SAMSUNG គ្រោងនឹងចាប់ដៃជាមួយនឹង HYUNDAI នៅក្នុងការអភិវឌ្ឍការប្រើប្រាស់ថាមពលនៅលើរថយន្តអគ្គិសនី

នៅក្នុងពេលថ្មីៗនេះ មានការអភិវឌ្ឍឥតឈប់ឈរទៅលើរថយន្តអគ្គិសនីជាច្រើន នៅលើទីផ្សាររថយន្ត។ នៅក្នុងរបាយការណ៍មួយបង្ហាញថា Samsung ដែលជាក្រុមហ៊ុនផលិតស្មាតហ្វូនដ៏ធំបំផុតរបស់កូរ៉េខាងត្បូង នឹងធ្វើការសហការជាមួយនឹងក្រុមហ៊ុន Hyundai ដើម្បីធ្វើការអភិវឌ្ឍទៅលើរថយន្តអគ្គិសនីជាច្រើន ដោយក្រុមហ៊ុន Samsung ប្រហែលជាផ្គត់ផ្គង់នូវថាមពលថ្មសម្រាប់ក្រុមហ៊ុន Hyundai ។

ក្រុមហ៊ុន Samsung និង Hyundai បានបញ្ជាក់ថា នាយកប្រតិបត្តិរបស់ក្រុមហ៊ុនទាំងពីរនេះ បានជួបគ្នាដើម្បីពិភាក្សាអំពីរឿងនេះផងដែរ។ លោក Li Zairong ដែលជាអនុប្រធានរបស់ក្រុមហ៊ុន Samsung Group បានជួបជាមួយនឹងលោក Zheng Yixuan ដែលជាអនុប្រធានរបស់ក្រុមហ៊ុន Hyundai រួចរាល់ហើយ ដែលនេះ គឺជាលើកដំបូងបំផុតដែលប្រធានរបស់ក្រុមហ៊ុនទាំងពីរនេះបានជួបគ្នាផ្ទាល់នោះ។ ក្រុមហ៊ុនទាំងពីរនេះ បានពិភាក្សាអំពីបច្ចេកវិទ្យាថាមពលថ្មជំនាន់ក្រោយនេះ និងចែករំលែកនូវការស្រាវជ្រាវ និងការអភិវឌ្ឍ។ 

ក្រុមហ៊ុន Hyundai យកដំបូន្មានពីនាយកប្រតិបត្តិរបស់ក្រុមហ៊ុន Samsung អំពីនិន្នាការបច្ចេកវិទ្យាថាមពលថ្មជាសាកលនោះ។ ក្រុមហ៊ុន Samsung នឹងផ្តល់នូវការស្រាវជ្រាវទៅលើថ្ម all-solid-state ថ្មីចុងក្រោយបំផុតរបស់ខ្លួនផងដែរ។ នៅក្នុងខែមីនាឆ្នាំនេះ ក្រុមហ៊ុន Samsung បាននិយាយថា ខ្លួនបានអភិវឌ្ឍទៅលើថាមពលថ្ម all-solid-state កម្រិតខ្ពស់ផងដែរ។ ថាមពលថ្មនេះសម្រាប់ប្រើប្រាស់នៅលើរថយន្តអគ្គិសនីដែលអាចធ្វើដំណើរបានចម្ងាយ 500 ម៉ាយ៍ (800 គីឡូម៉ែត្រ) នៅក្នុងការបញ្ចូលថាមពលថ្មម្តងនោះ។

កាលពីពេលមុន  ក្រុមហ៊ុន Hyundai ក៏ធ្លាប់បានអះអាងដែរថា ខ្លួនមានគម្រោងក្នុងការបង្ហាញនូវរថយន្តដល់ទៅ 44 ម៉ូឌែលនៅត្រឹមឆ្នាំ 2025 នេះ ដែលទាំងអស់នោះ គឺជារថយន្តអគ្គិសនី។ នៅក្នុងពេលបច្ចុប្បន្ននេះ ក្រុមហ៊ុននេះកំពុងតែអភិវឌ្ឍទៅលើរថយន្ងអគ្គសនីដែលផ្អែកនៅលើបច្ចេកវិទ្យា electric module platform (E-GMP) ដែលនឹងធ្វើការផលិតទ្រង់ទ្រាយធំនៅឆ្នាំក្រោយនេះ។ តាមការបញ្ជាក់របស់របាយការណ៍ជាច្រើន បានបញ្ជាក់ថា រថយន្តអគ្គិសនីទំនើបៗក្នុងពេលបច្ចុប្បន្ននេះប្រើប្រាស់នូវថាមពលថ្មរបស់ក្រុមហ៊ុន LG Chem និង SK Innovation។ យ៉ាងណាមិញ ថាមពលថ្មរបស់ក្រុមហ៊ុនSamsung នឹងចូលរួមក្នុងពេលឆាប់ៗនេះផងដែរ៕