ឡានអគ្គិសនីស៊េរីថ្មីម៉ាក Range Rover Electric ដែលនឹងមកដល់នាពេលខាងមុខនេះ ត្រូវបានគេប្រទះឃើញកំពុងបើកសាក ល្បងនៅក្នុងតំបន់អង់តាក់ទិក។ ដែលនេះ ត្រូវបានគេដឹងថា ជាការធ្វើតេស្តសាកល្បងនៅក្នុងតំបន់ដែលត្រជាក់បំផុតលើកទីពីរ ក្រោយពីការបញ្ចប់ការធ្វើតេស្តនៅទីក្រុង Arjeplog ប្រទេសស៊ុយអែត។ ការធ្វើតេស្តនេះ គឺបានបង្ហាញពីភាពធន់រឹងមាំរបស់រថយន្ត Range Rover Electric ដ៏ប្រណិតមួយនេះ ទោះបីជាជាស្ថិតនៅក្នុងតំបន់ដែលមានអាកាសធាតុត្រជាក់ខ្លាំង និងឆ្លងកាត់តំបន់ទឹកកកដ៏លំបាកក៏ដោយ។
បើតាមលារបញ្ជាក់ពីក្រុមហ៊ុនបានអោយដឹងថា រថយន្តអគ្គិសនីប្រណិតរបស់ JLR មួយនេះ ត្រូវបានក្រុមហ៊ុនបើការធ្វើតេស្តសាកល្បងក្នុងរយះចម្ងាយផ្លូវដល់ទៅ 72,720 គីឡូម៉ែត្រ ដោយឆ្លងកាត់តំបន់ចម្រុះ និងតំបន់ដែលមានឧបសគ្គប្រឈមជាច្រើនរួចមកហើយ។ សម្រាប់ការធ្វើតេស្តការសាកល្បងនៅតំបន់អាក់ទិកនៅពេលថ្មីៗនេះ គឺបានផ្តោតសំខាន់ទៅលើប្រព័ន្ធគ្រប់គ្រងកម្ដៅកម្រិតខ្ពស់របស់ Range Rover Electric ដែលបង្ហាញពីបច្ចេកវិទ្យា ThermAssistTM ដែលទើបបង្កើតថ្មី។
ក្រុមហ៊ុនបញ្ជាក់ថា ប្រព័ន្ធឆ្លាតវៃនេះ បានកាត់បន្ថយថាមពលដែលត្រូវការសម្រាប់កំដៅរហូតដល់ 40% ទោះ បីជាសីតុណ្ហភាពធ្លាក់ចុះដល់ -10 អង្សាសេក៏ដោយ។ ThermAssistTM គឺជាប្រព័ន្ធបច្ចេកវិទ្យាកែច្នៃកំដៅដ៏ឆ្លាតវៃ ដើម្បីកំដៅទាំងនៅក្នុងកាប៊ីន និងខ្សែបណ្តាញថាមពល ដោយផ្តោតលើប្រសិទ្ធភាពល្អបំផុតនៅក្នុងបរិយាកាសដែលត្រជាក់ខ្លាំង។
សម្រាប់លក្ខណៈពិសេសដ៏គួរឱ្យចាប់អារម្មណ៍មួយផ្សេងទៀតដែលបានឆ្លងកាត់ការបង្កើនល្បឿនរបស់ Range Rover Electric ក្នុងអំឡុងពេលធ្វើតេស្តរដូវរងារ គឺប្រព័ន្ធមុខងារ single-pedal driving mode របស់រថយន្ត។ ប្រព័ន្ធនេះ អនុញ្ញាតឱ្យអ្នកបើកបរ គ្រប់គ្រងល្បឿនរបស់រថយន្តបានយ៉ាងពេញលេញដោយប្រើតែ accelerator pedal ប៉ុណ្ណោះ។ បន្ថៃមពីនេះប្រព័ន្ធនេះពិតជាមានប្រយោជន៍ខ្លាំងនៅពេលបើកបរស្ថិតនៅលើផ្ទៃរអិលដូចជា ទឹកកក និងព្រិល ដែលផ្តល់នូវការគ្រប់គ្រង និងស្ថេរភាពកាន់តែប្រសើរឡើង។ ប្រព័ន្ធ single-pedal driving mode បានភ្ជាប់មកជាមួយមុខងារ Hill Hold ដែលអនុញ្ញាតឱ្យអ្នកបើកបរចាប់ផ្តើមចលនាម្តងទៀតនៅលើទំនោរដោយមិនចាំបាច់ជាន់ហ្វ្រាំងជំនួយ។
Range Rover Electric ថ្មីនេះ ដំណើរការដោយប្រព័ន្ធ All-wheel-drive system ថ្មីរួមជាមួយនឹងបច្ចេកវិទ្យា Intelligent Driveline Dynamics (IDD) ដែលមានសមត្ថភាពខ្ពស់ក្នុងការបែកចែកកម្លាំងទៅកាន់កង់ទាំង 4 បានយ៉ាងជាក់លាក់ ដោយបញ្ជូនរហូតដល់ទៅ 100% ទៅកាន់កង់ក្រោយនៅពេលចាំបាច់ ដើម្បីការពារការបាត់បង់ការអូសទាញ។ ប្រព័ន្ធនេះមានប្រតិកម្មលឿនជាងរថយន្តដែលប្រើម៉ាស៊ីនចំហេះក្នុង (ICE) ដោយគ្រប់គ្រងល្បឿនម៉ូទ័រក្នុងរយៈពេល 50 មិល្លីវិនាទី ដើម្បីរក្សាលំនឹង។
រថយន្ត SUV ដ៏ទំនើបនេះ គាំទ្រប្រព័ន្ធសាកភ្លើងតុងស្យុងខ្ពសកម្រិត 800Volt ដំបូងគេដែលត្រូវបានរចនា និងបង្កើតដោយក្រុមហ៊ុន JLR ផ្ទាល់តែម្តង។ Range Rover Electric បំពាក់នូវកញ្ចប់ថ្មទំហំ 117 kWh ដែលមានភ្ជាប់នូវរចនាសម្ព័ន្ធការពារ និងប្រើប្លង់ពីរជាន់នៃកោសិកា prismatic 334 ដែលធ្វើឱ្យមានភាពប្រសើរឡើងសម្រាប់ដង់ស៊ីតេថាមពល រយះចម្ងាយបើកបរ និងថេរវេលាក្នុងការសាកថ្មល្បឿនលឿនជាដើម៕
