Geely ដែលជាក្រុមហ៊ុនផលិតរថយន្តរបស់ចិន និងជាម្ចាស់ម៉ាកយីហោទៅលើរថយន្ត Volvo ដែលមានភាគហ៊ុននៅក្នុងក្រុមហ៊ុន Daimler AG ក៏មានគម្រោងក្នុងការបង្ហាញនូវរថយន្តអគ្គិសនីថ្មីរបស់ខ្លួនផងដែរ។ តាមការបញ្ជាក់ចេញពីរបាយការណ៍ Reuters បានបញ្ជាក់ថា រថយន្តអគ្គិសនីប្រណិតនេះ នឹងធ្វើការផលិតដោយក្រុមហ៊ុនបុត្រសម្ព័ន្ធរបស់ខ្លួននោះ គឺក្រុមហ៊ុន Lingling Technologies។
របាយការណ៍នេះ មានការបញ្ជាក់ថា រថយន្តម៉ាកយីហោនេះ អាចយកឈ្នះក្រុមហ៊ុន Tesla ទៅលើទីផ្សាររថយន្តអគ្គិសនី High-End នៅក្នុងប្រទេសចិន ថែមទៀតផង។ សម្រាប់រថយន្តអគ្គិសនីប្រណិតនេះ គឺមានឈ្មោះហៅថា Zeekr ហើយវាមានគោលដៅក្នុងការប្រកួតប្រជែងជាមួយនឹងក្រុមហ៊ុន Tesla Inc។ រថយន្ត Zeekr នេះ គឺរថយន្តអគ្គិសនីរបស់ក្រុមហ៊ុន Geely ដែលមានគម្រោងក្នុងការលក់ផ្ទាល់ទៅកាន់អតិថិជនជាច្រើន ដោយមិនចាំបាច់ទៅកាន់មជ្ឈមណ្ឌលលក់រថយន្តផ្ទាល់នោះទេ។
រថយន្តម៉ាកយីហោ Zeekr នេះ គឺជារថយន្តអគ្គិសនី ដែលផ្អែកនៅលើ open-source EV ដែលមានឈ្មោះហៅថា Sustainable Experience Architecture។ នៅក្នុងរយៈពេលប៉ុន្មានខែនេះ ក្រុមហ៊ុន Geely ក៏មានកិច្ចព្រមព្រៀងជាមួយនឹងក្រុមហ៊ុនអ្នកផ្តល់សេវាកម្មជាច្រើនទៀតផងដែរនៅក្នុងការផ្តល់នូវរថយន្តអគ្គិសនីនេះនៅលើទីផ្សារ៕
