iPhone 18 Series នឹងមានសមត្ថភាពកាន់តែខ្លាំង ព្រោះថា Apple នឹងប្រើប្រាស់បន្ទះឈីបថ្មី

បន្ទាប់ពីទទួលបាននូវលទ្ធផលនៃការលក់ទៅលើស្មាតហ្វូន iPhone 17 Series មានសន្ទុះខ្លាំងក្លារួចមកនៅពេលនេះក្រុមហ៊ុន Apple បានផ្តើមការផ្តោតរបស់ខ្លួនទៅលើស្មាតហ្វូន Flagships ឆ្នាំ 2026 វិញម្តង។ក្រុមហ៊ុនបច្ចេកវិទ្យាអាមេរិកាំងមួយនេះត្រូវបានគេរាយការណ៍ថាបាននឹងកំពុងតែធ្វើការនៅលើការឌីស្សាញគំរូនៃបន្ទះឈីបថ្មី A20 Pro ដើម្បីបង្កើនទៅលើសមត្ថភាពដ៏ខ្លាំងក្លានៃស្មាតហ្វូន iPhone 18 Series ថែមទៀតហើយ។

បើតាមពាក្យចចាមអារ៉ាមជាច្រើនបានបញ្ជាក់ថាបន្ទះឈីប Apple A20 Pro កំពុងតែត្រូវបានផលិតហើយដំណើរការនៃការឌីស្សាញទៅលើបន្ទះឈីបថ្មីនេះគឺសម្រាប់ប្រើប្រាស់ទៅលើស្មាតហ្វូន iPhone 18 ។នៅក្នុងដំណើរការនៃការផលិតទៅលើបន្ទះឈីបថ្មីនេះគឺមានផ្គត់ផ្គង់ដោយក្រុមហ៊ុន TSMC ហើយនិងមានការប្រើប្រាស់នូវរចនាសម្ព័ន្ធNanoFLEX transistor architecture ។សម្រាប់ NanoFlex នេះគឺជាការបង្កើននូវ multiple-transistor nanosheets នៅលើបន្ទះឈីបដូចគ្នា។

ជាមួយនិងការប្រើប្រាស់នូវបច្ចេកវិទ្យាថ្មីនៅលើឈីបនេះគឺអាចនឹងធ្វើការបង្កើននូវកម្លាំងម៉ាស៊ីនកាន់តែខ្លាំងក្លានិងការប្រើប្រាស់ថាមពលថ្មកាន់តែតិចជាងមុនថែមទៀត។បច្ចេកវិទ្យាខាងលើនេះគឺមិនត្រឹមតែអាចផលិតបន្ទះឈីប A20 Pro នៅក្នុងកម្រិត 2nm បាននោះទេថែមទាំងបង្កើនទៅលើកម្លាំងម៉ាស៊ីនរបស់ស្មាតហ្វូន iPhone 18 series កើនឡើងជាងមុនដល់ទៅ 10% ទៀតផង។ក្រៅពីនេះឈីបនេះក៏មានការកាត់បន្ថយទៅលើការប្រើប្រាស់ថាមពលដល់ទៅ 20% ថែមទៀត។

ក្រៅពីបច្ចេកវិទ្យានេះក្រុមហ៊ុន Apple មានពាក្យចចាមអារ៉ាមថានឹងប្រើប្រាស់នូវបច្ចេកវិទ្យា WMCM packaging technology របស់ក្រុមហ៊ុន TSMC។សម្រាប់ WMCM គឺមានពាក្យពេញថា Wafer-level Multi-Chip Module ដែលបច្ចេកវិទ្យានេះមានការពង្រឹងទៅលើ memory bandwidth ។បន្ទះឈីប A20 Pro នេះនឹងមានការពង្រឹងទៅលើការបំភាយកំដៅបានដល់ទៅ 20% និងការបង្កើនថាមពលថ្មដល់ទៅ 10%-15%។សម្រាប់បន្ទះឈីប A20 នៅលើស្មាតហ្វូន iPhone 18 នេះអាចនឹងមានតម្លៃ $280 បើធៀបជាមួយនឹងបន្ទះឈីប A18 គឺមានតម្លៃត្រឹមតែ $45 ប៉ុណ្ណោះ៕