Nokia 2.2 គឺជាស្មាតហ្វូនដំបូងបំផុតដែលបានធ្វើបច្ចុប្បន្នភាពទៅកាន់ប្រព័ន្ធប្រតិបត្តិការ Android 10 បន្ទាប់ពីក្រុមហ៊ុន HMD Global ធ្វើការកែប្រែទៅលើតារាងកាលវិភាគនៃការអាប់ដេតទៅលើ Android 10 របស់ខ្លួនកាលពីសប្តាហ៍មុននេះ។ ស្មាតហ្វូននេះ កាលពីដំបូង គ្រោងនឹងធ្វើការអាប់ដេតកាលពីដើមខែត្រីមាសនេះ ជាមួយនឹងស្មាតហ្វូនចំនួន 3 ទៀតប៉ុន្តែការធ្វើបច្ចុបន្នភាពស្មាតហ្វូននេះត្រូវបានពន្យារពេល។
ប្រព័ន្ធប្រតិបត្តិការ Android 10 នឹងនាំយកនូវមុខងារជាច្រើនសម្រាប់ស្មាតហ្វូន Nokia 2.2 ដូចជា System-Wide Dark Mode, Smart Replies, Family link for Digital Wellbeing និងការគ្រប់គ្រងទៅលើឯកជនភាពជាច្រើនទៀត។ ការធ្វើបច្ចុប្បន្នភាពនេះគឺមានការភ្ជាប់ជាមួយនឹង Patch សុវត្ថិភាពសម្រាប់ខែកុម្ភៈ ឆ្នាំ 2020 នេះ។ ស្មាតហ្វូននេះប្រកាសបង្ហាញខ្លួននៅក្នុងខែមិថុនា កាលពីឆ្នាំមុននេះ ហើយវាដំណើរការនូវប្រព័ន្ធប្រតិបត្តិការ Android 9 Pie ថែមទៀត។ ស្មាតហ្វូននេះអាចនឹងធ្វើការអាប់ដេត OS បានម្តងទៀតផងដែរ។
ស្មាតហ្វូន Nokia 2.2 នេះមានអេក្រង់ទំហំ 5.71-inch HD+ ជាមួយនឹងការឌីស្សាញ waterdrop notch។ ស្មាតហ្វូននេះប្រើប្រាស់នូវបន្ទះឈីប Helio A22 processor ជាមួយនឹងរ៉េមទំហំ 2GB ឬ 3GB និងម៉េមូរីទំហំ 16GB ឬ 32GB ថែមទៀត។ ស្មាតហ្វូននេះប្រើប្រាស់នូវកាមេរ៉ាខាងក្រោយទំហំ 13MP និងកាមេរ៉ាខាងមុខទំហំ 5MP selfie ថែមទៀត។ ស្មាតហ្វូននេះមិនមានប្រព័ន្ធស្កេនក្រយ៉ៅដៃនោះទេ ប៉ុន្តែវាមានប៊ូតុង Google Assistant ថែមទៀតផង។ ស្មាតហ្វូននេះគឺមានថាមពលថ្មទំហំ 3000mAh ៕
