ក្រុមហ៊ុន Toyota ជប៉ុន បានប្រកាសពីការផ្លាស់ប្តូរយុទ្ធសាស្ត្រក្នុងការផលិតរថយន្តម៉ូដែល Corolla របស់ខ្លួន។ ដោយក្រុមហ៊ុនផលិតរថយន្តប្រទេសជប៉ុនឈានមុខគេក្នុងពិភពលោកមួយនេះ បានបញ្ជាក់ថា ចាប់ពីឆ្នាំនេះទៅ ឡាន Corolla នឹងមានតែម៉ូដែលកូនកាត់ ឬហៅថា Hybrid ប៉ុណ្ណោះ។ តាមការបញ្ជាក់ពី Toyota ការដែលបញ្ឈប់ផលិតរថយន្ត Corolla ដែលដំណើរការដោយម៉ាស៊ីនចំហេះក្នុង ឬ ICE សម្រាប់ទីផ្សារប្រទេសជប៉ុន គឺជាផ្នែកមួយដើម្បីកាត់បន្ថយសារធាតុឧស្ម័នពុលទៅក្នុងបរិយាកាស ឬ Carbon neutrality។
កាលពីឆ្នាំ 2022 ក្រុមហ៊ុន Toyota ក៏បានបញ្ឈប់ការផលិត និងចេញលក់រថយន្តម៉ាក Corolla ដែលប្រើម៉ាស៊ីនចំហេះក្នុងនៅទីផ្សារខាងប៉ែកអឺរ៉ុបផងដែរ ដោយក្រុមហ៊ុនបានផ្តល់នូវជម្រើសដល់អតិថិជនសម្រាប់ម៉ូដែល Corolla ដែលប្រើម៉ាស៊ីន Hybrid 1.8-liter និង 2.0-liter។ Corolla បំពាក់ម៉ាស៊ីន 1.8-liter gasoline engine ដែលដំណើរការជាមួយប្រព័ន្ធ Hybrid អាចផលិតកំលាំងបាន 97 សេះ និងកំលាំងរមូល 98PS ដំណើរការដោយប៉ុងមួយ ឬ Front-wheel-drive ភ្ជាប់ដំណើរការជាមួយម៉ូទ័រអគ្គិសនីមួយដែលមានកំលាំង 95 សេះ និងកំលាំងរមូល 95PS។
ចំនែកម៉ូដែលដំណើរការដោយប៉ុងពីរ ឬ All-wheel-drive (E-Four) បានបន្ថែមម៉ូទ័រអគ្គិសនីកំលាំង 40 សេះ និងកំលាំងរមូល 41PS នៅខាងក្រោយមួយទៀត។ Toyota Corolla ស៊េរីថ្មីចុងក្រោយដែលកំពុងមានវត្តមានលក់នៅលើទីផ្សារបច្ចុប្បន្ន មានបំពាក់នូវបច្ចេកវិទ្យាប្រើប្រាស់ទំនើបៗចុងក្រោយបង្អស់ដូចជា បំពាក់ប្រព័ន្ធកាមេរ៉ាមុខក្រោយអាចថតសកម្មភាពបាន, ប្រើប្រព័ន្ធសោរ Smart key ឬ digital key រួមជាមួយមុខងារជំនួយការបើកបរដូចជា មុខងារផ្តល់សញ្ញាគ្រោះថ្នាក់មកពីក្រោយ ឬចំហៀង Blind Spot Monitor, Safe Exit Assist, និងប្រព័ន្ធហ្វ្រាំងជំនួយចូលចំណោតជាដើម Parking Support Brake។
សម្រាប់តម្លៃម៉ូដែល Corolla Hybrid X គឺខ្ទង់ $15,700 និងម៉ូដែល Corolla Touring Active Sport Hybrid E-Four special edition មានតម្លៃខ្ទង់ $23,500។ ក្រុមហ៊ុន Toyota នឹងមានការប្រកាសចេញរថយន្ត Corolla ជំនាន់ថ្មី នៅឆ្នាំ 2026 ជាមួយម៉ូដែល Hybrid ដែលមានការកែប្រែការឌីស្សាញបែបថ្មីកាន់តែប្រណិត កាន់តែទំនើបទាន់សម័យ និងបំពាក់នូវបច្ចេកវិទ្យាប្រើប្រាស់កម្រិតខ្ពស់។ ទោះជាយ៉ាងណាសម្រាប់ព័ត៌មានផ្សេងៗទាក់ទងនឹង Corolla ជំនាន់ថ្មីឆ្នាំ 2026 មិនទាន់ត្រូវបានទម្លាយចេញនៅឡើយទេ៕
