នៅទីបំផុត Lenovo បានបញ្ចេញទូរស័ព្ទហ្គេមជំនាន់ថ្មីជំនាន់ទី 2 របស់ខ្លួនជាផ្លូវការណ៍ហើយ នោះគឺ Lenovo Legion Duel 2។ ទូរស័ព្ទហ្គេមជំនាន់ទី 2 នេះគឺទទួលបានការឌីស្សាញរូបរាងឡើងបែបថ្មីខុសពីជំនាន់ Legion Duel ដែលចេញកាលពីខែកក្តដាឆ្នាំ 2020 រួមទាំងបំពាក់នូវមុខងារ និងបច្ចេកវិទ្យាថ្មីៗទំនើបចុងក្រោយ។
Lenovo Legion Duel 2 ត្រូវបានក្រុមហ៊ុនប្តូររចនាបថផ្ទៃខ្នងខាងក្រោយរបស់វាខុសពីជំនាន់មុនដោយ Lenovo បានប្រើនូវផ្ទៃកញ្ចក់រលោងទាំងអស់តែម្តង និងមានប្តូររចនាបថផ្នែកកណ្តាលបែបថ្មីជាកញ្ចក់ដែលមានរំលេចដោយភ្លើង RGB ដែលបង្ហាញពីប្រព័ន្ធកង្ហាលពីខាងក្នុង អក្សរ LEGION រួមនឹងប្រព័ន្ធកាមេរ៉ាថតរូប និងវីដេអូជាមួយអំពូល LED Flash មួយគ្រាប់។ Legion Duel 2 គឺនៅរក្សាកម្រាស់ 9.9mm ដូចជំនាន់មុខដដែល ប៉ុន្តែ កើនទំងន់ធ្ងន់ជាងមុនគឺឡើងដល់ 259 ក្រាម។
ហើយការឡើងទំងន់នេះគឺដោយសារតែ Lenovo បានបង្កើនទំហំអេក្រង់ពីទំហំ 6.65 អ៊ីញពីជំនាន់មុខឡើងមកដល់ 6.92 អ៊ីញ និងបង្កើនទំហំថ្មពី 5,000mAh ឡើងដល់ 5,500mAh។ យ៉ាងណាមិញបើទោះបីជាអេក្រង់របស់ Legion Duel 2 កើនទំហំធំជាងរៀមច្បងរបស់វាក៏ពិតមែន ប៉ុន្តែ វានៅតែរក្សាកម្រិតបង្ហាញត្រឹម Full-HD+ ទំហំ 1080x2460px ជាមួយកម្រិត refresh rate 144Hz គាំទ្រមុខងារបង្ហាញ HDR10+ និងមានកម្រិតពន្លឺ 1,300nits ដូចរៀមច្បង Legion Duel ដដែល។
ទៅលើមុខងារសម្រាប់បញ្ជាការលេងហ្គេមវិញ Legion Duel 2 មានបំពាក់នូវបច្ចេកវិទ្យារំញ័រថ្មី Two Haptics ដែលផ្តល់នូវកម្រិតរំញ័រខ្លាំងជាងមុន, Two Ultrasonic Shoulder Trigger ងាយស្រួលចុចបញ្ជាជាងមុន និងប៊ូតុងចុច Capacitive Keys ចំនួនពីរនៅលើផ្ទៃខាងខាងក្រោយនៃទូរស័ព្ទផងដែរ។ ស្មាតហ្វូនហ្គេមជំនាន់ថ្មីនេះប្រើប្រាស់រន្ធដោតសាកថ្មចំនួនពីរដូចមុនដដែលគឺ USB-C 3.1 ស្ថិតនៅលើគែមខាងក្រោម និង USB-C2.1 ស្ថិតនៅលើគែមខាងស្តាំ។ Legion Duel 2 ប្រើប្រាស់នូវកាមេរ៉ាសែលហ្វីប្រភេទ Pop-Up ស្ថិនៅលើគែមខាងស្តាំដូចរៀមច្បងរបស់វាដដែល ប៉ុន្តែ លើកនេះ Lenovo បានបង្កើនទំហំធំឡើងដល់ 44MP និងជាសែនស័រថ្មីរបស់ក្រុមហ៊ុន Samsung។ ទូរស័ព្ទហ្គេមជំនាន់ថ្មីនេះមាន ប្រព័ន្ធ Speaker បំពងសំឡេង Stereo ដែលផ្តល់នូវសំឡេងលាន់លឺខ្លាំងត្រូវចិត្តបំផុតសម្រាប់អ្នកដែលចូលចិត្តលេងហ្គេម ស្តាប់តន្ត្រី ទស្សនាវីដេអូ និងខ្សែភាពយន្ត។
