បច្ចុប្បន្នក្រុមហ៊ុនផលិតរថយន្តអគ្គិសនីម៉ាក Tesla របស់មហាសេដ្ឋីផុតលេខក្នុងលោក Elon Musk បានឈរនៅលំដាប់ជួរមុខក្នុងតារាងនៅលើទីផ្សាររថយន្តអគ្គីសនីពិភពលោក។ ក្រុមហ៊ុនរបស់មហាសេដ្ឋីនេះ មិនត្រឹមតែផ្តល់នូវរថយន្តដែលមានភាពទំនើប និងការសន្សំសំចៃក៏ដូចជាការថែរក្សាបរិស្ថានប៉ុណ្ណោះទេ ក្រុមហ៊ុននេះក៏កំពុងផ្តល់ជូនអ្នកប្រើប្រាស់លើសពីការប្រើរថយន្តទៅទៀត ជាមួយការផ្តល់ជូននូវបទពិសោធន៍ប្រើប្រាស់បច្ចេកវិទ្យាបំពាក់លើរថយន្តដ៏អស្ចារ្យ។
ដោយពីមួយឆ្នាំទៅមួយឆ្នាំប្រព័ន្ធបច្ចេកវិទ្យារថយន្តរបស់ក្រុមហ៊ុន Tesla ត្រូវបានធ្វើការអភិវឌ្ឍន៍កាន់តែមានប្រសិទ្ធិភាពខ្ពស់ជាមួយការដាក់បញ្ចូលមុខងារប្រើប្រាស់ថ្មីៗកាន់តែទំនើបកាន់តែសម្បូរបែប។ ទន្ទឹមនឹងនេះ ក៏មានឃើញមានក្រុមហ៊ុនបច្ចេកវិទ្យាល្បីៗក្នុងពិភពលោកបាននឹងកំពុងធ្វើការអភិវឌ្ឍន៍ផលិតរថយន្តអគ្គិសនី ក៏ដូចជាបច្ចេកវិទ្យារថយន្តថ្មីៗទំនើបៗត្រៀមបញ្ចេញដើម្បីប្រគូតប្រជែងទីផ្សារជាមួយ Tesla ផងដែរ។ ជាក់ស្តែងក្រុមហ៊ុន SONY របស់ប្រទេសជប៉ុន កំពុងមានគម្រោងក្នុងការផ្តល់ជូននូវបទពិសោធន៍ប្រើប្រាស់ Software ថ្មីបំពាក់នៅលើរថយន្តក្នុងពេលអនាគតផងដែរ។ ភាពជាដៃគូជាមួយក្រុមហ៊ុន Honda ក្រុមហ៊ុនជប៉ុននេះនឹងនាំយករថយន្តអគ្គិសនីទំនើបដែលបំពាក់ប្រព័ន្ធបច្ចេកវិទ្យាកម្សាន្ត PS5 ចូលមកកាន់ទីផ្សាររថយន្តក្នុងពេលឆាប់ៗនេះ។
ក្រុមហ៊ុន SONY និង Honda បានប្រកាសចាប់ដៃសហការគ្នាសម្រាប់ឧស្សាហកម្មរថយន្តដែលហៅថា Honda Sony Mobility កាលពីអំឡុងខែ កញ្ញា ឆ្នាំ 2022 នេះ។ ក្រុមហ៊ុនទាំងពីរនៅមិនទាន់បង្ហាញពីផលិតផល និងម៉ាកយីហោដែលនឹងមកដល់លើទីផ្សារនៅក្រោមការបណ្តាក់ទុនជាមួយគ្នានេះនោះទេ។ ទោះជាយ៉ាងណាក៏ដោយពួកគេមានគម្រោងប្រកួតប្រជែងជាមួយគូប្រគូតនៅក្នុងទីផ្សាររថយន្តអគ្គិសនី EV Market។ យ៉ាងណាក៏ដោយគេរំពឹងថា ការនាំយកផលិតផលរបស់ក្រុមហ៊ុន Sony ទៅបំពាក់នៅលើរថយន្តអគ្គិសនីអាចជាប្រព័ន្ធបច្ចេកវិទ្យា PS5 ដែលជាផ្នែកមួយនៃកិច្ចព្រមព្រៀងរវាងក្រុមហ៊ុនទាំងពីរ។
លោក Izumi Kawanishi ដែលជាប្រធានក្រុមហ៊ុន Sony Honda Mobility បាននិយាយនៅក្នុងបទសម្ភាសន៍ជាមួយកាសែត Financial Times ថា ពួកគេគ្រោងនឹងផលិតរថយន្តអគ្គិសនីដែលផ្តល់ជូននឹងការកម្សាន្តដូចជាការស្តាប់តន្ត្រី ទស្សនាភាពយន្ត និងបច្ចេកវិទ្យា PS5 ជាដើម។ Kawanishi បានបញ្ជាក់បន្ថែមថា "នេះគឺជាការប្រយុទ្ធរបស់យើងដើម្បីប្រគូតប្រជែងទីផ្សារជាមួយ Tesla។ លោក Kawanish ដែលពីមុន គឺជាប្រធានផ្នែកអភិវឌ្ឍន៍បច្ចេកវិទ្យា AI របស់ Sony បាននិយាយថា វាអាចទៅរួចក្នុងការដាក់បញ្ចូលបច្ចេកវិទ្យា PS5 ទៅក្នុងរថយន្តរបស់ពួកគេនាពេលអនាគត។
ដោយឡែកលោក Yasuhide Mizuno ប្រធានក្រុមហ៊ុន Sony Honda Mobility Corp. និងជាអតីតប្រធានក្រុមហ៊ុន Honda មានប្រសាសន៍ថា ក្រុមហ៊ុនកំពុងបង្កើនដំណើរការផលិតរបស់ខ្លួនជុំវិញការដាក់មាតិកាជាមុនសិន។ ក្រុមហ៊ុននឹងចាប់ផ្តើមបញ្ចេញម៉ូដែលរថយន្តដំបូងរបស់ខ្លួននៅអាមេរិកខាងជើងនៅឆ្នាំ 2025។ ជាការពិតណាស់ ដើម្បីធ្វើឱ្យបទពិសោធន៍ថ្មីដ៏អស្ចារ្យនេះ "អាចធ្វើទៅបាន" បច្ចេកវិទ្យាការបើកបរស្វ័យភាព គឺជាកត្តាចាំបាច់បំផុត បើមិនដូច្នេះទេ វានឹងមិនអាចទៅរួចក្នុងការរីករាយជាមួយការកម្សាន្តជាមួយ PS5 នៅក្នុងរថយន្តអំឡុងនៃការធ្វើដំណើរនោះទេ៕
