ឃើញថាមួយរយៈចុងក្រោយនេះ ក្រុមហ៊ុន Tesla បាននឹងកំពុងតែរងនូវសម្ពាធខ្លាំងមែនទែន នៅក្នុងទីផ្សារប្រទេសចិន បើទោះបីជាទីផ្សារនេះ មានការលក់រថយន្តរបស់ខ្លួនបានច្រើនក៏ដោយ។ យោងតាមកន្លងមកបានបញ្ជាក់ថា ក្រសួងការពារជាតិចិន ក៏បានដាក់បំរាមទៅលើមន្រ្តីរបស់ខ្លួនផងដែរ ទាក់ទងជាមួយនឹងការប្រើប្រាស់រថយន្តនេះ។ ថ្មីៗនេះ យោងតាមការបង្ហាញចេញនៅក្នុងព័ត៌មានថ្មីមួយ គឺមានការទម្លាយអំពីរថយន្ត Tesla នេះ ដោយបានបញ្ជាក់ថា រថយន្ត Tesla គឺមានការពាក់ព័ន្ធទៅនឹងគ្រោះថ្នាក់ចរាចរណ៍មួយយ៉ាងធ្ងន់ធ្ងរមួយ។ នៅក្នុងវីដេអូនេះ ក៏បង្ហាញអំពីរថយន្តមួយដែលឆាបឆេះហើយបណ្តាលអោយមនុស្សម្នាក់ស្លាប់ថែមទៀតផង។
យោងតាមរបាយការណ៍ចេញពីសារព័ត៌មាន ITHome នោះ គឺបានបញ្ជាក់ថា រថយន្តអគ្គិសនីរបស់ក្រុមហ៊ុនផលិតរថយន្តអាមេរិកនេះ គឺបានព្យាយាមក្នុងការវ៉ារថយន្តទៅលើមួយទៀត ហើយរថយន្តនេះ បានបុកជាមួយនឹងស្ពាននៅជ្រុងម្ខាងនៃផ្លូវផងដែរ។ ការបុកនេះ ក៏បានធ្វើអោយប៉ះពាល់ដល់ម៉ាស៊ីនរបស់រថយន្តនេះ ដែលបណ្តាលអោយរថយន្តនេះឆាបឆេះផងដែរ។ ប្រភពខាងលើបានបញ្ជាក់បន្ថែមថា ការឆាបឆេះនេះ មើលទៅគឺពិតជាខ្លាំងមែនទែន។ គ្រោះថ្នាក់នេះ ត្រូវបានប្រកាសដោយប៉ូលិស Guangzhou Zengcheng នៅក្នុងប្រទេសចិន កាលពីថ្ងៃទី 21 ខែមេសា ឆ្នាំ 2021។ គ្រោះថ្នាក់នេះ បានកើតឡើងនៅក្នុងសង្កាត់ Zengcheng District នៅវេលាម៉ោង 10pm កាលពីថ្ងៃទី 17 ខែមេសាកន្លងទៅថ្មីៗនេះ។
បើតាមការស៊ើបអងេ្កតបឋមរបស់អជ្ញាធ័រនោះ បានរកឃើញថា គ្រោះថ្នាក់នេះ បានកើតឡើងរវាងរថយន្តចំនួន 2 ដែលក្នុងនោះរថយន្តមួយគឺ Tesla ហើយរថយន្តមួយទៀត គឺជារថយន្តអ្នកដំណើរ ដែលមានសុវត្ថិភាព គឺមិនមានគ្រោះថ្នាក់នោះទេ។ មូលហេតុពិតនៃគ្រោះថ្នាក់នេះ គឺនៅមិនទាន់មានការបញ្ជាក់នៅឡើយទេ។ គួរអោយកត់សម្គាល់ផងដែរថា ក្រុមហ៊ុន Tesla បានធ្វើការឆ្លើយតបទៅនឹងអាជ្ញាធរជាច្រើនអំពីគ្រោះថ្នាក់នេះ ហើយក្រុមហ៊ុននេះ ក៏បានសហការជាមួយនឹងប៉ូលិសក្នុងតំបន់ក្នុងការជួយទៅលើការស៊ើបអង្កេតនេះផងដែរ៕
