ថ្មីៗនេះ មានពាក្យចចាមអារ៉ាមថា ក្រុមហ៊ុន Xiaomi កំពុងតែធ្វើការនៅលើឧស្សាហកម្មរថយន្តដែរហើយបន្ទាប់ពីក្រុមហ៊ុនមួយចំនួនបានប្រកាសថា ពួកគេនឹងមានរថយន្តឆាប់ៗនេះ។ គម្រោងថ្មីនេះ គឺដឹកនាំដោយលោក Lei Jun ផ្ទាល់តែម្តង។ ក្រុមហ៊ុនបច្ចេកវិទ្យាចិនមួយនេះ បានធ្វើការឆ្លើយតបជាផ្លូវការទៅនឹងពាក្យចចាមអារ៉ាមនេះ និងបានបញ្ជាក់ថា ខ្លួនមិនមានគម្រោងណាមួយដែលត្រូវបានអនុម័តនៅឡើយទេ។
តាមការបញ្ចាក់នៅក្នុងរបាយការណ៍ចេញពី TechSina ដែលបានបញ្ចេញកាលពេលថ្មីៗនេះ បានអោយដឹងថា ក្រុមហ៊ុនបច្ចេកវិទ្យាយក្សរបស់ចិនមួយនេះ គឺបានធ្វើការឆ្លើយតបទៅនឹងពាក្យចចាមអារ៉ាមជាច្រើន។ នៅក្នុងសេចក្តីថ្លែងការណ៍មួយដែលមានចំណងជើងថា “Clarification of Reports Regarding Entering the Electric Vehicle Industry” នោះ ក្រុមហ៊ុនបច្ចេកវិទ្យានេះ បានអះអាងថា យើងត្រូវធ្វើការរង់ចាំសិន។ ក្រុមហ៊ុននេះ បានបន្ថែមថា ខ្លួនបានកត់សម្គាល់ឃើញថារបាយការណ៍ព័ត៌មានជាច្រើន គឺបាននិយាយថា ក្រុមហ៊ុននឹងបោះជំហានទៅក្នុងទីផ្សាររថយន្តអេឡិចត្រូនិច ប៉ុន្តែក្រុមហ៊ុននេះនៅមិនទាន់បញ្ជាក់អំពីគម្រោងនេះជាផ្លូវការនៅឡើយទេ។
មានការបញ្ជាក់ថា ក្រុមហ៊ុន Xiaomi នឹងបង្កើតនូវរថយន្តនៅដើមខែនេះ ស្របពេលពាក្យចចាមអារ៉ាមនេះ គឺកើតឡើងតាំងពីឆ្នាំ 2014 មកម្ល៉េះ។ អ្វីដែលគួរអោយកត់សម្គាល់ ការឆ្លើយតបរបស់ក្រុមហ៊ុននេះទៅលើបញ្ហានេះគឺមិនបានច្រានចោលថា ខ្លួនប្រហែលជាធ្វើការនៅលើរថយន្តនេះទេ។ ក្រុមហ៊ុននេះ ប្រហែលជាស្ថិតនៅក្នុងតំណាក់កាលដំបូងនៃការអភិវឌ្ឍ ឬតំណាក់កាលគម្រោងនៅឡើយ។ នៅក្នុងពេលនេះ ក្រុមហ៊ុនបច្ចេកវិទ្យាជាច្រើន បានបង្ហាញការចាប់អារម្មណ៍របស់ខ្លួននៅក្នុងឧស្សាហកម្មរថយន្តជាពិសេសនៅលើរថយន្តស្វ័យប្រវត្តិ។ មកដល់ពេលនេះ មានក្រុមហ៊ុនជាច្រើនរបស់ចិន ដូចជា Baidu, Ali និងក្រុមហ៊ុនជាច្រើនទៀតដូចជា Apple ផងដែរ ដែលមានការចាប់អារម្មណ៍ទៅលើរថយន្តនេះ៕