ស្មាតហ្វូនបត់បានស៊េរីថ្មីរបស់ Samsung នឹងបង្ហាញខ្លួននៅប្រទេសចិនឆាប់ៗនេះហើយ

ស្មាតហ្វូនបត់បានប្រណិតជំនាន់ថ្មីរបស់ក្រុមហ៊ុន Samsung ដែលលក់ផ្តាច់មុខតែនៅក្នុងប្រទេសចិននោះ ត្រូវបានគេទម្លាយថា នឹងមានការបង្ហាញខ្លួនឆាប់ៗនេះហើយ។ ថ្មីៗនេះ ស្មាតហ្វូនអេក្រង់បត់ថ្មីនេះ ត្រូវប្រទះឃើញនៅលើវេទិកាវិញ្ញាបនបត្រដ៏ធំមួយរបស់ចិន។ 

វត្តមានរបស់ស្មាតហ្វូនបត់បាននេះ គឺនៅក្រោយក្រុមហ៊ុន Samsung បានបង្ហាញស្មាតហ្វូន Galaxy Z Fold 7, Galaxy Z Flip 7 និង  Galaxy Z Flip 7 FE នៅលើទីផ្សារសកលកាលពីពេលថ្មីៗនេះ។ គួររំលឹកផងដែរថា នៅក្នុងទីផ្សាររបស់ចិន ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះ តែងតែបង្ហាញចេញស្មាតហ្វូនបត់បាននេះ នៅក្នុងឈ្មោះផ្សេង រួមជាមួយនឹងការឌីស្សាញរូបរាងថ្មី។

ស្មាតហ្វូនបត់បានស៊េរីថ្មីនេះ គឺជាផ្នែកមួយនៃស្មាតហ្វូន W series ហើយអាចនឹងក្លាយជា rebrand របស់ស្មាតហ្វូន Galaxy Z Fold និង Galaxy Z Flip។ ប៉ុន្តែមុនការប្រកាសជាផ្លូវការណ៌នេះ ស្មាតហ្វូនថ្មីដែលមានឈ្មោះថា Samsung W26 នេះ ក៏ទើបតែបង្ហាញខ្លួននៅលើវិញ្ញាបនបត្រ 3C ជាមួយនឹងលេខកូដ SM-W9026។ បើមើលទៅលើវិញ្ញាបនបត្រនេះ ស្មាតហ្វូន  Samsung W26 នេះ នឹងមានបច្ចេកវិទ្យាសាកថ្មលឿន 25W wired fast charging។

តាមរយៈនៃការទម្លាយខាងលើនេះ បានបង្ហាញថា សម្រាប់ម៉ូដែលនេះ គឺជា version របស់ចិននៃស្មាតហ្វូន Galaxy Z Fold 7 ខណៈពេលដែលស្មាតហ្វូន Z Flip 7 នេះ នឹងមានឈ្មោះហៅថា W26 Flip នៅក្នុងប្រទេសចិន។ ស្រដៀងគ្នាទៅនឹងស្មាតហ្វូនជំនាន់មុននេះផងដែរ ក្រុមហ៊ុន Samsung នឹងបញ្ចេញនូវស្មាតហ្វូន W26 នៅក្នុងទម្រង់នៃការឌីស្សាញដ៏ប្រណិតបំផុត។ ស្មាតហ្វូន Samsung S25 ជំនាន់មុននេះ ក៏មានផ្នែកខាងក្រោយសេរ៉ាមិច និងគែមពណ៌មាសផងដែរ៕