អេក្រង់របស់ Xiaomi 16 Pro ត្រូវគេទម្លាយថា មានភាពខុសបែ្លកពីអេក្រង់ Xiaomi 15 Pro

កាលពីសប្តាហ៌មុននេះ អ្នកទម្លាយ Digital Chat Station ធ្លាប់បានបង្ហើបម្តងរួចមកហើយថា ការបង្ហាញវត្តមានរបស់កំពូលស្មាតហ្វូនស៊េរីថ្មី Xiaomi 16 Series នៅឆ្នាំនេះ នឹងមាន 3 ម៉ូដែល រួមមានដូចជា Xiaomi 16, Xiaomi 16 Pro និង Xiaomi 16 Pro Mini (ឈ្មោះមិនទាន់ច្បាស់) ហើយស្មាតហ្វូនទាំង 3 ម៉ូដែលនេះ ត្រូវបានគេរំពឹងថា នឹងមានការប្រកាសចេញជាផ្លូវការណ៌នៅប្រទេសចិននាចុងខែកញ្ញាខាងមុខនេះហើយ។ 

នៅថ្ងៃនេះ មានការទម្លាយជាថ្មីពី Smart Pikachu វិញម្តង។ អ្នកទម្លាយរូបនេះបានបង្ហើបថា ស្មាតហ្វូនម៉ូដែលថ្មី Xiaomi 16 Pro នឹងមានការផ្លាស់ប្តូរទៅលើផ្នែកមួយចំនួន។ តាមការបែកធ្លាយខាងលើនេះ បង្ហាញថា Xiaomi 16 Pro គឺនឹងមានអេក្រង់រាបស្មើរមានទំហំ 6.8-អ៊ីងគាំទ្រដោយបច្ចេកវិទ្យា OLED LTPO panel ហើយនឹងមានសមត្ថភាពអាចបង្ហាញចេញបាន 2K resolution។ បន្ទះអេក្រង់ស្មាតហ្វូននេះ ក៏នឹងមានការឌីស្សាញគែម ultra-narrow bezels នៅគ្រប់ជ្រុងថែមទៀតផង។ 

ជាពិសេសអេក្រង់នេះ ក៏មានការបំពាក់នូវបច្ចេកវិទ្យាការពារភ្នែកជំនាន់ថ្មី ដែលអាចជួយអោយពន្លឺអេក្រង់ភ្លឺ និងមានភាពស្រទន់ក្នុងពេលតែមួយទៀតផង។ ប្រៀបធៀបជាមួយនិង Xiaomi 15 Pro ដែលបង្ហាញខ្លួនកាលពីឆ្នាំមុនគឺមានទំហំតូចជាងបន្តិច គឺត្រឹមតែ 6.73-អ៊ីង OLED panel និងមានគែម micro-quad-curved design។

ការបែកធ្លាយខាងលើនេះ ក៏មានការបញ្ជាក់ពីកាមេរ៉ា 3 គ្រាប់នៅខាងក្រោយផងដែរ។ ប៉ុន្តែមិនមានការបញ្ជាក់ពីទំហំសិនស័រនិមួយៗនៅឡើយទេ។ ផ្អែកតាមរបាយការណ៌កន្លងមក ធ្លាប់និយាយថា ស្មាតហ្វូននេះ នឹងមានកាមេរ៉ាគោល SmartSens 590 ទំហំ 50MP និងគ្រាប់ទីពីរទំហំ 50MP ultra-wide lens ខណៈដែលទីបីមានទំហំ 50MP Periscope telephoto ដែលមានភ្ជាប់ជាមួយ macro photography ទៀតផង។ សម្រាប់កាមេរ៉ាមុខ គឺមានទំហំ 50MP មានមុខងារ Autofocus ។ 

ស្មាតហ្វូននេះ ត្រូវបានគេរំពឹងថា នឹងមានការប្រើប្រាស់នូវបន្ទះឈីប Snapdragon 8 Elite 2 មានថ្មទំហំដល់ទៅ 7,500mAh គាំទ្រដោយកម្លាំងសាក 100W charging។ មុននេះធ្លាប់មានព័ត៌មានថា Xiaomi 16 Series ក៏នឹងមានម៉ូដែល Pro Max ផងដែរ ប៉ុន្តែមិនច្បាស់ថា ម៉ូដែលនេះ នឹងមានភាពខុសគ្នាពី Xiaomi 16 Pro។ សូមជំរាបថា Xiaomi 16 series ក៏នឹងមានម៉ូដែល Xiaomi 16 Ultra ដូចគ្នា តែអាចនឹងបង្ហាញខ្លួននៅត្រីមាសទី 1 ឆ្នាំ 2026។