ចំពោះវត្តមានរបស់ស្មាតហ្វូនអេក្រង់បត់ Galaxy Z Fold 5 និង Z Flip 5 ដែលចេញឆ្នាំនេះ គឺមិនមានការកែប្រែអ្វីច្រើនធៀបនឹងជំនាន់មុននោះទេ ទាំងការរចនារូបរាង និងបន្ទះអេក្រង់ ដោយ Samsung គ្រាន់តែបានប្តូរការប្រើប្រាស់គន្លឹះត្រចៀកបត់ថ្មីដែលធ្វើឲ្យការបត់ចូលគ្នាបានជិតល្អជាងមុនមិនបន្សស់ចន្លោះប្រហោងតែប៉ុណ្ណោះ។
ទោះជាយ៉ាងណាបើតាមរបាយការណ៍ថ្មីនេះ បានបង្ហើបថា Samsung អាចនឹងធ្វើការផ្លាស់ទំហំអេក្រង់សម្រាស់ស្មាតហ្វូនអេក្រង់ជំនាន់បន្ទាប់របស់ខ្លួនដែលចេញនៅត្រីមាសទីពីរឆ្នាំក្រោយនេះ គឺ Galaxy Z Fold 6 និង Z Flip 6។ យោងទៅលើអ្នកជំនាញខាងឧស្សាហកម្មអេក្រង់លោក Ross Young មកពីក្រុមហ៊ុន Display Supply Chain Consultant បានបង្ហើបឲ្យដឹងថា Samsung នឹងធ្វើការបង្កើនទំហំអេក្រង់ខាងក្រៅ (Cover-Display) របស់ Galaxy Z Flip 6 ដល់ទំហំ 3.9-inch ដែលធំជាង Cover-Display របស់ Galaxy Z Flip 5 បច្ចុប្បន្នប្រមាណ 0.5-inch និងធំប៉ុននឹងអេក្រង់របស់ iPhone 5s។ Z Flip 6 ក៏នឹងមានបំពាក់សែនស័រកាមេរ៉ាទំហំ 50MP ផងដែរ។
ជាងនេះទៅទៀតនៅក្នុងរបាយការណ៍ក៏បានបញ្ជាក់ថា Samsung នឹងបង្កើនកម្រិតវិមាត្រអេក្រង់ (Aspect ratio) របស់អេក្រង់ Galaxy Z Fold 6 ផងដែរ។ ដោយសារបច្ចុប្បន្នបន្ទះអេក្រង់ខាងក្រៅរបស់ Galaxy Z Fold 5 គឺមានវិមាត្រចង្អៀតបន្តិច ដែលធ្វើឲ្យការប្រើប្រាស់ប្រចាំថ្ងៃហាក់មិនបានពេញលេញ ដូចនឹងស្មាតហ្វូនអេក្រង់ដែលចេញពីក្រុមហ៊ុនប្រកូតប្រជែងមួយចំនួនដែលមានទំហំ និងវិមាត្រអេក្រង់ដូចនឹងស្មាតហ្វូនធម្មតាមួយទៅហើយ។ ហើយសម្រាប់អេក្រង់បត់ខាងក្នុងរបស់ Galaxy Z Fold 5 ក៏ហាក់មានកម្ពស់រាងខ្ពស់បន្តិចផងដែរ ដូចនេះ Samsung ត្រូវបានគេដឹងថា នឹងធ្វើការគិតគួរក្នុងការផ្លាស់ប្តូរខ្នាតអេក្រង់ខាងក្នុងផងដែរ។
យ៉ាងណាមិញក្រៅតែពីដំណឹងពីការផ្លាស់ប្តូរវិមាត្រអេក្រង់ទៅ ស្មាតហ្វូនអេក្រង់បត់ជំនាន់ថ្មី Galaxy Z Fold 6 និង Z Flip 6 ត្រូវបានគេដឹងថា នឹងបង្កើនសមត្ថភាពប្រព័ន្ធកាមេរ៉ាកាន់តែប្រសើរ, បង្កើនសមត្ថភាពថាមពលថ្ម ក៏ដូចជាប្រព័ន្ធបច្ចេកវិទ្យាភ្ជាប់ជាមួយផ្កាយរណប Satellite Connection ផងដែរ៕