សម្រាប់ប្រព័ន្ធកាមេរ៉ាថតរូប និងវីដេអូនៅលើ Legion Duel 2 គឺមានចំនួនពីរគ្រាប់ និងប្រើសែនស័រទំហំ 64MP (f/1.9) ជាលែនគោល និង 16MP (f/2.2) ជាលែន Ultra wide 123 ដឺក្រេ ដូចរៀមច្បង Legion Duel ដដែល និងមានអំពូលជំនួយពន្លឺមួយគ្រាប់ជាប្រភេទ Dual-LED flash។
ចំពោះកំលាំងម៉ាស៊ីនឯណេះវិញ Lenovo Legion Duel 2 បានដំឡើងមកជាមួយនូវកំពូលឈីប Snapdragon 888 5nm របស់ Qualcomm ភ្ជាប់ដោយរ៉េមបីជម្រើសគឺ 12GB/16GB និង 18GB ជាមួយអង្គផ្ទុកទិន្នន័យក្នុងម៉ាស៊ីនទំហំ 256GB ដល់ 512GB ប៉ុន្តែ គ្មានកន្លែងសម្រាប់ដាក់ម៉េមូរីបន្ថែមនោះទេ។ ជាមួយគ្នានេះនៅលើម៉ាស៊ីនរបស់ Legion Duel 2 មានដំឡើងនៅប្រព័ន្ធកង្ហាលត្រជាក់ជំនាន់ថ្មីចំនួនពីរ (Dual-Fan Cooling System) ដែលមានសមត្ថភាពជួយទប់ការឡើងកំដៅរបស់ម៉ាស៊ីនបានប្រសើរជាងជំនាន់មុនរហូតដល់ 30%។
ទូរស័ព្ទហ្គេមជំនាន់ទី 2 របស់ Lenovo នេះមានថ្មចំនួនពីរកូន (Dual-Cell) ដោយមួយកូនៗមានទំហំ 2,750mAh។ ហើយថ្មរបស់ Legion Duel 2 គាំទ្រកំលាំងសាកភ្លើងល្បឿនលឿនខ្លាំងដល់ 65W ខណៈដែលឆ្លាំងសាករបស់វាមានភ្ជាប់នូវមុខងារបង្កើនល្បឿនសាកភ្លើងឡើងដល់ 90W ដែលមានសមត្ថភាពសាកថ្ម 5,500mAh ពី 0% ដល់ 100% ប្រើពេលខ្ទង់ប្រមាណតែ 30 នាទីប៉ុណ្ណោះ។ ជាងនេះទៅទៀត Lenovo ក៏បានប្រើប្រាស់នូវបច្ចេកវិទ្យាការពារថ្មរបស់ទូរស័ទ្ទមិនអោយឡើងកំដៅខ្លាំង និងរក្សាល្បឿនសាកថ្មបានថេរល្អ ដើម្បីជួយរក្សាអាយុកាលរបស់ថ្មអោយប្រើប្រាស់បានយូរអង្វែង។ Lenovo Legion Duel 2 ត្រូវបានក្រុមហ៊ុនដំឡើងមកជាមួយនូវប្រតិបត្តិការ Lenovo ZUI12.5 ដែលគាំទ្រដោយ Android 11 ចេញពីប្រអប់។ ទូរស័ព្ទហ្គេមជំនាន់ថ្មីនេះមានជម្រើសពីរពណ៌គឺពណ៌ខ្មៅហៅថា Ultimate Black និងពណ៌សហៅថា Titanium White។
ក្រុមហ៊ុន Lenovo នឹងបញ្ចេញលក់ទូរស័ព្ទហ្គេមជំនាន់ទីពីររបស់ខ្លួននៅទីផ្សារប្រទេសចិននៅចុងខែមេសានេះ ខណៈទីផ្សារខាងប៉ែកអឺរ៉ុបគឺនឹងធ្វើឡើងនៅដើមខែក្រោយ (ខែឧសភា)។ សម្រាប់តម្លៃ Lenovo Legion Duel 2 ម៉ូដែល 12GB/256GB មានតម្លៃខ្ទង់ $951 និងម៉ូដែល 16GB/512GB មានតម្លៃខ្ទង់ $1,189 ជាមួយនឹងការបន្ថែមនូវឧបករណ៍ Bundled Charging Dock មួយផងដែរ ប៉ុន្តែសម្រាប់តម្លៃរបស់ម៉ូដែលមានរ៉េម 18GB គឺមិនទាន់ដឹងនៅឡើយទេ។ អីចឹងសរុបមក តើប្រិយមិត្តយល់ឃើញបែបណាដែរសម្រាប់ទូរស័ព្ទហ្គេមជំនាន់ថ្មីរបស់ Lenovo មួយនេះ តើតម្លៃ និងគុណសម្បត្តិដែលទូរស័ព្ទជំនាន់ថ្មីនេះមាន អាចប្រគូតប្រជែងទីផ្សារស្មាតហ្វូនហ្គេមបានដែរ ឬទេ៕
