិការណ៌ Galaxy Unpacked 2024 ដែលនឹងរៀបចំឡើងនៅខែមករាឆ្នាំក្រោយនេះ។ យោងតាមរបាយការណ៌ជាច្រើនដែលចេញផ្សាយកន្លងមកបានអោយដឹងថា ក្រុមហ៊ុនកូរ៉េខាងត្បូងមួយនេះ នឹងមានការបង្ហាញចេញនូវស្មាតហ្វូនចំនួន 3 ម៉ូដែលរួមមានដូចជា Galaxy S24, Galaxy S24+ និង Galaxy S24 Ultra។
ជាមួយនិងរយៈពេលជាង 2 ខែទំរាំដល់ពេលវេលានៃការសម្ពោធស្មាតហ្វូននេះចូលមកដល់នោះ នៅពេលនេះ ក្រុមហ៊ុន Samsung បានចាប់ផ្តើមចែកចាយនូវព័ត៌មានមួយចំនួនរបស់ស្មាតហ្វូនជំនាន់ថ្មីនេះហើយ។ កាលពីខែកញ្ញាកន្លងទៅនេះ ស្មាតហ្វូនជំនាន់ថ្មី Galaxy 24 Series គឺបានឆ្លងកាត់ការចុះបញ្ជីនៅលើស្ថាប័ន 3C certification រួចរាល់ហើយ។ នៅពេលនេះមានការទម្លាយជាថ្មីទៀតថា Galaxy S24 Ultra ក៏ត្រូវបានគេឃើញថា បានឆ្លងកាត់ការចុះបញ្ជី Bureau Of Indian Standards (BIS) សម្រាប់ទីផ្សារប្រទេសឥណ្ឌាផងដែរ។
នៅលើបញ្ជីនេះបានបង្ហាញថា Galaxy S24 Ultra គឺមានការប្រើប្រាស់នូវលេខម៉ូដែល SM-S928B។ ខណៈដែឡម៉ូដែលនេះ នឹងត្រូវដាក់លក់នៅលើទីផ្សារជាច្រើន ស្មាតហ្វូននេះ គឺមានការទទួលស្គាល់ពីស្ថាប័ន BIS របស់ប្រទេសឥណ្ឌាហើយ។ ជាមួយនិងការបញ្ជាក់ខាងលើនេះយើងអាចបញ្ជាក់ច្បាស់ថា Samsung នឹងមានការប្រកាសចេញ Galaxy S24 Ultra នៅលើទីផ្សារឥណ្ឌា។ សូមជំរាបថា Galaxy S24 Ultra ត្រូវបានគេរាយការណ៌ថា នឹងមានអេក្រង់ AMOLED display ដែលមានកម្រិតពន្លឺ 2,500nits brightness និងប្រើប្រាស់នូវបន្ទះឈីន Qualcomm Snapdragon 8 Gen 3 SoC រ៉េមទំហំ 16GB RAM អង្គចងចាំទំហំ 1TB។ ស្មាតហ្វូននេះមានកាមេរ៉ា 4 គ្រាប់ ដែលកាមេរ៉ាគោលមានទំហំ 200MP និងមានឡែន 5x telephoto camera ហើយនិងមានថ្មទំហំ 5,000mAh គាំទ្រនូវកម្លាំងសាក 45W charging speed។
