គិតមកដល់ថ្ងៃនេះ ស្មាតហ្វូនលំដាប់ Flagship ជំនាន់ថ្មីរបស់ក្រុមហ៊ុន Samsung បាននឹងកំពុងតែខិតជិតមកដល់ហើយ។ ស្របពេលដែលការប្រកាសជាផ្លូវការណ៌ទៅលើស្មាតហ្វូនស៊េរីថ្មី Galaxy S26, Galaxy S26+ និង Galaxy S26 Ultra ក៏នឹងមានការបង្ហាញខ្លួននៅក្នុងទីផ្សារនៃប្រទេសឥណ្ឌាផងដែរនោះ នៅថ្ងៃនេះ ការកម្ម៉ង់ទិញមុន និងព័ត៌មាននៃការលក់ដំបូងរបស់ស្មាតហ្វូនថ្មីៗទាំងនេះ ត្រូវបានទម្លាយចេញហើយ។
ផ្អែកតាមការបែកធ្លាយចុងក្រោយបំផុតដែលចេញពីអ្នកទម្លាយ Ice Universe ដែលបានចែករំលែកព័ត៌មានលម្អិតនៅលើបណ្តាញសង្គម X បានអះអាងថា ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះ នឹងប្រកាសចេញនូវស្មាតហ្វូនជំនាន់ថ្មី Galaxy S26 Series សម្រាប់ទីផ្សារសកល និងនៅលើទីផ្សារនៃប្រទេសឥណ្ឌា នឹងប្រារព្ធឡើងនៅថ្ងៃទី 25 ខែកុម្ភៈឆ្នាំ 2026 នេះ នៅក្នុងព្រឹត្តិការណ៍ 2026 Galaxy Unpacked។
ហើយបន្ទាប់ពីការប្រកាសស្មាតហ្វូននេះ ក្រុមហ៊ុនបច្ចេកវិទ្យាយក្សកូរ៉េខាងត្បូងមួយនេះ នឹងចាប់ផ្តើមដាក់ Pre-order ស្មាតហ្វូន Galaxy S26 នេះចាប់ពីថ្ងៃទី 26 ខែកុម្ភៈនេះដល់ខែមីនា។ ស្របពេលដែលការលក់មុនទៅលើស្មាតហ្វូននេះ នឹងមកដល់ចន្លោះពីថ្ងៃទី 5 ខែមីនា ដល់ថ្ងៃទី 10 ខែមីនា។ សម្រាប់ការលក់ជាផ្លូវការទៅលើស្មាតហ្វូន Galaxy S26, Galaxy S26+ និង Galaxy S26 Ultra នឹងចាប់ផ្តើមនៅថ្ងៃទី 11 ខែមីនាឆ្នាំ 2026 នេះ។
ខណៈព័ត៌មានដែលនេះ ត្រូវបានចែករំលែកនៅលើបណ្តាញសង្គមនោះ នៅពេលនេះ ក៏មានព័ត៌មានលម្អិតអំពីស្មាតហ្វូន Galaxy S26 និង Galaxy S26+ ផងដែរ។ ស្មាតហ្វូន Galaxy S26 មានអេក្រង់ទំហំ 6.3 អ៊ីង AMOLED display ខណៈពេលដែលស្មាតហ្វូន Galaxy S26+ មានអេក្រង់ទំហំ 6.7 អ៊ីង។ ហើយក៏មានការការផ្លាស់ប្តូរមួយដ៏សំខាន់មួយទៀតផងដែរសម្រាប់ម៉ូដែលថ្មីនេះ នោះគឺការប្រើប្រាស់នូវបន្ទះឈីប Exynos 2600។
គួររំលឹកផងដែរថាក្រុមហ៊ុន Samsung ប្រើប្រាស់នូវស្មាតហ្វូន Flagship ចំនួន 2 ប្រភេទសម្រាប់ទីផ្សារនៅចិន និងសហរដ្ឋអាមេរិកជាមួយនឹងបន្ទះឈីប Snapdragon និង Exynos។ នៅក្នុងប៉ុន្មានជំនាន់ស្មាតហ្វូនមុននេះ ក្រុមហ៊ុន Samsung បញ្ចេញនូវស្មាតហ្វូន Galaxy S series ជាមួយនឹងបន្ទះឈីប Snapdragon ប៉ុន្តែរឿងនេះនឹងមានការផ្លាស់ប្តូរនៅឆ្នាំនេះ៕
