Apple ទំនងជាប្រកាសចេញឧបករណ៍អេក្រង់បត់ទំហំ 20.3-អ៊ីង ដំបូងរបស់ខ្លួននៅចុងឆ្នាំ 2025

យោងទៅលើរបាយការណ៍ដែលបានចេញផ្សាយនាពេលថ្មីៗនេះ បានបង្ហើបថា Apple ទំនងជានឹងមានការប្រកាសចេញឧបករណ៍អេក្រង់បត់ដំបូងរបស់ខ្លួនលឿនជាងការរំពឹងទុក។ បើតាមប្រភពបានបញ្ជាក់ថា ក្នុងពេលបច្ចុប្បន្ននេះ Apple បាននឹងកំពុងដំណើរការលើសង្វាក់ផលិតឧបករណ៍អេក្រង់បត់បានទំហំ 20.3-inch ដំបូងរបស់ខ្លួន។

តាមរបាយការណ៍ជាច្រើនដែលបានចេញផ្សាយនាពេលកន្លងមកបាននិយាយថា ផលិតផលអេក្រង់បត់ដំបូងរបស់ Apple នឹងបង្ហាញវត្តមាននៅចន្លោះឆ្នាំ 2026 និង 2027។ ដោយឡែកក្នុងវេលានេះ ក៏មានរបាយការណ៍ថ្មីចុងក្រោយមួយទៀតបានបញ្ជាក់ថា Apple នឹងមានការប្រកាសចេញផលិតផលអេក្រង់ដំបូងរបស់ខ្លួនលឿនជាងកាលវិភាគដែលបានគ្រោងទុក គឺអាចនឹងមុនដំណាច់ឆ្នាំ 2025។ ខណៈការប្រកាសចេញលក់អាចនឹងត្រូវធ្វើឡើងនៅចុងឆ្នាំ 2025 ឬនៅដើមឆ្នាំ 2026។

សម្រាប់ឧបករណ៍កូនកាត់ដំបូងរបស់ Apple នេះ ត្រូវបានគេដឹងថា ជាស្រឡាយផលិតផលថ្មីដាច់ដោយឡែកមួយទៀត ដែលវាមិនមានជាត្រកូល iPad ឬ MacBook ឡើយ។ ប៉ុន្តែ វាស្ថិតក្នុងស្រឡាយផលិតផលកម្រិតខ្ពស់ មានតម្លៃថ្លៃដូចគ្នា (ultra-premium market segment)។ ទន្ទឹងព័ត៌មានអំពីឧបករណ៍ថ្មីដែលបំពាក់អេក្រង់បត់ទំហំ 20.3-inch ទៅ Apple ត្រូវបានគេដឹងទៀតថា ក៏បាននឹងកំពុងធ្វើការលើទូរស័ព្ទ iPhone អេក្រង់បត់ ឬ Foldable iPhone ដែលមានអេក្រង់ពីរទំហំ គឺ 7.9-inch និង 8.3-inch ហើយ iPhone អេក្រង់បត់អាចចូលក្នុងសង្វាក់ផលិតកម្មទ្រង់ទ្រាយធំនៅមួយឆ្នាំបន្ទាប់ ឬនៅចុងឆ្នាំ 2026 បន្ទាប់ពី 20.3-inch Foldable Devices៕