ក្រុមហ៊ុន Samsung ត្រូវគេរំពឹងថា នឹងមានប្រកាសចេញនូវផលិតផលជាច្រើននៅក្នុងព្រឹត្តិការណ៍ Unpacked នៅថ្ងៃទី 10 ខែកក្កដាខាងមុខនេះហើយ។ មានការរំពឹងថា នៅក្នុងព្រឹត្តិការណ៍នៃការសម្ពោធផលិតផលថ្មីនេះ សម្រាប់ Galaxy Watch 7 Series អាចនឹង មាន 3 ម៉ូដែល។ យោងតាមរបាយការណ៍ថ្មីមួយចេញពី AndroidHeadlines បានបញ្ជាក់ថា ក្រុមហ៊ុននេះ នឹងមានការបន្ថែមនូវម៉ូដែលមួយទៀតទៅលើស្មាតវ៉ចរបស់ក្រុមហ៊ុន Samsung នាពេលខាងមុខនេះ។
បើតាមរបាយការណ៌កន្លងមក បាននិយាយថា Watch 7 Series នឹងមាន 2 ម៉ូដែល រួមមានដូចជាស្មាតវ៉ច Galaxy Watch 7 និង Watch 7 Classic។ ដូច្នេះផ្អែកតាមការទម្លាយព័ត៌មាននៅពេលនេះ ក្រុមហ៊ុន Samsung អាចនឹងបង្ហាញនូវស្មាតវ៉ច Ultra ដែលនឹងមានឈ្មោះហៅថា Galaxy Watch Ultra ។ សូមជំរាបថា ស្មាតវ៉ចថ្មីម៉ូដែលនេះ ត្រូវបានប្រទះឃើញទម្លាយឈ្មផះនៅលើបញ្ជីរបស់ AndroidHeadlines រួចរាល់ហើយ។ ទាក់ទងនឹងព័ត៌នាបនេះ មានការលើកឡើងថា ក្នុងការប្រកាសបង្ហាញនូវស្មាតវ៉ច “Ultra” នៅពេលេនេះ ក្រុមហ៊ុន Samsung អាចនឹងដើរតាមក្រុមហ៊ុន Apple។
គួរបញ្ជាក់ថា ស្មាតវ៉ច Galaxy Watch Ultra នេះមាន 3 ម៉ូដែល ដោយស្មាតវ៉ចដែលមានលេខកូដ SM-L705U គឺសម្រាប់ដាក់លក់នៅលើទីផ្សារសហរដ្ឋអាមេរិក SM-L705N ខណៈដែលសម្រាប់ប្រទេសកូរ៉េ និងស្មាតវ៉ចដែលមានលេខកូដ SM-L705F សម្រាប់ទីផ្សារសកល។ ក្រៅពីព័ត៌មានលម្អិតនេះ នៅមិនទាន់មានការទម្លាយច្រើនអំពីស្មាតវ៉ចរបស់ក្រុមហ៊ុន Samsung នេះនៅឡើយទេ។
សូមជំរាបថា របាយការណ៍មុននេះ ធ្លាប់បានបញ្ជាក់ថា ក្រុមហ៊ុន Samsung អាចនឹងបង្កើនទៅលើទំហំម៉េមូរីខាងក្នុងរបស់ស្មាតវ៉ច Galaxy Watch 7 រហូតដល់ទៅ 32GB ។ ការបង្កើនទៅលើទំហំម៉េមូរីនេះ គឺដើម្បីងាយស្រួលក្នុងការផ្ទុកនូវ apps, watch faces និងការរក្សាទុកនូវតន្រ្តីនៅលើ playlists។ ស្មាតវ៉ច Galaxy Watch 7 series នឹងដំណើរការនៅលើ Wear OS 5 ផ្អែកនៅលើ Android 14។ ក្រៅពីស្មាតវ៉ចនេះ ក្រុមហ៊ុន Samsung ក៏មានពាក្យចចាមអារ៉ាមក្នុងការប្រកាសបង្ហាញនូវស្មាតហ្វូនបត់បានថ្មីនោះគឺ Galaxy Ring និង Galaxy Buds 3 នៅក្នុងព្រឹត្តិការណ៍ 2024 Unpacked ក្នុងខែកក្កដាខាងមុខនេះ៕