ក្រុមហ៊ុនផលិតរថយន្ត Jaguar បានចាប់ដៃគូសហការជាមួយ Tesla ក្នុងការបើកផ្លូវឲ្យកាន់តែមានភាពងាយស្រួលក្នុងការសាកភ្លើងរថយន្តអគ្គិសនីសម្រាប់ម្ចាស់រថយន្តអគ្គិសនីរបស់ខ្លួន។ កិច្ចសហការនេះ គឺមានន័យថា នាពេលអនាគតខាងមុខនេះ ម្ចាស់រថយន្តអគ្គិសនី Jaguar គឺអាចសាកភ្លើងរថយន្តរបស់ពួកគេបាននៅស្ថានីយ៍ SuperCharger របស់ Tesla នៅបណ្តាប្រទេសដូចជា សហរដ្ឋអាមេរិក កាណាដា និងម៉ិចស៊ីកូជាដើម។
ចាប់ពីឆ្នាំ 2025 ទៅរថយន្តអគ្គិសនីថ្មីរបស់ Jaguar នឹងអាចសាកភ្លើងនៅស្ថានីយ៍ Tesla North American Charging Station (NACS)។ ដូចនេះសម្រាប់ការទិញរថយន្តអគ្គិសនី Jaguar ស៊េរីថ្មីនាពេលខាងមុខ និងមិនបាច់មានឆ្នាំងសាកបន្ថែមទៀតនោះទេ ពោល គឺអាចសាកភ្លើងបាននៅស្ថានីយ៍ SuperCharger របស់ Tesla ដោយផ្ទាល់តែម្តង។ មួយវិញទៀតសម្រាប់ ម្ចាស់នៃរថយន្តម៉ូដែល Jaguar i-Pace បច្ចុប្បន្ន ក៏អាចនឹងប្រើឆ្នាំងសាកនៅស្ថានីយ៍ SuperCharger Station របស់ Tesla បានផងដែរ ដែលអាចនឹងចាប់ផ្តើមនៅឆ្នាំ 2024។
សម្រាប់ការផ្លាស់ប្តូរយុទ្ធសាស្ត្រថ្មីនេះ គឺជាផ្នែកមួយនៃផែនការធំរបស់ Jaguar ដើម្បីឆ្ពោះទៅរកការផលិតរថយន្តអគ្គិសនីពេញលេញនាពេលអនាគតដ៏ខ្លីខាងមុខនេះ។ ហើយវាមិនមែនមានតែ Jaguar នោះទេ ក្រុមហ៊ុន Land Rover ក៏អាចទទួលយកស្តង់ដារសាកថ្មរបស់ Tesla នៅស្ថានីយ៍ NACS ផងដែរ។ ដូចនេះ វាកាន់តែផ្តល់នូវភាពងាយស្រួលសម្រាប់អ្នកប្រើប្រាស់រថយន្តអគ្គិសនីរបស់ពួកគេ ក្នុងការសាកភ្លើងបាននៅគ្រប់ទីតាំងស្ថានីយ៍របស់ Tesla។
បច្ចុប្បន្នម៉ាកនៃរថយន្ត Jaguar បានស្ថិតនៅក្នុងបញ្ចីកំពុងកើនឡើងសម្រាប់ការសាកភ្លើងរថយន្តអគ្គិសនី ដែលមានក្រុមហ៊ុនផលិតរថយន្តដូចជា Ford, GM និង Nissan ដែលបានទទួលយកការសាកភ្លើងនៅស្ថានីយ៍ NACS របស់ Tesla។ លោក Mark Camilleri នាយកសេវាកម្មអគ្គិសនីរបស់ Jaguar បាននិយាយថា វាល្អបំផុតសម្រាប់ការផ្សាភ្ជាប់ទំនាក់ទំនងនៅក្នុង "បណ្តាញស្ថានីយ៍សាកថ្មសាកលរបស់ក្រុមហ៊ុន Tesla ព្រោះថា វាបានផ្តល់នូវអ្វីដែលអតិថិជនរបស់យើងចង់បាន ពោល គឺការសាកថ្មលឿន សាកដោយមានទុកចិត្តខ្ពស់ និងមានភាពងាយស្រួល"៕
