ខណៈពេលវេលានៃការបង្ហាញខ្លួនកាន់តែខិតជិតចូលមកដល់ នៅពេលនេះ Xiaomi បានធ្វើការទម្លាយចេញការឌីស្សាញរូបរាងពិតប្រាកដនៃរថយន្តអគ្គិសនីដំបូងរបស់ខ្លួនជាផ្លូវការណ៍ហើយ។ ដោយរូបរាងពិតប្រាកដនៃរថយន្តអគ្គិសនីដំបូងរបស់ Xiaomi ត្រូវបានលាតត្រដាងតាមរយះការចុះបញ្ជីផលិតដោយស្ថាប័ន Ministry of Industry and Information Technology ហៅកាត់ថា MIIT របស់ប្រទេសចិន។ រថយន្តអគ្គិសនីដំបូងរបស់ក្រុមហ៊ុនផលិតស្មាតហ្វូនដ៏មានសក្តានុពលរបស់ប្រទេសចិនមួយនេះ គឺប្រើស្លាកឈ្មោះ SU7 Series ដែលត្រូវបានគេដឹងថាមានចំនួនបីស៊េរី គឺស៊េរីស្តង់ដារ Xiaomi SU7, SU7 Pro និង SU7 Max។
បើតាមការចុះបញ្ជីរបស់ស្ថាប័ន MIIT បានបង្ហាញថា រថយន្តអគ្គិសនីដំបូងរបស់ Xiaomi គឺប្រើលេខកូដសំគាល់ចំនួនពីរដោយក្នុងរួមមានលេខកូដ BJ7000MBEVR2 ដែលជាម៉ូដែលបំពាក់ម៉ូទ័រអគ្គិសនីចំនួនមួយ Single-Motor និងលេខកូដ BJ7000MBEVA1 ជាម៉ូដែលបំពាក់ប្រព័ន្ធម៉ូទ័រអគ្គិសនីចំនួនពីរ Dual-Motor។ Xiaomi SU7 មានប្រវែងបណ្តោយ 4,997 mm, ទទឹង 1,963 mm និងកម្ពស់ 1,455mm រួមនឹងមានគម្លាតពីកង់មុខទៅកង់ក្រោយ 3,000mm ដែលធ្វើឲ្យរថយន្តអគ្គិសនីរបស់ Xiaomi មានប្រវែងបណ្តោយ និងទទឹងវែងជាងរថយន្តម៉ូដែល Tesla Model 3 និង Noi ET5។ ហើយរថយន្តអគ្គិសនីដំបូងរបស់ Xiaomi អាចនឹងជាន់ល្បឿន Top Speed ដល់ 210km/h។
សម្រាប់ម៉ូដែល Xiaomi SU7 ដែលបំពាក់ Single-Motor គឺមានទំងន់សរុប 1,980 គីឡូក្រាម និងម៉ូដែល Xiaomi SU7 Pro និង SU7 Max ដែលបំពាក់ Dual-Motor មានទំងន់សរុប 2,205 គីឡូក្រាម។ ចំពោះម៉ូដែល SU7 ដែលប្រើម៉ូទ័រអគ្គិសនីមួយ Single-Motor អាចផលិតថាមពលបាន 220kW ឬស្មើរនឹងកំលាំង 295hp ហើយម៉ូទ័រនេះត្រូវបានផលិតដោយក្រុមហ៊ុន United Automotive Electric Systems ដែលជាក្រុមហ៊ុនបង្កើតឡើងដោយក្រុមហ៊ុន Bosch និង Zhonglian Automotive Electronics។ ដោយឡែកសម្រាប់ម៉ូដែល Xiaomi SU7 Pro និងSU7 Max បំពាក់នូវម៉ូទ័រអគ្គិសនីចំនួន 2 ដែលមួយអាចផលិតថាមពល 220kW ឬ 295hp និងមួយទៀតអាចផលិតថាមពលបាន 275kW ឬ 368hp ហើយសរុបបញ្ចូលគ្នាអាចផលិតកំលាំងដល់ 660hp។
Xiaomi SU7 ប្រើប្រាស់កញ្ចប់អាគុយ lithium iron phosphate (LFP) ដែលផ្គត់ផ្គង់ដោយក្រុមហ៊ុន FinDreams ដែលជាក្រុមហ៊ុនបុត្រសម្ព័ន្ធរបស់ BYD ខណៈម៉ូដែល SU7 Pro និង SU7 Max ប្រើប្រាស់កញ្ចប់អាគុយ Li-ion ternary ដែលផ្គត់ផ្គង់ដោយក្រុមហ៊ុន CATL។ ហើយបើតាមប្រភពព័ត៌មានមិនទាន់ផ្លូវការណ៍បាននិយាយថា រថយន្តអគ្គិសនីដំបូងរបស់ Xiaomi គឺគាំទ្រប្រព័ន្ធសាកភ្លើងកំលាំង 800V។ បន្ថែមពីនេះ Xiaomi SU7 Series ក៏បំពាក់នូវប្រព័ន្ធបើកបរស្វ័យប្រវត្តិ ដែលធ្វើប្រតិបត្តិការជាមួយប្រព័ន្ធចាប់សញ្ញាកម្រិតខ្ពស់ LiDAR System ដែលបំពាក់នៅលើដំបូលខាងមុខថែមទៀតផង។
បើតាមប្រភពព័ត៌មានចុងក្រោយបានបង្ហើបថា Xiaomi នឹងចាប់ផ្តើមសង្វាក់ផលិតរថយន្តអគ្គិសនីដំបូងរបស់ខ្លួនលក្ខណៈទ្រង់ទ្រាយធំនៅខែធ្នូចុងឆ្នាំ 2023 ជាមួយគម្រោងការក្នុងការប្រកាសចេញផ្លូវការណ៍នៅខែកុម្ភៈ ឆ្នាំ 2024 អាចក្នុងអំឡុងពេលព្រឹត្តិការណ៍ MWC2024។ សម្រាប់តម្លៃបឋមរបស់រថយន្តអគ្គិសនីដំបូងពី Xiaomi គឺអាចចាប់ផ្តើមពីខ្ទង់ប្រហែល $40,000 ឡើងទៅនៅទីផ្សារប្រទេសចិន៕
