កាលពីម្សិលមិញនេះ Redmi ដែលបុត្រសម្ព័ន្ធរបស់ Xiaomi បានប្រារព្ធព្រឹត្តិការណ៍ប្រកាសចេញស្មាតហ្វូនជំនាន់ថ្មីគ្រួសារ Redmi K70 ដែលមានសមាជិកដូចជា Redmi K70, K70e និង K70 Pro ជាដើម។ ហើយសម្រាប់ម៉ូដែល K70 Pro ក៏ទទួលបានការបំពាក់ស្លាកឈ្មោះថ្មីពិសេសមួយបន្ថែមទៀត គឺ Redmi K70 Pro Automobili Lamborghini Squadra Corse។
ដើម្បីជាកិច្ចគម្រប់ខួប 10 ឆ្នាំ ក្នុងការបង្ហាញខ្លួនជាក្រុមហ៊ុនស្មាតហ្វូននៅលើពិភពលោក ក្រុមហ៊ុន Redmi បានសហការជាមួយក្រុមហ៊ុនផលិតរថយន្តប្រណាំង Lamborghini ក្នុងការផលិតចេញស្មាតហ្វូនជំនាន់ថ្មីម៉ូដែលពិសេស គឺ Redmi K70 Pro Automobili Lamborghini Squadra Corse នេះឡើង។ លក្ខណៈពិសេសរបស់ស្មាតហ្វូនម៉ូដែលពិសេសនេះ គឺការឌីស្សាញឡើងថ្មីខុសពីម៉ូដែល K70 Pro ធម្មតា ដោយសារផ្ទៃខ្នងខាងក្រោយរបស់ Limited Edition ត្រូវបានរចនាឡើងយកលំនាំតាមម៉ូដែលរថយន្តប្រណាំងរបស់ Lamborghini ដែលធ្វើឲ្យមានភាពប្រណិត និងមានភាពទាក់ទាញខ្លាំងជាងម៉ូដែលធម្មតា ប៉ុន្តែ ផ្ទៃខ្នងខាងក្រោយរបស់ម៉ូដែលពិសេសនេះនៅតែប្រើសារធាតុ Plastic ដូចគ្នា។
Redmi K70 Pro Automobili Lamborghini Squadra Corse មានជម្រើសពីរពណ៌ គឺពណ៌បៃតងស្រស់ និងពណ៌លឿង ហើយនៅលើផ្ទៃខ្នងខាងក្រោយក៏មានរំលេចនូវឡូហ្គោក្រុមហ៊ុន Lamborghini ដែលធ្វើពីកាបោនហ្វៃប៊ឺដ៏ស្រស់ស្អាតផងដែរ។ សម្រាប់ផ្នែក Software វិញ Redmi បានធ្វើការផលិតឡើងយ៉ាងពិសេសសម្រាប់ម៉ូដែលពិសេសនេះ ដោយមានដំឡើងមកជាមួយស្រាប់នូវ Lamborghini Squadra Corse theme នៅលើ HyperOS ដើម្បីឲ្យមានភាពស៊ីមេទ្រីគ្នាជាមួយនឹងម៉ូដែលទូរស័ព្ទ។ សម្រាប់រូបភាព Background ដែលប្រើសម្រាប់ Redmi K70 Pro ម៉ូដែលពិសេសនេះ គឺជាម៉ាករថយន្តប្រណាំងដែលជា Hypercar ម៉ាស៊ីន V12 ម៉ូដែល Lamborghini Essenza SCV12។
ទោះជាយ៉ាងណាក្រៅតែពីមានការឌីស្សាញរូបរាងបែបថ្មីប្រណិតជាងម៉ូដែល K70 Pro ស្តង់ដារ ក៏ពិតមែន ប៉ុន្តែ ទៅលើគុណសម្បត្តិទូទៅហាក់មិនមានអ្វីខុសគ្នានោះទេ ដោយ Redmi K70 Pro Automobili Lamborghini Squadra Corse Edition នេះ បានបំពាក់កំពូលឈីប Snapdragon 8 Gen 3 របស់ Qualcomm ភ្ជាប់ជាមួយរ៉េមប្រភេទ LPDDR5X ទំហំ 24GB , ម៉េមូរីល្បឿនលឿន UFS4.0 ទំហំ 1TB, ថាមពលថ្មកំលាំង 5,000mAh និងគាំទ្រកំលាំងសាកភ្លើងល្បឿន 120W Wired Fast Charge។ សម្រាប់តម្លៃរបស់ស្មាតហ្វូនម៉ូដែលពិសេសនេះ ក្រុមហ៊ុនមិនទាន់បានបញ្ជាក់ឲ្យដឹងនៅឡើយទេ ហើយម៉ូដែល K70 Pro Limited Edition នេះ ទំនងជានឹងមានលក់តែសម្រាប់ទីផ្សារប្រទេសចិនតែប៉ុណ្ណោះ៕
