ការលក់ស្មាតហ្វូនមានធ្លាក់ចុះកាលពីប៉ុន្មានឆ្នាំមុន ដែលជាហេតុធ្វើឲ្យការលក់សមាភាគកាមេរ៉ា CMOS Image Sensor (CIS) មានការធ្លាក់ចុះដូចគ្នា។ ទោះជាយ៉ាងក៏ដោយទីផ្សារលក់ស្មាតហ្វូនក្នុងរយះពេលពីរឆ្នាំចុងក្រោយនេះ ហាក់មានការងើបឡើងវិញ ដែលធ្វើឲ្យការទីផ្សារលក់គ្រឿងបន្លាស់កាមេរ៉ាមានការងើបឡើងវិញផងដែរ។ ក្រុមហ៊ុន Samsung Electronics ដែលជាក្រុមហ៊ុនធំមួយដែលផ្គត់ផ្គង់ទីផ្សារគ្រឿងបន្លាស់ CIS សម្រាប់ទីផ្សារស្មាតហ្វូន បានមើលឃើញពីតម្រូវការខ្ពស់នេះ ក្រុមហ៊ុនក៏ត្រៀមដំឡើងថ្លៃសមាសភាគ CIS ផងដែរចាប់ពីឆ្នាំក្រោយនេះ។
យោងតាមប្រព័ន្ធផ្សព្វផ្សាយរបស់ប្រទេសចិនឈ្មោះថា Money បានចុះផ្សាយថា Samsung បានចេញសេចក្តីជូនដំណឹងអំពីការដំឡើងតម្លៃសមាសភាគកាមេរ៉ា CIS សម្រាប់អតិថិជនរបស់ខ្លួននៅក្នុងប្រទេសចិន។ ក្រុមហ៊ុនចែកចាយរបស់ប្រទេសចិនដែលរួមមានទាំង Qingya និង Supreme ត្រូវបានគេដឹងថា នឹងទទួលបានអត្ថប្រយោជន៍ពីការផ្លាស់ប្តូរនេះ។ យោងតាមរបាយការណ៍ បានបញ្ជាក់ថា តម្លៃជាមធ្យមនៃសមាសធាតុ CMOS Image Sensor (CIS) នៅក្នុងត្រីមាសទី 1 ឆ្នាំ 2024 នឹងកើនឡើង 25%។ ហើយសម្រាប់ CMOS មួយចំនួននឹងត្រូវចំណាយបន្ថែមច្រើនរហូតដល់ 30%។
យោងតាមប្រព័ន្ធផ្សព្វផ្សាយរបស់ចិនដដែលខាងលើនេះ បានបញ្ជាក់ថា ការកើនឡើងនៃការលក់ស្មាតហ្វូននេះបានធ្វើឱ្យតម្រូវការផ្នែកសមាសភាគ CIS មានភាពល្អប្រសើរឡើង ដែលជំរុញឱ្យ Samsung បង្កើនតម្លៃសម្រាប់ឆ្នាំ 2024។ ទោះជាយ៉ាងណាក៏ដោយ នៅក្នុងរបាយការណ៍ថ្មីៗនេះ បានបង្ហាញថាតម្លៃសមាសភាគ CMOS Imager Sensor មានការកើនឡើងភាគច្រើនអាចនឹងប៉ះពាល់ដល់គ្រឿងដែលមានកម្រិតភាពច្បាស់ 32MP និងខ្ពស់ជាងនេះ ហើយការបង្កើនតម្លៃនេះក៏អាចនឹងធ្វើតម្លៃសម្រាប់ទូរស័ព្ទ Galaxy របស់ Samsung ដែលបំពាក់សែនស័នកាមេរ៉ា 32MP ឬខ្ពស់ជាងនេះ អាចនឹងកើនតម្លៃផងដែរ៕
