កាលពីថ្ងៃទី ២៦ សីហា ២០១៤ ក្រុមហ៊ុន អាយគ្លីក (i-Qlick) ដែលជាភ្នាក់ងារចែកចាយផលិតផលសុទ្ធម៉ាក Canon ប្រចាំព្រះរាជាណាចក្រកម្ពុជា មានកិត្តិយសសហការជាមួយក្រសួងព័ត៌មានរៀបចំនូវវគ្គបណ្តុះបណ្តាលសមាជិកអ្នកសារព័ត៌មាន ក្រោមប្រធានបទ “បច្ចេកវិទ្យារូបភាព Canon និងការថតរូប” ដែលមានរយៈពេលពីរថ្ងៃចាប់ពីថ្ងៃទី ២៦ ដល់ ២៧ ខែសីហា នៅបរិវេណក្រសួងព័ត៌មាន ស្ថិតនៅអគារលេខ ៦៥ មហាវិថីព្រះមុនីវង្ស រាជធានីភ្នំពេញ ចាប់ពីវេលាម៉ោង ៨ ព្រឹក ដល់ម៉ោង ៥ល្ងាច។
សិក្ខាសាលានេះ ត្រូវបានចូលរួមពីសំនាកសមាជិកអ្នកសារព័ត៌មានល្បីៗជាង ១០០ នាក់ មកពីបណ្តាស្ថានីយ៍ ទូរទស្សន៍ កាសែត វិទ្យុល្បីៗឈានមុខ។ សិក្ខាសាលាបណ្តុះបណ្តាលនេះ ត្រូវបានចូលរួមបើកសម្ពោធជាកិត្តិយសដោយឯកឧត្តម ជា ចន្ទបរិបូរណ៍ ហើយនឹងប្រារព្ធពិធីបិទវគ្គនេះ នាថ្ងៃទី ២៧ សីហា វេលាម៉ោង ក្រោមអធិបតីភាពរបស់ ឯកឧត្តម ខៀវ កញ្ញរិទ្ធិ រដ្ឋមន្ត្រីក្រសួងព័ត៌មាន ដើម្បីប្រគល់វិញ្ញាប័នប័ត្រជូនដល់សិក្ខាកាមគ្រប់រូប។
សិក្ខាសាលានេះចែកចេញជាពីរផ្នែក ដោយផ្នែកទីមួយ នឹងបង្ហាញពីបច្ចេកវិទ្យារូបភាពរបស់ Canon ដែលជាផលិតផលរបស់ក្រុមហ៊ុនជប៉ុន ឈានមុខផ្នែកបច្ចេកវិទ្យារូបភាព ហើយអ្នកចូលរួមនឹងបានស្វែងយល់អំពីវិធីសាស្ត្រនៃបច្ចេកវិទ្យារូបភាព Canon ក្នុងការជួយដល់ការងារយកព័ត៌មានទាន់ហេតុការណ៍ ប្រកបដោយជំរើសរូបភាពល្អបំផុត។ ចំនែកឯផ្នែកទីពីរ វាលគ្មិននឹងបកស្រាយអំពីមូលដ្ឋានគ្រឹះនៃទ្រឹស្តីការថតរូប ព្រមទាំងបទពិសោធន៍ក្នុងការថតរូបបែបសារព័ត៌មាន។
វាលគ្មិនកិត្តិយសពិសេសក្នុងកម្មវិធីនេះ គឺលោកសាស្ត្រាចារ្យ ថៃ វណ្ណថា (Jerry Thai) ដែលជាសិល្បករថតរូបដ៏ជំនាញមួយរូប ធ្លាប់មានស្នាដៃជាច្រើនពិសេសក្នុងទស្សនាវដ្តីក្នុងស្រុកដូចជា ទស្សនាវដ្តី ឃីស ព្រីនសេសន៍ រ៉ូសន៍ និង ទស្សនាវដ្តីទេសចរណ៍។ លោកមានជំនាញផ្នែកថតរូបបែបបង្ហាញម៉ូត (Fashion) និង ថតរូបតារាម៉ូឌែល (Portrait) ជាមួយនិងជំនាញថតរូបបែបអាពាហ៍ពិពាហ៍ (Wedding) ព្រម ទាំងជំនាញកែសំរួលរូបភាពពីកុំព្យូទ័រ ប្រចាំថ្នាក់ថតរូប CIA ផងដែរ។ សិក្ខាសាលាបណ្តុះបណ្តាល “បច្ចេកវិទ្យារូបភាព Canon និងការថតរូប” សំរាប់អ្នកសារព័ត៌មានជាផ្នែកមួយនៃការជួយលើកស្ទួយនិងផ្សព្វផ្សាយវិស័យថតរូបនៅកម្ពុជារបស់ Canon ហើយត្រូវបានយក ចិត្តទុកដាក់ខ្ពស់លើផ្នែកសារព័ត៌នៅកម្ពុជាចាប់តាំងពីដើមខែមិថុនា ២០១៤ ថ្មីៗនេះ។ កាលពីថ្ងៃទី ១៣ ខែមិថុនា ២០១៤ សិក្ខាសាលា“បច្ចេកវិទ្យារូបភាព Canon និងការថតរូប” បានធ្វើឡើងក្នុងកម្មវិធីជួបជុំសមាជិកអ្នកថតរូប Canon នៅកម្ពុជា ដែលបានចូលរួមដោយបណ្តាអ្នកសារព័ត៌មាន និងនិពន្ធនាយករបស់កាសែតក្នុងស្រុកល្បីៗ ព្រមទាំងបានពិភាក្សាយ៉ាងស៊ីជំរៅអំពីការថតរូបបែបសារព័ត៌មាន។ ហើយឥឡូវនេះ នៅថ្នាក់សិក្សាពីការថតរូប CIA បានកំពុងដំណើរការរៀបចំវគ្គថតរូបបែបសារព័ត៌មានសំរាប់សិស្ស ឬមហាជនទូទៅដែលចង់សិក្សាយល់ដឹងពី តិចនិកថតរូបផ្នែកសារព័ត៌មាន។
កញ្ញា លីវិន តាន់ ដែលជានាយកផ្នែកទីផ្សារប្រចាំតំបន់ក្រុមហ៊ុន អាយគ្លីក បានមានប្រសាសន៍ថា“ ថ្ងៃនេះ ក្រុមហ៊ុនអាយគ្លីក មានកិត្តិយស ក្នុងការចូលរួមផ្តួចផ្តើមអភិវឌ្ឍន៍វិស័យសារព័ត៌មាន សូមប្រកាសនូវកម្មវិធីពិសេសមួយមានឈ្មោះថា “បុព្វសិទ្ធអ្នកសារព័ត៌មាន Canon” ដែលផ្តល់នូវការបញ្ចុះតំលៃពិសេសបំផុតសំរាប់គ្រប់អ្នកសារព័ត៌មានលើផលិតផលម៉ាក Canon រួមជាមួយការផ្តល់ជូនកាដូជាច្រើនដូចជាវគ្គសិក្សាថតរូបមូលដ្ឋាននៅ CIA ដែលនឹងបណ្តុះនូវជំនាញថតរូបបែបអាជីពប្រកបដោយជំនាញពិតប្រាកដ, ការធានាជូនយូរជាងមុន ៦ ខែ ដល់ទៅ ១៨ខែ និង ការសំអាត សិនសឺ CMOS របស់ កាម៉េរាដោយមិនគិតថ្លៃគ្រប់ពេល ក្នុងរយៈពេលធានា។