Nio ES9 ឡានអគ្គិសនីសុទ្ធ បំពាក់កញ្ចប់ថ្មទំហំធំដល់ 102kWh សាកភ្លើងពេញម្តងអាចបើកបានចម្ងាយ 620km

ក្រុមហ៊ុនផលិតរថយន្តម៉ាក Nio របស់ប្រទេសចិន ត្រៀមធ្វើការប្រកាសចេញឡានអគ្គិសនីប្រភេទflagship SUV នៅប្រទេសចិនក្នុងពេលឆាប់ៗខាងមុខនេះ។ ឡាន Flagship Large-size SUV ស៊េរីថ្មីនេះ ត្រូវបានគេស្គាល់ថាជាម៉ូដែល ES9។ ជាមួយគ្នានេះ ស្ថាប័ន MIIT របស់ប្រទេសចិនបានធ្វើការបង្ហាញនូវលក្ខណៈសម្បត្តិមួយចំនួនរបស់ Nio ES9 នៅលើការចុះបញ្ចីរបស់ខ្លួនកាលពីពេលថ្មីៗនេះផងដែរ។

តាមរយះបញ្ចីរបស់ MIIT បានបង្ហាញថា Nio ES9 បានបំពាក់កញ្ចប់ថ្មទំហំធំដល់ 102kWh ដែលតាម range ការបើកបរក្រោមលក្ខខណ្ឌស្តង់ដាររបស់ CLTC បង្ហាញថា ការសាកភ្លើងពេញម្តង គឺអាចបើកបរបានចាប់ពីចម្ងាយ 560km, 600km និង 620km។ ES9 គឺជាសមាជិកថ្មីក្នុងជាស្រឡាយរថយន្ត Premium Electric SUV ជំនាន់ថ្មីចុងក្រោយបង្អស់របស់ Nio។ ឡាន Large-size EV SUV នេះ មានតួរខ្លួនប្រវែង 5,365mm/ ទទឹង 2,029mm/ កម្ពស់ 1,870mm និងគម្លាតរវាងចន្លោះកង់មុខទៅកង់ក្រោយ 3,250mm។

តាមរូបភាពដែលបានបង្ហាញមកនេះ ឃើញថានៅលើដំបូលខាងមុខរបស់ Nio ES9 មានបំពាក់នូវសែនស័រ LiDAR ចំនួនបីគ្រាប់, ប្រព័ន្ធសែនស័រ AQUILA sensing system របស់ Nio ក៏ដូចជាប្រប័ន្ធមុខងារជើងក្រោមប្រភេទ adaptive chassis system ដែលអាចលើក ឬទម្លាក់កម្ពស់រថយន្តបានដោយស្វ័យប្រវត្តិ “automatic height adjustment” ព្រមជាមួយការប្រើប្រាស់យ៉ាន់កង់ខ្នាតធំដល់ទៅ 23-inch ឯណោះ។

ទាក់ទងទៅនឹងប្រព័ន្ធអនុភាពកម្លាំងអូសទាញដំណើរការវិញ Nio ES9 ថ្មីនេះ អាចនឹងដំណើរការនៅលើប្រព័ន្ធម៉ូទ័រចំនួនពីរដែលអភិវឌ្ឍន៍ផលិតដោយក្រុមហ៊ុន Nio Power Technology (Hefei) Co., Ltd ដោយម៉ូទ័រមុខអាចផលិតកម្លាំងបាន 180kW (241hp) ខណៈម៉ូទ័រខាងក្រោយអាចផលិតកម្លាំងបាន 340kW (456hp) ដែលសរុបកម្លាំងចូលគ្នា គឹអាចធ្វើបានដល់ 520kW (697hp)។

Nio ES9 អាចជាន់ល្បឿនលឿនបំផុត ឬ Top Speed បានដល់ 220km/h។ យ៉ាងណាមិញសម្រាប់កាលបរិច្ឆេទប្រកាសចេញផ្លូវការណ៍ តម្លៃ និងលក្ខណៈសម្បត្តិសំខាន់ផ្សេងៗទៀតរបស់ Nio ES9 នៅមិនទាន់ត្រូវបានក្រុមហ៊ុនបង្ហាញលម្អិតនៅឡើយទេក្នុងពេលនេះ៕