យោងតាមរបាយការណ៍របស់ IT Home News បានចុះផ្សាយថា បុគ្គលិករបស់ក្រុមហ៊ុន Huawei មួយរូបបានបង្ហើបថា ប្រព័ន្ធប្រតិបត្តិការជំនាន់ថ្មី HarmonyOS 3.0 នឹងមកដល់ក្នុងពេលឆាប់ៗនេះ។ បើតាមរបាការណ៍បាននិយាយទៀតថា ក្រុមហ៊ុនផលិតស្មាតហ្វូនខ្នាតយក្សរបស់ប្រទេសចិនមួយនេះត្រៀមប្រារព្ធព្រឹត្តិការណ៍ពិសេសប្រចាំឆ្នាំ “Huawei Developer Conference 2021” នៅថ្ងៃទី 24 ខែតុលាខាងមុខនេះ។ ដោយក្នុងព្រឹត្តិការណ៍នោះ Huawei នឹងបង្ហាញចេញនូវប្រតិបត្តិការស្មាតហ្វូនជំនាន់ថ្មីរបស់ខ្លួនគឺ HarmonyOS 3.0។
ក្រុមហ៊ុន Huawei បានចាកចេញពីការប្រើប្រាស់ប្រតិបត្តិការស្មាតហ្វូន Android របស់ក្រុមហ៊ុន Google ដោយសារតែវិវាទទីផ្សារពាណិជ្ជកម្មវរវាងសហរដ្ឋអាមេរិក និងចិន ហើយក៏បានចាប់ផ្តើមបង្កើត និងដាក់ឲ្យប្រើប្រាស់ប្រតិបត្តិការស្មាតហ្វូនដែលអភិវឌ្ឍន៍ដោយខ្លួនឯងផ្ទាល់កាលពីអំឡុងខែមិថុនាឆ្នាំ 2021 នេះ។
សូមរំលឹកថា Huawei បានប្រកាសចេញប្រតិបត្តិការស្មាតហ្វូនផ្ទាល់ខ្លួនក្រោមឈ្មោះថា HarmonyOS2.0 ជាផ្លូវការណ៍កាលពីអំឡុងព្រឹត្តិការណ៍ Huawei Developer Conference ដែលប្រារព្ធធ្វើឡើងកាលខែកញ្ញា ឆ្នាំ 2020 និងបានដាក់ឲ្យធ្វើការតេស្តសាកល្បងប្រើនៅលើស្មាតហ្វូនលើកដំបូងនៅថ្ងៃទី 16 ខែកញ្ញា ឆ្នាំ 2020។
ហើយសម្រាប់ស្មាតហ្វូន Huawei ដំបូងដែលប្រកាសចេញដោយបានដំឡើងមកជាមួយ HarmonyOS2.0 ចេញពីប្រអប់ស្រាប់គឺ Huawei P50 Series និងបន្ទាប់មកគឺ Huawei Nova 9 Series ដែលទើបប្រកាសចេញថ្មីៗនេះ។ យើងទៅលើរបាយការណ៍របស់ Huawei ដែលបានចេញផ្សាយនាអំឡុងខែកញ្ញាកន្លងទៅថ្មីៗនេះបានឲ្យដឹងថា មានឧបករណ៍ចំនួនជាង 120 លានគ្រឿងហើយដែលបានធ្វើបច្ចុប្បន្នភាពផ្លូវការណ៍ឡើងមក HarmonyOS 2.0។
ក្រុមហ៊ុន Huawei បានរំពឹងថា ខ្លួនអាចមានលទ្ធភាពដាក់ឲ្យធ្វើបច្ចុប្បន្នប្រតិបត្តិការ HarmonyOS 2.0 ជាផ្លូវការណ៍នៅលើឧបករណ៍ទាំងរបស់ Huawei និង Honor ឲ្យបានចំនួន 300 លានគ្រឿងនៅមុនដំណាច់ឆ្នាំ 2021 នេះ៕
