BYD Song Pro DM-i 2026 Long-Range បើកបរដោយអគ្គិសនីសុទ្ធបាន 200km នឹងមកដល់នៅថ្ងៃទី 10 ខែមករា

ក្រុមហ៊ុន BYD នឹងប្រកាសចេញឡាន PHEV ស៊េរីថ្មីឆ្នាំ 2026 Song Pro DM-i ជាប្រភេទ Long-Range Version នៅក្នុងប្រទេស ចិននាថ្ងៃទី 10 ខែមករា ចុងសប្តាហ៍នេះ។ សម្រាប់ឡាន Plug-in-hybrid SUV ស៊េរីថ្មីនេះ នឹងចូលខ្លួនមកជំនួសដំណែងម៉ូដែល Song Pro DM-i បច្ចុប្បន្ន ដែលត្រូវបានក្រុមហ៊ុនប្រកាសចេញកាលពីថ្ងៃទី 23 ខែកញ្ញា ឆ្នាំ 2024។

BYD Song Pro DM-i ស៊េរីឆ្នាំ 2026 បានទទួលការធ្វើបច្ចុប្បន្នលើប្រព័ន្ធបច្ចេកវិទ្យា DM Plug-in-hybrid ដំណើរការបានកាន់តែល្អប្រសើរជាស៊េរីមុន។ កាលពីខែតុលា ឆ្នាំ 2025 កន្លងទៅ BYD បានធ្វើការប្រកាសចេញលក់ម៉ូដែល 2026 Song Pro DM-i Series នៅក្នុងទីផ្សារប្រទេសចិនជាមួយតម្លៃចាប់ពីខ្ទង់ $14,700 ដល់ $18,000។

ដោយនៅលើ Song Pro DM-i ឆ្នាំ 2026 ត្រូវបាន BYD ធ្វើបច្ចុប្បន្នភាពទៅលើប្រព័ន្ធសែនស័រកាមេរ៉ាជំនួយការចូលចត all-around parking camera system, មុខងារបញ្ចេញដោយសំឡេងដំឡើងមកជាមួយស្រាប់, ប្រព័ន្ធបង្ហាញផ្លូវ Gesture based navigation activation និងប៉ាណាមុខជាប្រភេទ Active front grille។ ហើយផ្នែកខាងក្រៅក៏មានការបន្ថែមនូវជម្រើសពណ៌ថ្មីផងដែរ។

នៅលើម៉ូដែល Song Pro DM-i ឆ្នាំ 2026 បច្ចុប្បន្ន បានដំណើរការដោយប្រព័ន្ធបច្ចេកវិទ្យា Plug-in-hybrid ដែលគាំទ្រដោយម៉ាស៊ីនសាំង 1.5-litre ប្រភេទ Naturally aspirated gasoline engine រួមនឹងម៉ូទ័រអគ្គិសនីមួយ។ បើតាមការធ្វើតេស្តបើកបរពីស្ថាប័ន CLTC បានឲ្យដឹងថា BYD Song Pro DM-i 2026 អាចបើកបរដោយប្រើថាមពលអគ្គិសនីសុទ្ធបានចម្ងាយ 133km និងអាចបើកបានដល់ 1,508km នៅពេលប្រើគូបជាមួយម៉ាស៊ីនចាក់សាំងពេញ។

ចំពោះកម្រិតស៊ីសាំងវិញ តាមការបញ្ជាក់ពី NEDC គឺខ្ទង់ 3.2-Litre/100km។ រថយន្ត PHEV SUV ម៉ូដែលថ្មីនេះ ប្រើប្រាស់ប្រអប់លេខកង់រង្វង់ ឬ column-mounted gear selector។ ដោយឡែកសម្រាប់ម៉ូដែលថ្មីដែលត្រៀមបង្ហាញខ្លួននៅចិននាថ្ងៃទី 10 មករា សប្តាហ៍នេះ គឺជាប្រភេទ Long-Range ដែលបំពាក់កញ្ចប់ថ្មធំជាងមុន និងមានសមត្ថភាពអាចបើកបរដោយប្រើអគ្គិសនីសុទ្ធបានចម្ងាយដល់ 200km។

បើតាមរបាយការណ៍លក់រថយន្តចេញពីប្រទេសចិន បានបង្ហាញថា ឡាន BYD Song Pro DM-i Series លក់បានចំនួន 21,362 គ្រឿងក្នុងខែវិច្ឆិកា ឆ្នាំ 2025 ដែលធ្វើឲ្យការលក់ប្រចាំឆ្នាំមានចំនួន 211,611 គ្រឿង។ ក្នុងគ្រួសាររថយន្ត BYD Song រួមមានម៉ូដែលដូចជា Song L EV, Song L DM-i, Song Plus EV, Song Plus DM-i, និង Song Pro DM-i ដែលការលក់នៅខែធ្នូ 2025 មានចំនួនសរុប 55,169 គ្រឿង ហើយការលកសរុបប្រចាំឆ្នាំនៃគ្រួសារ Song Series របស់ BYD ក្នុងទីផ្សារប្រទេសចិនមានចំនួន 788,003 គ្រឿង ដែលធ្វើឲ្យរថយន្តមួយម៉ូដែលនេះ ក្លាយជារថយន្ត SUV លក់ដាច់ខ្លាំងបំផុតប្រចាំឆ្នាំ៕