កាល ពីព្រឹកថ្ងៃចន្ទ ទី ២៨ ខែមករា ២០១៣ កន្លងទៅនេះ បន្ទាប់ពីទទួលបានជោគជ័យ និងគាំទ្រយ៉ាងច្រើនពីសំណាក់មិត្តយុវវ័យលើការលក់នាពេលកន្លងទៅ ហាងទំនើប ស៊ាំសុង The Mehk បានបើកសម្ពោធសាខារបស់ខ្លួនមួយទីតាំងទៀត ដើម្បីបំពេញតម្រូវការអតិថិជនរបស់ខ្លួន។ សាខាថ្មីទើបនឹងបើកសម្ពោធនេះមានឈ្មោះថា «ហាងទំនើបស៊ាំសុង The Mehk សាខាផ្សារទំនើបសុវណ្ណា» ស្ថិតនៅផ្សារទំនើបសុវណ្ណាជាន់ផ្ទាល់ដី។
ក្រោមអធិបតីដ៏ខ្ពង់ខ្ពស់ពីសំណាក់ ឯកឧត្ដមខៀវ កាញារីទ្ធ រដ្ឋមន្ត្រីក្រសួងព័ត៌មាន លោកក៏បានបង្ហាញពីចំណាប់អារម្មណ៍ចំពោះភាពរីកចម្រើនរបស់ Samsung ក៏ដូចជាបច្ចេកវិទ្យានាសម័យតិចណូឡូជីទំនើបឥតឈប់ឈរសម្រាប់នៅកម្ពុជា យ៉ាងដូច្នេះថា៖ «ក្រុមហ៊ុន Samsung គឺជាក្រុមហ៊ុនធំមួយកំពុងតែមានឈ្មោះល្បីល្បាញបំផុតនៅលើពិភពលោក បច្ចុប្បន្ននេះ គឺមានការគាំទ្រច្រើនពីសំណាក់អតិថិជន ជាមួយនឹងការបើកសម្ពោធនូវហាង Samsung The Mehk នេះនឹងរឹតតែធ្វើឲក្រុមហ៊ុនកាន់តែទទួលបាននូវការពេញចិត្តបន្ថែមទៀតពីសំណាក់អ្នកប្រើប្រាស់នៅក្នុងប្រទេសកម្ពុជា ហើយឯកឧត្ដម ខៀវ កាញារីទ្ធ ក៏ធ្វើការកោតសរសីរ និងជូនពរឲក្រុមហ៊ុន Samsung និងហាង The Mehk នេះដែលបានបើកសម្ពោធនូវថ្ងៃនេះទទួលបាននូវភាពជោគជ័យផងដែរ។»
ហាងទំនើបស៊ាំសុង The Mehk នៅផ្សារទំនើបសុវណ្ណាជាសាខាទី ៦ ដែល៥ទីតាំង នៅភ្នំពេញ និង១ទីតាំងផ្សេងទៀតនៅសៀមរាប។ ដោយឡែកក្រៅពីសាខាហាងទំនើប បច្ចុប្បន្ននេះSamsung មានមជ្ឈមណ្ឌលផ្ដល់សេវាថែទាំសរុបចំនួនពីរដែលមួយទីតាំងនៅភ្នំពេញ និងមួយទីតាំងផ្សេងទៀតស្ថិតនៅខេត្តសៀមរាប។
Samsung ក៏បានបញ្ជាក់ពីជំហរក្នុងការពង្រីកហាងទំនើបរបស់ខ្លួនបន្ថែមទៀត ក្នុងអនាគតដ៏ខ្លីខាងមុខនេះ ដើម្បីបំពេញសេចក្ដីត្រូវការរបស់អតិថិជនដែលកំពុងតែកើនឡើងរៀងរាល់ថ្ងៃឥតឈប់។
