រថយន្តអគ្គិសនីថ្មីម៉ូដែល iCar V23 ដែលជាប្រភេទរថយន្ត off-road SUV ត្រូវបានឆ្លងកាត់ការទទួលស្គាល់ដោយស្ថាប័ន MIIT របស់ប្រភេទចិនជាផ្លូវការណ៍ហើយ ដោយមានជម្រើស RWD ដំណើរការដោយប្រព័ន្ធម៉ូទ័រអគ្គិសនីមួយ និង AWD ដំណើរការដោយប្រព័ន្ធម៉ូទ័រអគ្គិសនីពីរ។ រថយន្ត off-road SUV ស៊េរីថ្មីនេះត្រូវបានបង្កើតឡើងដោយការសហការវាងក្រុមហ៊ុន Chery និង Zhimi Technology ដែលមានលោក Su Jun គឺសហស្ថាបនិក។
ហើយ iCar V23 គឺជារថយន្ត off-road ដំបូងក្នុងស្រឡាយរថយន្តថ្មី iCar V-Series ដែលផ្តោតទៅលើទីផ្សាររថយន្តប្រភេទ Off-road។ Chery iCar V23 ត្រូវបានគេរំពឹងថា នឹងចេញលក់នៅលើទីផ្សារនៅមុនដំណាច់ឆ្នាំ 2024 នេះ ដោយអាចនឹងមានតម្លៃចាប់ពីខ្ទង់ $16,500 ឡើងទៅនៅទីផ្សារប្រទេសចិន។
ថ្មីៗនេះមានសេចក្តីរាយការណ៍ថា Xiaomi មានភាគហ៊ុននៅក្នុងការអភិវឌ្ឍន៍នៅលើ iCar V23 ដោយចាប់តាំងពី Zhimi Technology គឺស្ថិតនៅជាក្រុមហ៊ុនបុត្រសម្ព័ន្ធរបស់ Xiaomi មកម៉្លេះ។ ទោះជាយ៉ាងណាក៏ដោយក្រោយមក Xiaomi បានបំភ្លឺថា កិច្ចសហប្រតិបត្តិការនេះក្រុមហ៊ុនខ្លួនមិនមានជាប់ពាក់ព័ន្ធជាមួយ ឬខ្សែសង្វាក់អេកូឡូស៊ីរបស់ Xiaomi ដែលរួមបញ្ចូលបច្ចេកវិទ្យា Zhimi នោះឡើយ។
ផ្ទុយទៅវិញ កិច្ចសហប្រតិបត្តិការនេះ គឺមានតែរវាង ក្រុមហ៊ុនលោក Su Jun និង Chery តែប៉ុណ្ណោះ។ នៅឆ្នាំ 2021 លោក Su Jun បានចាប់ផ្តើមគម្រោងអភិវឌ្ឍន៍យានជំនិះ។ បន្ទាប់មកនៅឆ្នាំ 2023 លោក Su Jun និង Chery បានបង្កើតភាពជាដៃគូដើម្បីរួមចំណែករួមគ្នាឈានដល់ការបង្កើតម៉ាករថយន្ត iCar ស្ថិតនៅក្រោមដំបូលរបស់ Chery ។
តាមរូបភាពគំរូរបស់ iCar V23 បង្ហាញថា រថយន្ត off-road ស៊េរីថ្មីនេះ មានការរចនាឡើងបែបប្រអប់ជ្រុងដែលមានរំលេចដោយចង្កៀងបំភ្លឺផ្លូវរាងមូលជាមួយកាងខាងមុខធំក្រាស់ ដែលមើលទៅពិតជាមានភាពរឹងមាំមែនទែន។ រថយន្ត off-road SUV ស៊េរីថ្មីនេះត្រូវបានគេដឹងថាមានប្រវែងបណ្តោយខ្លួន 4,220mm/ ទទឹង 1,915mm/ កម្ពស់ 1,845mm និងគម្លាតចន្លោះកង់មុខក្រោយ 2,735mm។ iCar V23 មានកម្រិតមុំចូល 39/41 ដឺក្រេ, មុំចេញ 35 ដឺក្រេ ជាមួយទម្ងន់ 1,710kg/1,825kg និងមានជម្រើសទំហំកង់ 19-inch និង 21-inch។
នៅលើម៉ូដែល iCar V23 មានបំពាក់នូវប្រព័ន្ធកាមេរ៉ាចំហៀងឆ្វេងស្តាំ និងនៅលើផ្ទាំង bumper ខាងមុខ ហើយនៅចំហៀងឆ្វេង-ស្តាំ និងមុខ-ក្រោយរថយន្តក៏មានបំពាក់នូវសែនស័រចាប់សញ្ញារ៉ាដាថែមទៀតផង។ សម្រាប់ម៉ូដែល RWD ឬ rear-wheel-drive មានបំពាក់ម៉ូទ័រអគ្គិសនីមួយអាចផលិតកំលាំងបាន 100kW ឬ 134 សេះ និងប្រើកញ្ចប់អាគុយអគ្គិសនីប្រភេទ ternary lithium battery pack។ ដោយឡែកនៅលើម៉ូដែល AWD ឬ All-wheel-drive វិញ បំពាក់បន្ថែមនូវម៉ូទ័រអគ្គិសនីកំលាំង 55kW ឬ 74 សេះមួយទៀតនៅលើកង់ខាងមុខជាមួយកញ្ចប់អាគុយអគ្គិសនីប្រភេទ lithium iron phosphate battery pack។
iCar V23 ទាំងពីរម៉ូដែលអាចជាន់ល្បឿនលឿនបំផុត (top speed) បានដល់ 140km/h។ ទោះជាយ៉ាងណាសម្រាប់ការជាន់សន្ទុះល្បឿនវ៉ាត់កុងទ័រមិនទាន់ត្រូវបានគេបញ្ជាក់នៅឡើយទេ។ តាមការអះអាងពី Chery កាលពីពេលមុនបានឲ្យដឹងថា iCar V23-RWD អាចបើកបរបានចម្ងាយផ្លូវជាង 400km ខណៈម៉ូដែល AWD អាចបើកបានចម្ងាយផ្លូវជាង 500km នៅពេលសាកភ្លើងពេញម្តង៕
