ក្រុមហ៊ុនផលិតរថយន្ត Geely ត្រៀមខ្លួនចូលក្រឡុងទីផ្សាររថយន្តប្រទេសប៉ូឡូញជាមួយរថយន្ត Crossover ចំនួនពីរម៉ូដែល ដោយរថយន្តម៉ូដែលទីមួយ គឺ Geely EX5 ដែលជារថយន្តអគ្គិសនី SUV រីម៉ូដែលទីពីរមិនទាន់ត្រូវបានបញ្ជាក់ឈ្មោះនៅឡើយទេ គ្រាន់តែស្គាល់ត្រឹមថា C-SUV ដែលដំណើរការដោយប្រព័ន្ធ Plug-in-hybrid។
Geely បានចុះកិច្ចកុងត្រាសហការជាមួយក្រុមហ៊ុនប្រទេសប៉ូឡូញ Jameel Motors។ ក្រុមហ៊ុន Geely Auto និង Jameel Motors បានចុះហត្ថលេខាលើកិច្ចកុងត្រាក្នុងការចែកចាយរថយន្តដំណើរការដោយថាមពលថ្មី (New Energy Vehicles) ក្នុងទីផ្សារប្រទេសប៉ូឡូញ កាលពីថ្ងៃទី 08 ខែឧសភា ថ្មីៗនេះ។
Jameel Motors គឺជាក្រុមហ៊ុនចែកចាយរថយន្តដ៏ធំមួយដែលបង្កើតឡើងនៅអារ៉ាប៊ីសាអូឌីតក្នុងឆ្នាំ 1945។ ក្រៅពីប្រទេសអារ៉ាប៊ីសាអូឌីត Jameel Motors បច្ចុប្បន្នមានប្រតិបត្តិការនៅក្នុងប្រទេសជាច្រើនទៀតរួមមាន អាល់ហ្សេរី ចិន អេហ្ស៊ីប ឥណ្ឌា ជប៉ុន ម៉ារ៉ុក ម៉ូណាកូ និងតួកគី។ Jameel Motors បានធ្វើការសហការចែកចាយម៉ាករថយន្តដូចជា Toyota, Lexus, MG, GAC និង Changan ជាដើម។
យោងតាមសេចក្តីប្រកាសព័ត៌មានដែលចែកចាយដោយក្រុមហ៊ុនទាំងពីរ បញ្ជាក់ថា ក្រុមហ៊ុន Geely Auto នឹងផ្តល់ជូននូវត្រកូលដំណើរការដោយថាមពលថ្មី (NEV) របស់ខ្លួនដល់អតិថិជនក្នុងប្រទេសប៉ូឡូញ។ យោងតាម Geely ការលក់រថយន្តអគ្គិសនីសុទ្ធ (BEV) របស់ប្រទេសប៉ូឡូញបានកើនឡើង 41% ក្នុងខែកុម្ភៈ ឆ្នាំ 2025។
ម៉ាកយីហោរថយន្តចិននេះនឹងណែនាំម៉ូដែលពីរទៅកាន់ទីផ្សារក្នុងស្រុក។ ដោយរថយន្តទាំងពីរត្រូវបានផលិតឡើងដោយប្រើស្ថាបត្យកម្មគ្រោងឆ្អឹង GEA។ រថយន្តដំបូងដែលនឹងចូលប្រទេសប៉ូឡូញគឺ Geely EX5 ប្រភេទ Crossover EV ដោយម៉ូដែលនេះនឹងចាប់ផ្តើមចេញដាក់លក់នៅក្នុងត្រីមាសទី 3 ក្នុងឆ្នាំ 2025។ Geely EX5 ត្រូវបានដាក់លក់ក្នុងទីផ្សារប្រទេសចិនក្រោមស្លាកឈ្មោះថា Geely Galaxy E5។
ឡានអគ្គិសនីនេះមានបណ្តោយ 4,615mm/ ទទឹង 1,901mm/ កំពស់ 1,670mm និងគម្លាតរវាងកង់មុខទៅកង់ក្រោយ 2,750mm។ EX5 ដំណើរការដោយប្រព័ន្ធម៉ូទ័រអគ្គិសនីមួយកំលាំង 215 សេះ ដែលជាន់ស្ទុះល្បឿនពីកុងទ័រ 0 ទៅ 100km/h ប្រើពេលប្រមាណ 6.9 វិនាទី។ Geely EX5 មានជម្រើសកញ្ចប់ថ្ម LFP ពីរទំហំ គឺទំហំ 49.52 kWh និង 60.22 kWh ដែលសាកភ្លើងពេញម្តងអាចជិះបានចម្ងាយផ្លូវ 440km និង 530km។
សម្រាប់រថយន្តមួយម៉ូដែលទៀតដែលត្រូវចេញលក់នៅទីផ្សារប្រទេសប៉ូឡូញ ក្រុមហ៊ុនមិនទាន់បានបង្ហាញព័ត៌មានផ្លូវការណ៍នោះទេ គ្រាន់តែ ដឹងថាជា C-SUV ដែលផលិតដោយប្រើប្រព័ន្ធគ្រោងឆ្អឹងប្រភេទ GEA។ បច្ចុប្បន្ននេះ Geely ចេញលក់រថយន្ត Plug-in-hybrid តែមួយម៉ូដែលប៉ុណ្ណោះនៅទីផ្សារប្រទេសចិន គឺម៉ូដែល Geely Galaxy Starship 7 EM-i ជាប្រភេទរថយន្ត Crossover ដូចនេះ ម៉ូដែលនេះទំនងជាម៉ូដែលទីពីរដែលត្រូវចេញលក់នៅទីផ្សារប្រភេទប៉ូឡូញ។ Galay Starship 7 EM-i មានប្រវែងបណ្តោយ 4,740mm/ទទឹង 1,905mm/កំពស់ 1,685mm គម្លាតចន្លោះកង់មុខទៅកង់ក្រោយ 2,755mm។
Galaxy Starship 7 EM-i ដំណើរការដោយប្រព័ន្ធ NordThor 2.0 plug-in hybrid system នៅលើម៉ាស៊ីន 1.5-liter ជាប្រភេទ Naturally aspirated Engine មានកំលាំង 110 សេះ និងភ្ជាប់ដំណើរការជាមួយម៉ូទ័រអគ្គិសនីមួយកំលាំង 215 សេះ។ រថយន្តនេះមានជម្រើសកញ្ចប់ថ្ម LFP ពីរទំហំ គឺ 8.05 kWh និង 19.09 kWh សាកភ្លើងពេញម្តងអាចជិះដោយប្រើថាមពលថ្មសុទ្ធបានចម្ងាយ 55km និង 120km និងអាចជិះបានដល់ 1,420km នៅពេលប្រើផ្គូបជាមួយម៉ាស៊ីនចាក់សាំងមួយពេញម្តង៕
