មកដល់ពេលនេះ ក្រុមហ៊ុន Samsung បានចាប់ផ្តើមធ្វើការនៅលើស្មាតហ្វូនអេក្រង់បត់បានជំនាន់ថ្មីរបស់ខ្លួនហើយ។ ផ្អែកលើការបង្ហោះនៅលើបណ្តាញ X របស់អ្នកទម្លាយ PandaFlashPro បានអោយដឹងថា នៅពេលនេះ សង្វាក់ផលិតកម្មរបស់ស្មាតហ្វូនអេក្រង់បត់បាន Galaxy Z Flip 7 និង Galaxy Z Fold 7 បានចាប់ផ្តើមហើយ ដោយក្នុងនោះក៏មានការផលិតទៅលើ Accessories ជាច្រើនថែមទៀតផង។
ប្រភពខាងលើនេះ បានបន្តថា ជាមួយនិងការចាប់ផ្តើមរបស់ក្រុមហ៊ុន Samsung នៅខែឧសភានេះ មានការរំពឹងថា ស្មាតហ្វូនអេក្រង់បត់បាន Galaxy Z Flip 7 និង Galaxy Z Fold 7 នេះ នឹងមានការសម្ពោធជាផ្លូវការណ៌នៅថ្ងៃខែកក្កដាខាងមុខនេះហើយ។ បន្ថែមពីនេះ ថ្មីៗនេះ Samsung ក៏បានបញ្ជាក់ពីការផលិតអេក្រង់បត់បានប្រភេទ OLED សម្រាប់ស្មាតហ្វូនអេក្រង់បត់បានថ្មីទាំងពីរនេះផងដែរ។ ប៉ុន្តែអ្វីដែលគេមើលឃើញថា ប្លែកពីជំនាន់មុននោះគឺ ក្រុមហ៊ុន Samsung បាននិយាយថា ចំនួននៃការផលិតទៅលើស្មាតហ្វូនអេក្រង់បត់បានទាំងពីរនេះ គឺមានចំនួនតិចជាងមុន ដោយសារតម្រូវការមានការថយចុះ។
បើតាមតួរលេខរបស់ក្រុមហ៊ុន Samsung បានបង្ហាញថា ស្មាតហ្វូនអេក្រង់បត់បាន Galaxy Z Flip 7 គឺនឹងមានផលិតចំនួន 3 លានគ្រឿង ខណៈដែលស្មាតហ្វូនអេក្រង់បត់បាន Fold 7 នឹងមានចំនួនត្រឹមតែ 2 លានគ្រឿង។សរុបចំនួនសរុបរបស់ស្មាតហ្វូនទាំងពីរនេះ គឺមានការធ្លាក់ចុះ 40% ប្រៀបធៀបជាមួយនិងជំនាន់មុន។
Galaxy Z Flip 7 ត្រូវបានគេរំពឹងថា នឹងមានអេក្រង់ខាងក្រៅមានទំហំធំជាងជំនាន់មុន ហើយសម្រាប់ម៉ូដែលថ្មីនេះ ក្រុមហ៊ុន Samsung អាចនឹងមានការប្រើប្រាស់នូវបន្ទះឈីប Exynos 2500 កម្រិត 3nm ជាលើកដំបូងផងដែរ។ ក្រឡេកមកមើល Galaxy Fold 7 ត្រូវបានគេបញ្ជាក់ថា នឹងមានការប្រើប្រាស់នូវបន្ទះឈីប Snapdragon 8 Elite for Galaxy ដូចគ្នាជាមួយនិងបន្ទះឈីបដែលប្រើប្រាស់នៅលើស្មាតហ្វូន Galaxy S25 series អញ្ចឹង។
សូមជំរាបថា ក្រុមហ៊ុន Samsung ក៏នឹងមានការប្រកាសចេញជាផ្លូវការណ៌នូវស្មាតហ្វូនកម្រ៉ាស់ស្តើងម៉ូដែល Galaxy S25 Edge នៅសប្តាហ៌ក្រោយនេះផងដែរ។ ស្មាតហ្វូនមានការដាក់អោយ Pre-orders នៅលើប្រទេសអង់គ្លេសហើយ។ សម្រាប់ទីផ្សារកូរ៉េខាងត្បូង និងធ្វើមានលក់នៅថ្ងៃទី 13 ឧសភា និងប្រទេសចិននៅទី 23 ខែឧសភា ខណៈដែលទីផ្សារផ្សេងៗអាចនឹងធ្វើឡើងនៅថ្ងៃទី 30 ឧសភា។
