ក្រុមហ៊ុន Turing Robotics Industries គឺជាក្រុមហ៊ុនផលិតទូរស័ព្ទស្មាតហ្វូនដែលដំណើរការដោយប្រព័ន្ធប្រតិបត្តិការ Sailfish OS និង Linux ដែលមានមូលដ្ឋានគ្រឹះនៅទីក្រុង សាន់ហ្វ្រាន់ស៊ីស្កូ ក្នុងរដ្ឋកាលីហ្វ័រញ៉ា សហរដ្ឋអាមេរិក។ ហើយកាលពីថ្មីៗនេះក្រុមហ៊ុនមួយនេះបានបង្ហាញចេញស្មាតហ្វូនស៊េរីថ្មីដ៏អស្ចារ្យមួយម៉ូដែលដែលមានគុណសម្បត្តិដ៏ខ្លាំងមហិមាគ្មានគូប្រៀបម៉ូដែល Turing Phone Cadenza។
យើងទាំងអស់គ្នាកម្រមានអ្នកស្គាល់នៃម៉ាកសញ្ញាស្មាតហ្វូនមួយនេះណាស់ ព្រោះថាវាមិនទាន់មានលក់ក្នុងទីផ្សារប្រទេសកម្ពុជាយើងនៅឡើយ។ ម្ល៉ោះហើយខណះពេលនេះ ខ្ញុំសូមបង្ហាញពីភាពអស្ចារ្យនៃស្មាតហ្វូនរបស់ក្រុមហ៊ុនមួយនេះឲ្យប្រិយមិត្តបានស្គាល់ និងជួយវាយតម្លៃគ្នាចំពោះស្មាតហ្វូនមួយនេះបន្តិចមើល។ Turing Phone Cadenza គឺស្មាតហ្វូនបែប High End មួយដែលមានការរចនារូបរាងបែបប្លែកទាក់ទាញភ្នែកមែនទែនតែម្តង។
ស្មាតហ្វូនដ៏អស្ចារ្យមួយនេះត្រូវបានក្រុមហ៊ុនធ្វើការបំពាក់ជាមួយកាមេរ៉ាថតរូបខាងក្រោយទំហំធំរហូតដល់ទៅ 60 មេហ្គាភិចសែលជាមួយបច្ចេកវិទ្យា iMAX6K ដោយប្រើកញ្ចក់កាមេរ៉ាបីជាន់ (Triple Lens) ហើយក៏មានកាមេរ៉ាខាងមុខចំនួនពីរទំហំ 20 មេហ្គាភិចសែលផងដែរ។ បើនិយាយដល់កំលាំងម៉ាស៊ីនរបស់វាវិញគឺអាចនិយាយបានថាគ្មានគូប្រៀបក្នុងពិភពស្មាតហ្វូនក្នុងលោកនេះ។
Turing Phone Cadenza ត្រូវបានក្រុមហ៊ុនបំពាក់ដោយបន្ទះឈីបរបស់ Qualcomm ស៊េរី Snapdragon 830s ចំនួនពីរដើមដែលមានអង្គគណនាប្រភេទ 16 Kryo Cores ជាមួយរ៉េមទំហំ 6GB ពីរដើមសរុបទៅស្មើរនឹង 12GB RAM និងជាពិសេសវាមានទំហំផ្ទុកក្នុងម៉ាស៊ីនស្រាប់រហូតដល់ទៅ 1000GB (1TB) ជាមួយម៉េមូរីម៉ាស៊ីនទំហំ 256GB ចំនួនពីរដើមព្រមទាំងមានរន្ធបន្ថែមម៉េមូរីកាតបាន 500GB ប្រភេទ microSD ទៀតផង។ ស្មាតហ្វូនដ៏មហិមាមួយនេះបំពាក់ដោយកញ្ចក់អេក្រង់ទំហំ 5.8” អាចបង្ហាញរូបភាពទំហំ 2560×1440px, មានថ្មខ្នាត 100Wh, អាចដាក់ស៊ីមកាតបាន 4 ស៊ីមទ្រទ្រង់បានជាមួយប្រព័ន្ធសេវា 4G LTE, VoLTE, WiGig, ដំណើរការជាមួយប្រតិបត្តិការ Swordfish OS មានមុខងារ “VoiceOn”, និងភ្ជាប់ដោយសោរសុវត្ថិភាព Retina scanner ឬ Fingerprint Scanner ជាដើម។
តាមប្រភពព័ត៌មានបានឲ្យដឹងថាកំពូលស្មាតហ្វូនដ៏មហិមាគ្មានគូប្រៀបមួយនេះនឹងបង្ហាញខ្លួននៅឆ្នាំ 2017 ឆ្នាំក្រោយនេះតែម្តង។ បើពិតមែននោះ តើមានក្រុមហ៊ុនណា អាចដណ្តើមតំណែងស្មាតហ្វូន Turing Phone Cadenza ដ៏ខ្លាំងមហិមានេះ បានទៅនៅឆ្នាំ 2017៕
