Ford E-Tourneo Courier រថយន្តអគ្គិសនីប្រភេទ minivan បំពាក់ម៉ូទ័រអគ្គិសនីកំលាំង 100kW និងអាចរត់បានចំងាយ 370km

ក្រុមហ៊ុន Ford ទើបតែបានបញ្ចេញរថយន្តអគ្គិសនីខ្នាតតូចប្រភេទ minivan ម៉ូដែល Ford E-Tourneo Courier ដែលមានសមត្ថភាពអាចរត់បានរយះចំងាយផ្លូវដល់ 370 គីឡូម៉ែត្រ។ ទៅលើការឌីស្សាញរូបរាងខាងក្រៅរបស់រថយន្តអគ្គិសនី minivan របស់ Ford មួយនេះមានភាពប្រហាក់ប្រហែលទៅនឹងប្រភេទរថយន្ត SUV ដែរ។ Ford E-Tourneo Courier EV ត្រូវបានក្រុមហ៊ុនធ្វើការបំពាក់នូវម៉ូទ័រអគ្គិសនីផ្នែកកង់ខាងមុខ ឬ Front-wheel drive ដែលមានកំលាំង 100kW។

Ford E-Tourneo Courier បំពាក់កៅអីចំនួន 5 ដែលផ្តល់នូវភាពទូលាយក្នុងការអង្គុយរបស់អ្នករួមដំណើរ។ ទោះបីជារថយន្តអគ្គិសនីស៊េរីថ្មីរបស់ Ford មួយនេះស្ថិតក្នុងស្រឡាយ minivan EV ក៏ពិតមែន ប៉ុន្តែទំហំរបស់រថយន្តស៊េរីថ្មីនេះ គឺមានភាពធំទូលាយជាងរថយន្ត minivan ទូទៅ ដោយវាមានទំហំតូចជាងប្រភេទរថយន្ត SUV តែបន្តិចប៉ុណ្ណោះ។ រថយន្តអគ្គិសនីស៊េរីថ្មីមួយនេះអាចផ្ទុកចំណុះបានដល់ 614 លីត្រសម្រាប់ផ្នែកកៅអីអ្នកដំណើរខាងក្រោយ ហើយសម្រាប់ចំនុះផ្ទុកសរុប គឺអាចដាក់បានដល់ 2,162 លីត្រ។ ចំចុចខ្លាំងរបស់ Ford –Tourneo Courier EV គឺទៅលើសមត្ថភាពម៉ូទ័រអគ្គិសនីរបស់វាតែម្តងជាមួយកំលាំង 100kW ដែលមានសមត្ថភាពអាចរត់បានចំងាយផ្លូវ 370 គីឡូម៉ែត្រ សម្រាប់ការសាកភ្លើងមួយពេញម្តង។

Ford E-Tourneo Courier minivan ស៊េរីថ្មីនេះត្រូវបានគេរំពឹងថា នឹងមានដាក់លក់នៅក្នុងទីផ្សារអឺរ៉ុបនៅឆមាសទីពីរក្នុងឆ្នាំ 2023 នេះ។ ហើយសម្រាប់តម្លៃបឋមវិញត្រូវបានគេសន្និដ្ឋានថា អាចខ្ទង់ប្រហែលជាង $25,000។ ជាមួយគ្នានេះ Ford E-Tourneo Courier minivan ក៏ត្រូវបានគេរំពឹងថា នឹងមានលក់នៅក្នុងទីផ្សារផ្សេងក្រៅពីទីផ្សារអឺរ៉ុបផងដែរ ដូចជាទីផ្សារអាមេរិចខាងជើងជាដើម។ សូមរំលឹកថា កាលពីពេលថ្មីៗនេះ ក្រុមហ៊ុន Honda ក៏បានប្រកាសចេញលក់រថយន្តអគ្គិសនីស៊េរីថ្មីរបស់ខ្លួនម៉ូដែល Honda e:Ny1 EV ដែលមានសមត្ថភាពខ្លាំងអាចរត់បានចំងាយផ្លូវដល់ 412km សម្រាប់ការសាកភ្លើងមួយពេញម្តង៕