ឆ្លៀតក្នុងឱកាសបើកសម្ពោធ ពង្រីកវិសាលភាពរបស់ខ្លួនតំណាងរបស់The Mehk លោក Kelvin Ng បាន ឲ្យដឹងថា យើងមានមោទនភាពយ៉ាងក្រៃលែង ក្នុងតួនាទីជាតំណាងចែកចាយផលិតផលមានគុណភាពខ្ពស់របស់Samsung។ បន្ទាប់ពីទទួលបានឈ្មោះជាតំណាងចែកចាយ ឬDistributor សន្ទុះនៃការលក់របស់The Mehk មានការកើនឡើងយ៉ាងឆាប់រហ័សក្នុងរយៈពេលដ៏ខ្លី ទាំងប្រាក់ចំណេញ និងបរិមាណទូរស័ព្ទដៃម៉ាកSamsung។
The Mehk ត្រូវបានបង្កើតឡើងនៅឆ្នាំ ២០០៩ ក្នុងគោលបំណងផ្គត់ផ្គង់នូវផលិតផលប្រកបដោយគុណភាពខ្ពស់ និងសេវាកម្មល្អប្រកបដោយជំនឿជាក់ដល់អតិថិជន។ ថ្វីត្បិតតែThe Mehk មានវ័យក្មេងខ្ចីប៉ុន្តែ ដោយយើងសំលឹងឃើញពីទំនោរនៃការប្រើប្រាស់Smartphone ទើបក្រុមហ៊ុនសម្រេចចិត្តពង្រីកសាខាមួយផ្សេងទៀត ស្ថិតក្រោមចំណងមិត្តភាពរបស់ស្លាកសញ្ញាលំដាប់ថ្នាក់ពិភពលោក Samsung។
ងាកមកជួបជាមួយនាយកប្រចាំសាខាក្រុមហ៊ុន ថៃស៊ាំសុង អេឡិចត្រូនិកប្រចាំឥណ្ឌូចិន (កម្ពុជា-ឡាវ) លោក Gwihan Lee បានមានប្រសាសន៍ថា Samsung បានបោះទុនវិនិយោគនៅកម្ពុជា តាំងពីថ្ងៃទី ២៨ ខែ សីហា ២០១០។ ក្នុងរយៈពេលដ៏ខ្លី យើងទទួលបានជោគជ័យយ៉ាងត្រចះត្រចង់ ទាំងទំនុកចិត្ត និងការគាំទ្រពីសំណាក់អតិថិជនកម្ពុជា ក៏ដូចជាពិភពលោកទាំងមូល លើគំនិតច្នៃប្រឌិតថ្មីរបស់យើង ជាហេតុនាំឲ្យស្លាកសញ្ញាមួយនេះទទួលបានចំណែកទីផ្សារដ៏ធំ បើធៀបនឹងដៃគូប្រកួតប្រជែងផ្សេងទៀត។
«យើងតែងតែឈរលើ គោលការណ៍ បោះជំហានទៅមុខឥតឈប់ឈរ ដើម្បីស្វែងរកអ្វីដែលថ្មី អ្វីដែលជាតម្រូវការរបស់អតិថិជន ដើម្បីសម្រួលដល់សេចក្ដីត្រូវការរបស់ពួកគាត់ក្នុងការរស់នៅប្រចាំ ថ្ងៃ លើផ្នែកបច្ចេកវិទ្យា»។ លោក Lee បន្ថែម។ក្រៅពីភាពប៉ិនប្រសប់ លើផ្នែកបច្ចេកវិទ្យាឈានមុខ ក្លាយខ្លួនជាក្រុមហ៊ុន បច្ចេកវិទ្យាលេខមួយលើពិភពលោក(Smartphone) Samsung ក៏បានរួមចំណែកសកម្មភាពសង្គមជាច្រើនដូចជា៖ គម្រោងបង្កើនឱកាសទីផ្សារការងារ និងកាត់បន្ថយផលប៉ះពាល់សំណល់អេឡិចត្រូនិកដល់បរិស្ថាន កម្ពុជា ដោយមានកិច្ចសហប្រតិបត្តិការជាមួយរាជរដ្ឋាភិបាល អង្គការKOICA និងUNIDO កាលពីខែ សីហា ២០១២កន្លងទៅ។
