ឡានម៉ាក Audi ដែលជាម៉ូដែលទីពីរ ឬ Second generation ដែលផលិតឡើងដោយក្រុមហ៊ុនវិនិយោគរួមគ្នារវាងក្រុមហ៊ុនផលិតរថយន្តអាល្លឺម៉ង Audi និងក្រុមហ៊ុនចិន SAIC Group ត្រូវបានគេប្រទះឃើញបើកបរសាកល្បងនៅលើដងវិថីមួយក្នុងប្រទេសចិន។ ហើយអ្វីដែលទាញការចាប់អារម្មសម្រាប់គំរូរថយន្ត Audi ជំនាន់ថ្មីនេះ គឺជាការបំពាក់នៅសែនស័រកាមេរ៉ា Face-ID នៅលើសសរគ្រោងឆ្អឹងទ្វារ ជាមួយនឹងការឌីស្សាញដៃទ្វារលាក់ចូលក្នុង ឬហៅថា hidden-door handle។ រថយន្ត Crossover ស៊េរីថ្មីរបស់ Audi នេះ ត្រូវបានគេព្យាករណ៍ថា នឹងមានវត្តមាននៅទីផ្សារប្រទេសចិនក្នុងឆ្នាំ 2026 ហើយក៏ជាម៉ូដែលទីពីរបន្ទាប់ពី E5 Sportback ដែលកំពុងមានវត្តមាននៅលើទីផ្សាររួចហើយ។
ក្រុមហ៊ុន Audi បានចាប់ដៃជាមួយ SAIC ក្នុងខែវិច្ឆិកា ឆ្នាំ 2024 ហើយរថយន្ត Audi ដំបងដែលកើតចេញពីការបណ្តាក់ទុនរួមគ្នានេះ គឺជាម៉ូដែល E5 Sportback ដែលបានប្រកាសចេញផ្លូវការណ៍នៅទីផ្សារប្រទេសចិននៅថ្ងៃទី 16 ខែកញ្ញា ឆ្នាំ 2025។ Audi E5 Sportback បំពាក់នូវប្រព័ន្ធម៉ូទ័រអគ្គិសនីពីរជម្រើស គឺម៉ូទ័រមួយ ឬប៉ុងមួយមានកម្លាំង 299 សេះ ឬ 408 សេះ និងម៉ូទ័រពីរ ឬប៉ុងពីរមានកម្លាំង 525 សេះ ឬ 787 សេះ ហើយនិងមានតម្លៃចាប់ពីខ្ទង់ $33,130 ឡើងទៅ។
កន្លងមកក្រុមហ៊ុន Audi បានប្រកាសពីគម្រោងការក្នុងការប្រកាសចេញរថយន្តថ្មីចំនួន 3 ម៉ូដែលទៀតត្រឹមឆ្នាំ2027 ហើយសម្រាប់រថយន្តម៉ូដែលថ្មីទីពីរដែលគេប្រទះឃើញពេលនេះ ត្រូវបានគេរំពឹងថា នឹងប្រកាសចេញនៅទីផ្សារប្រទេសចិនក្នុងឆ្នាំ 2026។
តាមរូបភាពបង្ហាញឲ្យឃើញថា Audi Crossover SUV ជំនាន់ទីពីររបស់ Audi និង SAIC មានការឌីស្សាញថ្មីខុសពីគំរូដែលធ្លាប់ត្រូវបានគេប្រទះឃើញកាលពីខែកក្តដា។ ដោយគំរូថ្មីនេះ ឃើញមានបំពាក់កញ្ចក់មើលក្រោយប្រភេទកញ្ចក់ក្តោបធម្មតា ដៃទ្វារលាក់ retractable door handles យ៉ាន់កង់ប្រាំបីកាំ កន្លែងសាកភ្លើងនៅលើត្រគៀកខាងឆ្វេង ដំបូលក្រោយមានភ្ជាប់ជាមួយ Spoiler កាមេរ៉ាចាប់សកម្មភាពនៅលើថ្នាល់ខាងមុខ និងប្រព័ន្ធភ្លើងជុំវិញគូទខាងក្រោយជាដើម។
ចំនែកដំបូលដែលរចនាបែបជម្រៀលក្រោយ និងគ្រោងឆ្អឹងទ្វារ គឺមានពណ៌ខ្មៅ ហើយអ្វីដែលទាក់ទាញការចាប់អារម្ម គឺនៅលើឆ្អឹងទ្វារឃើញមានបង្កប់នូវសែលស័រកាមេរ៉ា Face-ID ថែមទៀតផង ដែលនេះសបញ្ជាក់ថា កាមេរ៉ានេះ នឹងប្រើសម្រាប់ស្កែនសំគាល់ម្ចាស់ក្នុងការដោះសោរទ្វារ។
រថយន្ត Audi Crossover SUV ថ្មីនេះ នឹងមានប្រវែង 5 ម៉ែត្រ មានភ្ជាប់មកជាមួយប្រព័ន្ធ Advanced Digitized Platform (ADP) និងគាំទ្រប្រព័ន្ធសាកភ្លើងកម្រិត 800V high-voltage system។ ទោះជាយ៉ាងណាសម្រាប់គុណសម្បត្តិលម្អិតផ្សេងៗទៀត ដូចជាប្រព័ន្ធ Powertrain ជាដើមមិនទាន់ដឹងនៅឡើយទេ។ ប៉ុន្តែ មានការព្យាករណ៍ថា Audi ជំនាន់ទីពីរនេះ អាចនឹងមានេះជម្រើសកម្លាំងដូចគ្នានឹងម៉ូដែល E5 Sportback ដែរ គឺមានជាម្រើសម៉ូដែលចាប់ពីកម្លាំង 295 សេះ ដល់ 776 សេះ៕
