Tesla គឺជាក្រុមហ៊ុនផលិតរថយន្តអេឡិចត្រូនិកដ៏ពេញនិយមបំផុតនៅក្នុងពិភពលោក ហើយក្រុមហ៊ុននេះ ក៏កំពុងត្រូវបានគេរំពឹងទុកនឹងមានជោគជ័យយ៉ាងខ្លាំងនៅក្នុងទីផ្សារឥណ្ឌាផងដែរ បន្ទាប់ពីបានឆ្លងកាត់ឧបសគ្គមួយចំនួននៅក្នុងការតស៊ូមតិជាមួយនឹងរដ្ឋាភិបាលប្រទេសនេះ។ មួយរយៈចុងក្រោយនេះ ក្រុមហ៊ុនផលិតរថយន្តអេឡិចត្រូនិកនេះ បាននិងកំពុងវិវត្តទៅមុខយ៉ាងខ្លាំងនៅក្នុងការវិនិយោគបន្ទាប់ពីមានការប្តឹងឧទ្ធរណ៍រដ្ឋាភិបាលឥណ្ឌា ទាក់ទងជាមួយការកាត់បន្ថយពន្ធនាំចូលលើរថយន្ត EV មកកាន់ទីផ្សារមួយនេះ។
.jpg)
យោងតាមរបាយការណ៍ថ្មីមួយដែលចេញមកពីការស្រាវជ្រាវ Counterpoint បានបង្ហាញថា ក្រុមហ៊ុន Tesla មានបំណងលូកចូលកាន់តែជ្រៅជាងមុនប្រទេសឥណ្ឌា តាមរយៈនៃការប្រកាសថា ខ្លួននឹងធ្វើការផលិតរថយន្តនៅក្នុងប្រទេសឥណ្ឌានៅដើមឆ្នាំក្រោយនេះហើយ។ សូមជំរាបថា កាលពីដើមឆ្នាំកន្លងទៅនេះ រដ្ឋមន្រ្តីដឹកជញ្ជូនឥណ្ឌាលោក Nitin Gadkari បាននិយាយថា ឥណ្ឌា បានត្រៀមខ្លួនផ្តល់ការលើកទឹកចិត្តដល់ក្រុមហ៊ុនធំមួយនេះ ដែលមានបំណងវិនិយោគ ដើម្បីធានាថា ថ្លៃដើមផលិតកម្មរបស់ក្រុមហ៊ុន Tesla នឹងទាបជាងនៅប្រទេសចិន ប្រសិនបើក្រុមហ៊ុនផលិតរថយន្តប្តេជ្ញាផលិតរថយន្តអគ្គិសនីរបស់ខ្លួននៅក្នុងប្រទេសឥណ្ឌា។
លោកបនន្តថា ដើម្បីទាក់ទាញក្រុមហ៊ុនផលិតរថយន្តអគ្គិសនីនេះនៅឥណ្ឌា រដ្ឋាភិបាល បាននឹងកំពុងពិចារណាកាត់បន្ថយពន្ធនាំចូល។ សម្រាប់រថយន្តអគ្គិសនីដែលមានតម្លៃក្រោម 4 ម៉ឺនដុល្លារអត្រាពន្ធអាចត្រូវបានកាត់បន្ថយមកត្រឹម 40 ភាគរយបើប្រៀបធៀបទៅនឹង 60 ភាគរយនាពេលបច្ចុប្បន្ន។ សម្រាប់រថយន្តដែលមានតម្លៃជាង 4 ម៉ឺនដុល្លារអត្រានេះអាចត្រូវបានកាត់បន្ថយពី 100 ភាគរយមកនៅត្រឹម 60 ភាគរយ។
គួរបញ្ជាក់ថា បច្ចុប្បន្នឥណ្ឌា គឺជាទីផ្សាររថយន្តធំជាងគេទី 5 ជាមួយនឹងការលក់រថយន្តប្រចាំឆ្នាំប្រហែល 3 លានគ្រឿង ប៉ុន្តែកាលពីឆ្នាំមុនរថយន្ត EV គឺលក់បានតែចំនួនតែ 5000 គ្រឿងប៉ុណ្ណោះ ដោយសារតែហេដ្ឋារចនាសម្ព័ន្ធសុវត្ថិភាពសាកថ្ម និង ថ្លៃដើមខ្ពស់នៃយានយន្តអគ្គិសនី។ ដូចគ្នានេះផងដែរ ឥណ្ឌាមិនមានគោលនយោបាយ EV ទូលំទូលាយដូចប្រទេសចិនដែលជាទីផ្សាររថយន្តធំបំផុតរបស់ពិភពលោកនោះទេ។ ក្រុមហ៊ុន Tesla ត្រូវបានគេរំពឹងថា នឹងចូលទៅក្នុងទីផ្សាររថយន្តឥណ្ឌា ដោយការនាំចូលយានយន្តដំបូង ជាជាងផលិតនៅក្នុងស្រុក។ ហើយបច្ចុប្បន្ននេះ ក្រុមហ៊ុនមានរោងចក្រផលិតយ៉ាងសកម្មនៅរដ្ឋកាលីហ្វ័រញ៉ារដ្ឋណេវ៉ាដាញូវយ៉ក និងសៀងហៃ ដោយមានរោងចក្រចំនួន 3 បន្ថែមទៀតដើម្បីចាប់ផ្តើមដំណើរការក្នុងពេលឆាប់ៗនេះ។
