យន្តហោះ Drone ដ៏តូចច្រឡឹងស្រស់ស្អាតដែលត្រូវរចនាឡើងសម្រាប់ធ្វើការថតរូបភាព Selfies ចេញពីលើអាកាសនោះដែលមានឈ្មោះថា AirSelfie ពេលនេះ ត្រឡប់មកជាមួយនឹងការអាប់ឌែតជាច្រើនសម្រាប់ម៉ូដែលថ្មីរបស់ខ្លួន។ ថ្មីៗនេះ ក្រុមហ៊ុនទើបតែបង្ហាញជាផ្លូវការអំពីយន្តហោះ AirSelfie2 ដែលជាប្រភេទ Drone មានរូបរាងតូចដែលអាចដាក់តាមខ្លួនបាន ហើយវាមានការពង្រឹងទៅលើកម្រិតភាពច្បាស់នៃប្រព័ន្ធកាមេរ៉ារួមទាំងការបង្កើននូវទំហំផ្ទុក និងថាមពលថ្មថែមទៀត។ មុខងារស្នូលសំខាន់ៗរបស់យន្តហោះនេះគឺរក្សានៅដដែលមិនមានការផ្លាស់ប្តូរនោះទេ។
AirSelfie គឺជាឧបករណ៍បច្ចេកវិទ្យាថ្មីមួយនៅក្នុងចំណោមឧបករណ៍បច្ចេកវិទ្យាជាច្រើន ដែលអាចធ្វើការដោះស្រាយទៅលើបញ្ហាមួយដែលមិនទាន់កើតឡើងបាន។ ឧបករណ៍នេះមានទំហំប៉ុនស្មាតហ្វូនដែលមានការប្រើប្រាស់នូវស្លាបចំនួន ៤ ។ វាមានលក្ខណៈខុសប្លែកពីយន្តហោះរបស់ក្រុមហ៊ុន Parrot ឬ DJI ដោយសារតែយន្តហោះ AirSelfie2 គឺមានរូបរាងតូចជាង រូបរាងចតុកោណកែង ធ្វើពីអាលុយមីញ៉ូម និងការប្រើប្រាស់ស្លាបកង្ហារចំនួន 4 ថែមទៀត។
យន្តហោះដ៏ប្រណិតនេះបំពាក់នូវកាមេរ៉ាទំហំ 12-megapixel ដែលមានកម្រិតភាពច្បាស់ខ្ពស់ជាងម៉ូដែលជំនាន់មុនដែលមានកាមេរ៉ាត្រឹមតែ 5MP ប៉ុណ្ណោះ។ វាមានការប្រើប្រាស់ជាមួយនឹងម៉េមូរីទំហំ 16GB តាមរយៈការបន្ថែមនូវ microSD ដែលមានទំហំធំជាងមុនដល់ទៅ 4 ដងបើធៀបជាមួយនឹងម៉ូដែល AirSelfie នោះ។សម្រាប់ថាមពលថ្មរបស់យន្តហោះថ្មីនេះគឺធំជាងមុនដែលអាចធ្វើការបញ្ជាការហោះហើរបានរយៈពេលចាប់ពី 3 ទៅ 5 នាទីបាន។
យន្តហោះនេះអាចប្រើប្រាស់បានជាមួយនឹង Android ឬ iPhone ដែលអ្នកប្រើប្រាស់អាចធ្វើការបញ្ជាទៅលើយន្តហោះនេះនៅក្នុងចម្ងាយ 60ft សម្រាប់ប្រើប្រាស់ការថតរូបភាព Selfies ឬការថតវីដេអូកម្រិត 1080p នោះ។ យន្តហោះ AirSelfie2 ភ្ជាប់ជាមួយនឹងសមត្ថភាពខ្លាំងក្លាជាច្រើន ហើយវាក៏មានទំហំតូចងាយស្រួលយកតាមខ្លួនផងដែរ។ AirSelfie2 អាចរកទិញបាននៅក្នុងតម្លៃ $199.95 USD នៅលើ Amazon និង BestBuy ៕