Nubia ដែលជាក្រុមហ៊ុនបុត្រសម្ព័ន្ធរបស់ ZTE បានត្រៀមប្រកាសចេញកំពូលស្មាតហ្វូនជំនាន់ថ្មី Red Magic 7 នៅប្រទេសចិនក្នុងពេលឆាប់ៗខាងមុខនេះ។ ហើយក្នុងពេលនេះស្មាតហ្វូនកំពូលជំនាន់ថ្មីនេះត្រូវបានស្ថាប័ន TENAA របស់ចិនបានធ្វើការបញ្ចេញគំរូឌីស្សាញរូបរាង រួមជាមួយគុណសម្បត្តិស្ទើរតែទាំងស្រុងផងដែរ។
បើតាមការឌីស្សាញរូបរាងក្នុងរូបភាពដែលបានបង្ហាញចេញនេះ ឃើញថា Red Magic 7 គឺមានការឌីស្សាញមិនសូវជាខុសគ្នាប៉ុន្មានពីជំនាន់មុននោះទេ ជាមួយផ្ទៃអេក្រង់លាតពេញផ្ទៃដែលបន្សល់នៅគែមលើក្រោមអេក្រង់បន្តិច។ បើតាមប្រភពបានឲ្យដឹងថា Red Magic 7 នឹងមានអេក្រង់ទំហំ 6.8 អ៊ីញ OLED Display ដូចនឹងជំនាន់មុនដដែល ហើយនិងគាំទ្របច្ចេកវិទ្យាស្កែនដោះសោរសុវត្ថិភាពក្រោមអេក្រង់ផងដែរ។ ហើយបន្ទះអេក្រង់របស់ Red Magic 7 ក៏នឹងនៅតែរក្សាការគាំទ្រកម្រិតបង្ហាញត្រឹម Full-HD+ ដូចមុនជាមួយល្បឿន refresh rate 165Hz។
នៅលើផ្ទៃខ្នងខាងក្រោយរបស់ Red Magic 7 យើងឃើញថាមានរំលេចដោយកញ្ចប់លែនទ្រវែងនៅចំកណ្តាលតួរជាមួយលែនកាមេរ៉ាចំនួន 3 គ្រាប់ និងអំពូល LED Flash មួយគ្រាប់។ ហើយនៅលើផ្នែកលើក្រោមមានរំលេចជាមួយរចនាស៊ុមបន្ទាត់ រួមជាមួយអក្សរ REDMAGIC នៅកណ្តាល និងនិមិត្តសញ្ញារបស់ Red Magic នៅពីក្រោម។ Red Magic 7 នឹងបំពាក់មកជាមួយបន្ទះឈីប Snapdragon 8 Gen 1 ដែលនឹងមានភ្ជាប់មកជាមួយរ៉េមជម្រើសទំហំ 8GB, 12GB ដល់ 16GB រួមនឹងម៉េមូរីក្នុងម៉ាស៊ីនទំហំ 128GB, 256GB ដល់ 512GB។
ស្មាតហ្វូនហ្គេមជំនាន់ថ្មីនេះ នឹងមានថ្មទំហំ 4,500mAh ហើយបើតាមការបញ្ជាក់នៅលើបញ្ចីស្ថាប័ន 3C កាលពីពេលថ្មីៗនេះបានបង្ហាញ Red Magic 7 គឺគាំទ្របច្ចេកវិទ្យាសាកភ្លើងល្បឿនកំលាំងខ្លាំងដល់ទៅ 165W ឯណោះ។ ហើយ Red Magic ក៏នឹងមានកាមេរ៉ាក្រោយដែលប្រើសែនស័រមេទំហំ 64MP និងដំណើរការលើ Red Magic UI ដែលគាំទ្រដោយ Android 12 ទៀតផង៕
