Tesla កំពុងដំណើរការដោះសា្រយបណ្តឹង ជាមួយក្រុមគ្រួសារវិស្វករ Apple ម្នាក់ ដែលបានស្លាប់ដោយសារគ្រោះថ្នាក់ចរាចរណ៍ ទាក់ទងនឹងប្រព័ន្ធ Autopilot Crush

ក្រុមហ៊ុនផលិតរថយន្តអគ្គិសនីល្បីឈ្មោះបំផុតក្នុងលោក Tesla របស់មហាសេដ្ឋីផុតលេខ Elom Musk កំពុងរងបណ្តឹងពីក្រុមគ្រួសាររបស់វិស្វករមួយរូបរបស់ក្រុមហ៊ុន Apple លោក Walter Huang ដែលបានស្លាប់ដោយសារគ្រោះថ្នាក់ចរាចរណ៍ដែលបណ្តាមកពីប្រព័ន្ធបើកបរស្វ័យប្រវត្តិ Autopilot Driving Assistant System ក្នុងរថយន្ត Tesla របស់លោកដំណើរការមិនប្រក្រតី។

ដោយហេតុការណ៍នៃគ្រោះថ្នាក់ចរាចរណ៍រថយន្ត Tesla ដែលបណ្តាអោយម្ចាស់បានស្លាប់នេះ បានកើតឡើងតាំងពីអំឡុងខែមីនា ឆ្នាំ 2018 មកម្ល៉េះ ហើយបើតាមការស៊ើបអង្កេតហេតុការណ៍នេះដោយស្ថាប័ន The National Transportation Safety Board (NTSB) បានចង្អុលបង្ហាញថាគ្រោះថ្នាក់នេះ បានកើតឡើងដោយសារប្រព័ន្ធ Autopilot ដំណើរការមិនប្រក្រតី ហើយក៏មានការរួមចំនែកពីការធ្វើប្រហែសពីអ្នកបើកបរផងដែរ។

យ៉ាងណាមិញពាក់ព័ន្ធនឹងប្រាក់សំណង មិនទាន់ត្រូវបានបង្ហាញលម្អិតនោះទេ។ ហើយចៅក្រមនៅតែយល់ព្រមលើកិច្ចព្រមព្រៀងនេះ ដោយសវនាការនឹងត្រូវដំណើរការបន្តម្តងទៀត ដែលគ្រោងធ្វើឡើងនៅថ្ងៃទី 11 ខែមេសា ខាងមុខនេះ។ ហើយនាយកដ្ឋានដឹកជញ្ជូនរដ្ឋកាលីហ្វ័រញ៉ា ដែលមានដំណាងឲ្យចុងចោទផងដែរនោះ នឹងនឹងមានឱកាសធ្វើការជំទាស់ទៅនឹងការសម្រេចណាមួយបានផងដែរ។ សូមរំលឹកថា ក្រុមហ៊ុន Tesla មានគម្រោងក្នុងការធ្វើការជាមួយក្រុមហ៊ុន Apple ដើម្បីស្រាវជ្រាវ និងកំណត់ថាតើលោក Huang បានលេងហ្គេមនៅលើទូរស័ព្ទរបស់គាត់នៅមុនពេលជួបឧបទ្ទវហេតុនេះដែរឬទេ ដើម្បីបញ្ជាក់ថា លោកប្រហែលជាមិនបានយកចិត្តទុកដាក់ឲ្យបានខ្ពស់នៅអំឡុងពេលនៃការបើកបរនោះឡើយ។ 

ក្រុមអ្នកស៊ើបអង្កេតបានរកឃើញកម្មវិធីហ្គេមដែលបើកនៅលើទូរសព្ទរបស់ Huang ប៉ុន្តែ មិនអាចបញ្ជាក់ពីការប្រើប្រាស់សកម្មរបស់វាក្នុងអំឡុងពេលគ្រោះថ្នាក់នោះទេ។ ខណៈពេលដែលក្រុមហ៊ុន Tesla ព្យាយាមធ្វើការជាមួយក្រុមហ៊ុន Apple ប៉ុន្តែក្រុមហ៊ុនបច្ចេកវិទ្យាយក្សនេះបានបដិសេធមិនព្រមធ្វើការសហការ៕