ថ្មីៗនេះក្រុមហ៊ុន Toyota ជប៉ុន បានដាក់បង្ហាញចេញគំរូរថយន្តអគ្គិសនីស៊េរីថ្មីម៉ូដែល bZ5 FieldGo ដែលមានការឌីស្សាញប្រហាក់ប្រហែលគ្នានឹងម៉ូដែល bZ5 ដែរ គ្រាន់តែគំរូរថយន្តម៉ូដែលថ្មីនេះ មានបំពាក់បន្ថែមនៅឧបករណ៍ប្រើប្រាស់ជាច្រើន ដែលផ្តោតទៅលើការធ្វើដំណើរបែប off-road ផ្សងព្រេង និងបោះតង់តែម្តង។
សម្រាប់រថយន្តអគ្គិសនី Toyota bZ5 គឺជាសមិត្ថផលដែលបង្កើតឡើងដោយការរួមសហការគ្នារវាងក្រុមហ៊ុន Toyota និងក្រុមហ៊ុនផលិតរថយន្តរដ្ឋចិន FAW ហើយនឹងបានប្រើប្រាស់ប្រព័ន្ធម៉ូទ័រអគ្គិសនីផលិតដោយក្រុមហ៊ុនយក្ស BYD។ រថយន្តអគ្គិសនីប្រភេទ Couple-crossover ថ្មីនេះ បំពាក់កញ្ចប់អាគុយប្រភេទ Blade LFP battery របស់ក្រុមហ៊ុន BYD ដែលគាំទ្រនូវបច្ចេកវិទ្យាសាកភ្លើងល្បឿនលឿនដែលសាកបញ្ចូលថាមពលពី 30% ទៅ 80% ចាយពេលខ្ទង់ 27 នាទី ហើយការសាកភ្លើងពេញម្តងអាចជិះបានចម្ងាយផ្លូវ 400 ម៉ាយល៍ ឬប្រហែល 644km។
ងាកមកគំរូរថយន្ត bZ5 FieldGo នេះ វិញត្រូវបានឌីស្សាញឡើងជាមួយភាពទាក់ទាញ ដោយនៅលើដំបូលមានភ្ជាប់ជាមួយគ្រែសម្រាប់ដាក់អីវ៉ាន់ ហើយនឹងមានមកជាមួយឧបករណ៍បោះតង់ រីឯកៅអីខាងក្រោយអាចបត់រាបស្មើសម្រាប់ធ្វើជាគ្រែគេងបានថែមទៀតផង។ យ៉ាងណាមិញ គេមិនទាន់ច្បាស់ទេថា តើគំរូរថយន្ត Toyota bZ5 FieldGo នឹងក្លាយជាផលិតផលសម្រាប់ផលិតកម្មពិតឬអត់ទេ។
ក្រៅតែពីការដាក់តាំងបង្ហាញគំរូរថយន្តអគ្គិសនី bZ5 FieldGo ទៅក្រុមហ៊ុន Toyota ក៏បានធ្វើការដាក់តាំងបង្ហាញនៅរថយន្តអគ្គិសនីស៊េរីថ្មីក្នុងត្រកូល bZ Series របស់ខ្លួនផងដែរនៅក្នុងព្រឹត្តិការណ៍ Shanghai International Auto Show 2025 ថ្មីៗនេះ ក្នុងនោះរួមមានម៉ូដែល Toyota ជាច្រើនទៀត រួមមាន bZ3, bZ3X, robotaxi bZ4X, bZ5, និង bZ7 ជាដើម៕
