ចិនជាប់ជាប្រទេសដែលនាំចេញរថយន្តធំជាគេបំផុតនៅលើពិភពលោកនៅត្រីមាសទី 1 ក្នុងឆ្នាំ 2023

ក្នុងត្រីមាសទី 1 ក្នុងឆ្នាំ 2023 នេះ ប្រទេសចិនបាននាំមុខប្រទេសជប៉ុន និងអាល្លឺម៉ង់ក្លាយជាប្រទេសដែលនាំចេញរថយន្តធំជាងគេបំផុតក្នុងពិភពលោកជាលើកដំបូងជាមួយចំនួនដែលបាននាំចេញរហូតដល់ទៅ 1.069 លានគ្រឿង ខណៈប្រទេសជប៉ុនធ្លាក់មកនៅលេខរៀងទី 2 ដែលបាននាំចេញរថយន្តបាន 1.047 លានគ្រឿង។

ក្រុមហ៊ុន Tesla China, SAIC, Chery, Geely, Great Wall Motors, Changan, និង BYD បានក្លាយជាក្រុមហ៊ុននាំចេញរថយន្តធំបំផុតរបស់ប្រទេសចិន។ ដោយបច្ចុប្បន្នក្រុមហ៊ុន SAIC គឺជាក្រុមហ៊ុនធំជាងគេដែលបាននាំចេញរថយន្តរបស់ខ្លួនក្រោមស្លាកឈ្មោះ MG ដោយក្នុងចំនោមរថយន្តដែលបាននាំចេញចំនួន 3 គ្រឿង គឺមានរថយន្តក្រុមហ៊ុន SAIC មួយគ្រឿង។ ដោយឡែកសម្រាប់ក្រុមហ៊ុនផលិតរថយន្តអគ្គិសនីធំបំផុតរបស់ពិភពលោក BYD វិញបានឈរនៅលេខរៀងទី 9 ក្នុងតារាងនាំចេញជាមួយចំនួនដែលបាននាំចេញ 58,000 គ្រឿង។

ក្នុងរបាយការណ៍បញ្ជាក់ថាចាប់ពីខែមករា ដល់ ខែមេសា 2023 ក្រុមហ៊ុនផលិតរថយន្តប្រទេសចិនបាននាំចេញរថយន្តសរុបបាន 1.37 លានគ្រឿង ជាពិសេសក្នុងខែមេសា គឺការនាំចេញបានរហូតដល់ចំនួន 376,000 គ្រឿង មានកំណើរ 3.3% MoM និង 170% YoY នេះបើតាមប្រភពរបាយការណ៍ចេញពីស្ថាប័ន China Association of Automobile Manufacturers។

សូមបញ្ជាក់ថា៖ នៅមុនឆ្នាំ 2020 ការនាំចេញយានយន្តប្រចាំឆ្នាំរបស់ប្រទេសចិនមានប្រហែល 1 លានគ្រឿងក្នុងរយៈពេលប្រហែល 10 ឆ្នាំ។ បន្ទាប់មកនៅឆ្នាំ 2021 ការនាំចេញរថយន្តរបស់ចិនបានកើនឡើងដល់ជាង 2 លានគ្រឿង ដែលវ៉ាដាច់កូរ៉េខាងត្បូងក្លាយជាប្រទេសនាំចេញរថយន្តធំជាងគេទីបីរបស់ពិភពលោកបន្ទាប់ពីប្រទេសជប៉ុន និងអាល្លឺម៉ង់។ ហើយនៅឆ្នាំ 2022 ទំហំនៃការនាំចេញយានយន្តរបស់ប្រទេសចិនបានឈានដល់កម្រិតខ្ពស់ថ្មីនៃការនាំចេញរថយន្តបានចំនួន 3.11 លានគ្រឿង លើសប្រទេសអាល្លឺម៉ង់ជាលើកដំបូង ហើយបានក្លាយជាអ្នកនាំចេញរថយន្តធំទីពីររបស់ពិភពលោក។

សមាគមរថយន្តដឹកអ្នកដំណើរចិន ឬហៅថា Chinese Passenger Car Association បានព្យាករថា ការនាំចេញរថយន្តរបស់ចិននឹងកើនឡើងដល់ ៤ លានគ្រឿងនៅចុងឆ្នាំ2023 នេះ។ ប្រសិនបើនិន្នាការនេះនៅតែបន្ត វាអាចនឹងធ្វើឲ្យប្រទេសចិនចិនឈានទៅដណ្តើមដំណែងពីប្រទេសជប៉ុន ដើម្បីក្លាយជាប្រទេសនាំចេញរថយន្តធំជាងគេរបស់ពិភពលោកនៅឆ្នាំ 2023៕