ក្រុមហ៊ុន Samsung និង AMD បានធ្វើការជាមួយគ្នាក្នុងការអភិវឌ្ឍទៅលើក្រាហ្វិកកាត GPU ហើយក៏នឹងត្រៀមប្រកាសចេញជាផ្លូវការណ៍នៅចុងឆ្នាំនេះហើយ។ បើតាមដឹងនោះ គឺថា បន្ទះឈីបនេះ ស្ថិតនៅក្រោមបន្ទះឈីបត្រកូល Samsung Exynos ហើយនេះ គឺជាបន្ទះឈីបដ៏ខ្លាំងក្លាបំផុតរបស់ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះ។ នៅពេលនេះ របាយការណ៍ថ្មីចេញពី The Korean Economic Daily ថា ក្រុមហ៊ុន Samsung ក៏មានគម្រោងក្នុងការប្រកាសបង្ហាញនូវកុំព្យូទ័រយួរដៃថ្មីដែលប្រើប្រាស់នូវបន្ទះឈីបថ្មីផងដែរ។ ឈ្មោះរបស់បន្ទះឈីបនេះគឺជាបន្ទះឈីប Exynos 2200 ។
ក្រុមហ៊ុន Samsung បានបញ្ជាក់ថា បន្ទះឈីបថ្មីនេះ នឹងប្រើប្រាស់នៅលើស្មាតហ្វូន Flagship ជាច្រើនរួមជាមួយនឹងថេប្លេតជាច្រើនទៀតរបស់ខ្លួន។ នៅពេលនេះ ក៏មានពាក្យចចាមអារ៉ាមជាច្រើន បានទម្លាយថា Samsung ក៏នឹងប្រើប្រាស់នូវបន្ទះឈីបនេះ នៅលើកុំព្យូទ័រយួរដៃមួយដើម្បីប្រកួតប្រជែងជាមួយនឹងបន្ទះឈីប Apple M1។ ក្រុមហ៊ុន Samsung នឹងប្រកាសចេញនូវកុំព្យូទ័រយួរដៃដែលប្រើប្រាស់នូវប្រព័ន្ធប្រតិបត្តិការ Windows នៅក្នុងឆមាសទី 2 នៅឆ្នាំនេះ។ ក្រុមហ៊ុន Samsung ក៏ធ្លាប់ប្រកាសបង្ហាញនូវកុំព្យូទ័រ Galaxy Book S ដែលមានបន្ទះឈីប Snapdragon 8Cx chipset ផងដែរ។
សូមជំរាបថា នេះគឺជាលើកដំបូងដែលក្រុមហ៊ុន Samsung ប្រើប្រាស់នូវបន្ទះឈីបនៅលើកុំព្យូទ័រផង និងលើស្មាតហ្វូនផង។ មានការព្យាករណ៍ថា ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះ នឹងបង្ហាញនូវស្មាតហ្វូនដែលមានបន្ទះឈីប Exynos 2200 នៅក្នុងពេលនេះ ប៉ុន្តែបន្ទះឈីបនេះ អាចនឹងបង្ហាញខ្លួននៅលើស្មាតហ្វូន Galaxy S22 នៅឆ្នាំក្រោយនេះហើយ។ រហូតមកដល់ម៉ោងនេះ គឺនៅមិនទាន់មានការបញ្ជាក់អំពីបន្ទះឈីបថ្មីនៅឡើយទេ។ អ្នកតាមដាននានារំពឹងថា បន្ទឈីបនេះគឺនឹងមានព័ត៌មានជាច្រើនទៀតដែលនឹងទម្លាយនៅក្នុងរយៈពេលប៉ុន្មានសប្តាហ៍ខាងមុខនេះ៕