អ្នកវិភាគល្បីឈ្មោះមួយរូបគឺលោក Ming-Chi Kuo បានគូសបង្ហាញថាទូរស័ព្ទ iPhone 2020 របស់ Apple នឹងបំពាក់នូវម៉ូឌុលកាមេរ៉ាមុខ TrueDepth តូចជាងមុនដែលជាលទ្ធផលនឹងធ្វើអោយក្បាលឆកអេក្រង់មានទំហំរួមតូចជាងមុនផងដែរ។ លោក Kuo បានពន្យល់ថាស្មាតហ្វូនដែលនឹងបំពាក់ម៉ូឌុលកាមេរ៉ាមុខតូចដូចនេះវានឹងធ្វើការកាត់បន្ថយទំហំ Notch សម្រាប់ដាក់វាអោយនៅតូចផងដែរ។ បន្ថែមពីនេះ មអ្នកវិភាគបានព្យាករណ៍ថា ការរចនាឡើងវិញនៃស្នាមឆកក្បាលអេក្រង់សម្រាប់ iPhone ជំនាន់ថ្មី 2020 គឺមិនមានអ្វីខុសឆ្ងាយពីការរចនាដែលបានប្រើនៅលើ iPhone X និង XS Max នោះទេ ប៉ុន្តែពួកគេមិនបានបង្ហាញពីលក្ខណះលម្អិតពីការផ្លាស់ប្តូរការរចនាថ្មីនោះនៅឡើយទេ។
ជាងនេះទៅទៀត iPhone 2020 ត្រូវបានគេរំពឹងថា នឹងមានការបង្កើនស្រទាប់លែនកាមេរ៉ាក្រោយឡើងដល់ 7 ស្រទាប់ (7P Lens System) ថែមទៀតផងដែលបច្ចុប្បន្នគឺមាន 6 ស្រទាប់។ លោក Ming-Chi Kuo ក៏បានធ្វើការទស្សន៍ទាយពីអនាគតនៃជំនាន់ទូរស័ព្ទ iPhone 2021 ផងដែរថានឹងមានការលុបបំបាត់ចោលទាំងស្រុងនៅស្នាមឆកអេក្រង់ហើយជំនូសមកវិញនៅអេក្រង់លាតពេញផ្ទៃតែម្តង ហើយ iPhone ដំបូងដែលមានអេក្រង់លាតពេញផ្ទៃនឹងត្រូវបង្ហាញវត្តមាននៅលរដូវស្លឹកឈើជ្រុះនាឆ្នាំ 2021។ ការលប់បំបាត់ឆកពីលើអេក្រង់ដែលនឹងកើតមានសម្រាប់ iPhone 2021 ត្រូវអ្នកវិភាគពន្យល់ថារាល់សែនស័រ និងកាមេរ៉ា TrueDepth នឹងត្រូវបានបង្កប់ក្រោមអេក្រង់ ឬក៏ Apple អាចប្តូរមកប្រើបច្ចេកវិទ្យាស្កែនក្រយ៉ៅម្រាមដៃក្រោមអេក្រង់វិញផងដែរ។
របាយការណ៍នេះស្របទៅនឹងរបាយការណ៍ថ្មីៗដែលបាននិយាយថាក្រុមហ៊ុន Apple គ្រោងចេញលក់ iPhone ដែលប្រើប្រាស់បច្ចេកវិទ្យាស្កែនក្រយ៉ៅម្រាមដៃក្រោមអេក្រង់ (Touch ID Under Display) ដើម្បីលក់ផ្តាច់មុខក្នុងទីផ្សារប្រទេសចិន ហើយ iPhone នោះនឹងមានតម្លៃធូរថ្លៃដើម្បីធ្វើការប្រកូតប្រជែងទីផ្សារជាមួយស្មាតហ្វូន Android ដែលមានតម្លៃខ្ទង់ប្រមាណជា CNY5,000 យ័ន ឬប្រហែល $750 អាមេរិកដែលជាតម្លៃសមរម្យមួយសម្រាប់ប្រជាជនចិន ហើយវាក៏ជាយុទ្ធសាស្ត្រតែមួយគត់ក្នុងការបង្កើនទីផ្សាររបស់ម៉ាក់ទូរស័ព្ទ iPhone ឡើងវិញនៅទីផ្សារប្រទេសកុម្មុនីសដែលមានឥទ្ធិពលសេដ្ឋកិច្ចខ្លាំងក្លាក្នុងតំបន់អាស៊ីមួយនេះ៕