យោងតាមរបាយការណ៌ថ្មីដែលចេញផ្សាយដោយ Huaweicentral នៅថ្ងៃនេះ បានបញ្ជាក់ ក្រុមហ៊ុន Apple បានបន្តបាត់បង់នូវចំណែកទីផ្សារនៃការលក់ iPhones នៅក្នុងប្រទេសចិន ដែលនៅត្រីមាសទី 1 ឆ្នាំ 2025 នេះ គឺមានការធ្លាក់ចុះដល់ទៅ 50% ខណៈពេលដែលក្រុមហ៊ុន Huawei នៅពេលនេះត្រូវបានគេមើលឃើញថា បានឡើងឈរនៅចំណាត់ថ្នាក់កំពូល។ របាយការណ៍ខាងលើបន្តថា ជាមួយនឹងលទ្ធផលធ្លាក់ចុះខ្លាំងបែបនេះ នឹងធ្វើអោយក្រុមហ៊ុននេះ អាចនឹងងាកទៅផ្លាស់ប្តូរផ្តោតទៅលើការលក់នៅក្នុងទីផ្សារនៃតំបន់ផ្សេងផងដែរ។ ហើយមួយរយៈនេះ ក្រុមហ៊ុនបច្ចេកវិទ្យាយក្សរបស់សហរដ្ឋអាមេរិកនេះ ក៏មានការខិតខំពង្រីកទីផ្សាររបស់ខ្លួនទៅកាន់ប្រទេសជាច្រើនទៀតផងដែរ។
តាមរយៈរបាយការណ៍ថ្មីនេះបានបង្ហាញថា ការលក់ Apple iPhones មានការធ្លាក់ចុះចំនួន 50% ដោយសារតែការប្រកួតប្រជែងដ៏ខ្លាំងពីក្រុមហ៊ុន Huawei និងក្រុមហ៊ុនម៉ាកយីហោជាច្រើនទៀតរបស់ចិនដូចជា Honor, Xiaomi និងជាច្រើនទៀត។ ក្រុមហ៊ុនផលិតស្មាតហ្វូន iPhone មើលឃើញនូវការធ្លាក់ចុះនៅក្នុងខែមីនា នៅឆ្នាំនេះ។ កាលពីឆ្នាំ 2024 កន្លងទៅនេះ ក្រុមហ៊ុនបច្ចេកវិទ្យាអាមេរិកនេះ បាននាំចេញស្មាតហ្វូន iPhone របសៈខ្លួនបានចំនួន 3.75 លានគ្រឿង ប្រៀបធៀនជាមួយត្រីមាសទី 1 ឆ្នាំ ក្រុមហ៊ុននេះ អាចលក់ស្មាតហ្វូនបានតែចំនួន 1.89 លានគ្រឿងប៉ុណ្ណោះ។
របាយការណ៌ខាងលើនេះ បង្ហាញទៀទថា សម្រាប់ក្រុមហ៊ុន Vivo, Xiaomi និង Oppo គឺឈរតាមពីក្រោយក្រុមហ៊ុន Huawei ។ ក្រុមហ៊ុន Apple ជាប់ចំណាត់ថ្នាក់លេខ 5 ។ ក្រុមហ៊ុន Huawei នៅតែឈរនៅចំណាត់ថ្នាក់កំពូលដោយសារតែក្រុមហ៊ុននេះ បានអភិវឌ្ឍទៅលើបន្ទះឈីប Kirin និង HarmonyOS NEXT ដែលមានបំពាក់នូវបច្ចេកវិទ្យា AI ជាច្រើន។
បច្ចុប្បន្ននេះក្រុមហ៊ុន Apple ក៏មានការលក់ចុះថ្លៃទៅលើស្មាតហ្វូន iPhone 16 series ដល់ទៅ 15% ដែលប្រហែលជា $346 ផងដែរនៅលើទីផ្សារប្រទេសចិន។ ប៉ុន្តែតម្លៃនេះ នៅតែថ្លៃបើធៀបជាមួយនឹងស្មាតហ្វូនជាច្រើនទៀតដែលបំពាក់នូវបច្ចេកវិទ្យា AI នោះ។ ដើម្បីឆ្លើយតបទៅនឹងការធ្លាក់ចុះនេះ ក្រុមហ៊ុន Apple ក៏មានគោលដៅក្នុងការផ្តោតទៅកាន់ប្រទេសឥណ្ឌាវិញផងដែរ៕
