ក្រុមហ៊ុនផលិតរថយន្តអគ្គិសនីរបស់ប្រទេសចិន Maxus បានប្រកាសចេញរថយន្តអគ្គិសនីប្រភេទ Pickup ដំណើរការដោយប្រព័ន្ធបើកបរ All-wheel-drive (AWD) ដំបូងគេក្នុងទីផ្សារតំបន់អឺរ៉ុប ដោយបាននាំមុខក្រុមហ៊ុន Ford របស់អាមេរិក និង Toyota របស់ជប៉ុន រួមនឹងក្រុមហ៊ុនផលិតរថយន្តម៉ាកផ្សេងៗទៀត។ រថយន្តអគ្គិសនីប្រភេទ Pickup ស៊េរីថ្មីរបស់ Maxus ម៉ូដែល eTerron 9 មានទំហំធំជាងរថយន្ត Ford Ranger បន្តិច និងមានសមត្ថភាពអាចបើកបរបានចម្ងាយរហូតដល់ 430 គីឡូម៉ែត្រ នៅពេលសាកភ្លើងមួយពេញម្តង។
Maxus ម៉ាកយីហោរថយន្តដែលដំបូងឡើយស្ថិតក្រោមក្រុមហ៊ុនផលិតរថយន្តប្រភេទ Van របស់ចក្រភពអង់គ្លេស គឺ LDV Group ហើយក្រោយមកត្រូវបានទិញដោយក្រុមហ៊ុន SAIC Motor របស់ប្រទេសចិននៅក្នុងឆ្នាំ 2010។ យីហោរថយន្តរបស់ចិននេះបានសម្ពោធរថយន្តប្រភេទ Pickup ស៊េរីថ្មីម៉ូដែល eTerron 9 EV នេះនៅឯពិព័រណ៍រថយន្ត IAA Hanover ក្នុងប្រទេសអាល្លឺម៉ង់ក្នុងសប្តាហ៍នេះ។ រថយន្ត Pickup ស៊េរីថ្មីនេះត្រូវបានផលិតឡើងដោយរក្សាទម្រង់តាមម៉ូដែល Maxus T90EV ដែលជារថយន្តអគ្គិសនី Pickup ដំបូងគេរបស់ចក្រភពអង់គ្លេស ដែលដំណើរការដោយប្រព័ន្ធបើកបរ RWD ឬ rear-wheel-drive។
Maxus eTerron 9 EV ដំណើរការដោយប្រព័ន្ធម៉ូទ័រអគ្គិសនីពីរ ដោយម៉ូទ័រខាងមុខមានកំលាំង 125kW ឬ 170 សេះ និងម៉ូទ័រក្រោយមានកំលាំង 200kW ឬ 272 សេះ ដែលសរុបកំលាំងទាំងពីរបញ្ចូលគ្នាអាចផលិតបាន 325 kW ឬ 442 សេះ ។ Maxus eTerron 9 EV ក៏មានសតម្ថភាពអាចអូសសណ្តោងទម្ងន់បានរហូតដល់ 7,700 ផោន ជាមួយនឹងបន្ទុកអតិបរមាជិត 620 គីឡូក្រាមនៅផ្នែកខាងក្រោយ។
រថយន្ត electric pickup truck របស់ចិនមួយនេះបំពាក់កញ្ចប់ថាមពលថ្ម LFP Blade battery ទំហំ 102 kWh ដែលផ្តល់អនុភាពឲ្យ Maxus eTerron 9 អាចបើកបរបានចម្ងាយផ្លូវ 430 គីឡូម៉ែត្រ តាមស្តង់ដារបញ្ជាក់ពីស្ថាប័ន WLTP។ បន្ថែមពីនេះ eTerron 9 ក៏គាំទ្របច្ចេកវិទ្យាសាកភ្លើងចូលល្បឿនលឿនផងដែរ ដោយសារ ពី 20% ទៅ 80% ប្រើពេលប្រមាណ 40 នាទី តាមរយះការសាកភ្លើងនៅស្ថានីយ៍សាកល្បឿនលឿនកំលាំងរហូតដល់ 115kW។
សម្រាប់ប្រព័ន្ធជំនួយការបើកបរវិញ Maxus eTerron 9 គាំទ្រនូវប្រព័ន្ធ All-Terrain System (ATS) រួមបញ្ចូលនូវមុខងារបើកបរចំនួនប្រាំមួយ (Six driving mode) ដូចជា Normal, Mud, Sand, និងមុខងារផ្សេងៗទៀត ដើម្បីសម្រួលដល់ការបើកបរប្រកបដោយសុវត្ថិភាព និងផាសុខភា។ ក្រុមហ៊ុន Maxus បាននិយាយថា optimized venting system និងការរចនាកញ្ចប់ថ្មត្រូវបានធ្វើឲ្យមានភាពល្អប្រសើរឡើងជាងមុខប្រមាណ 18% នៅពេលស្ថិតក្នុងតំបន់អាកាសធាតុត្រជាក់ បើប្រៀបធៀបទៅនឹងរថយន្តអគ្គិសនីផ្សេងទៀតនៅលើទីផ្សារ។
បន្ថែមពីនេះនៅលើ eTerron 9 ក៏មានមុខងារសាកភ្លើង bi-directional charging ទៅកាន់ឧបករណ៍អគ្គិសនីផ្សេងៗទៀតបានផងដែរ ដែលល្អបំផុតសម្រាប់ដំណើរការកម្សាន្តបោះតង់ និងការធ្វើកិច្ចការងារខាងក្រៅដែលនៅឆ្ងាយពីតំបន់អគ្គិសនី។ Maxus eTerron 9 មានប្រវែង 5.5 ម៉ែត្រដែលវែង និងទំហំធំជាងបន្តិចធៀបនឹងរថយន្ត Ford Ranger ដែលមានប្រវែង 5.37 ម៉ែត្រ។
Maxus នឹងបើកការបញ្ជាទិញរថយន្តភីកអាប់អគ្គិសនីដំណើរការដោយប្រព័ន្ធ AWD ម៉ូដែល eTerron 9 លើកដំបូងនៅទីផ្សារតំបន់អឺរ៉ុបក្នុងខែតុលាខាងមុខនេះ ហើយការដឹកជញ្ជូនគ្រោងនឹងចាប់ផ្តើមនៅខែមករា ឆ្នាំ 2025។ ទោះជាយ៉ាងសម្រាប់តម្លៃរបស់ eTerron 9 មិនទាន់ប្រកាសឲ្យដឹងក៏ដោយ ប៉ុន្តែរថយន្ត electric pickuo ម៉ូដែលថ្មីមួយនេះ ត្រូវបានគេព្យាករណ៍ថាអាចនឹងមានតម្លៃខ្ពស់ជាងម៉ូដែល Maxus T90EV ដែលតម្លៃចាប់ពីខ្ទង់ $66,300) នៅចក្រភពអង់គ្លេសតម្លៃមិនទាន់បញ្ចូ VAT៕
