ប្លែកខ្លាំង! Mercedes ចេញឡាន Hybrid ថ្មី តែអត់ប្រើម៉ាស៊ីនខ្លួនឯង ទៅប្រើម៉ាស៊ីនពីចិនវិញ!

នេះគឺជាឡាន Mercedes-Benz CLA Hybrid ស៊េរីឆ្នាំ 2026 ថ្មី ដែលទើបតែបានបង្ហាញខ្លួនជាផ្លូវការ សម្រាប់ទីផ្សារបរទេស ប៉ុន្តែវាមិនបានប្រើម៉ាស៊ីនពីក្រុមហ៊ុន Mercedes នោះទេ ផ្ទុយទៅវិញ វាបានប្រើម៉ាស៊ីនពីចិន។

ឡាន Mercedes-Benz CLA 220 Hybrid ថ្មីនេះ បំពាក់ម៉ាស៊ីនចំណុះ 1.5L Turbo ទំហំ 4 ស៊ីឡាំង ដែលផលិតនៅក្នុងប្រទេសចិន ដោយក្រុមហ៊ុនចិន Geely អាចបង្កើតកម្លាំងបាន 208 HP និង កម្លាំងរមួល 380 NM អនុញ្ញាតឲ្យវាអាចរត់ស្ទុះពីកុងទ័រ 0-100 KM/H ប្រើពេល 7.1 វិនាទី ហើយមានល្បឿន Top Speed 209 KM/H។ វាក៏មានបំពាក់កញ្ចប់អាគុយលីចូម 48 វ៉ុល ទំហំ 1.3 kWh ដែលអាចឲ្យវាដំណើរការដោយថាមពលអគ្គិសនីសុទ្ធ ដល់ល្បឿន 96 KM/H។

យ៉ាងណាក៏ដោយ Mercedes-Benz CLA 220 Hybrid នេះ នៅតែជាឡានដែលមានបំពាក់ Option ទំនើបច្រើន ដូចជា ដំបូលកញ្ចក់មួយផ្ទាំងធំ Panoramic Glass Roof, អេក្រង់ខ្នាតយក្ស Mercedes-Benz Superscreen ដោយក្នុងនោះមាន កុងទ័រឌីជីថល ទំហំ 10.25 អ៊ីញ, អេក្រង់កម្សាន្ត ទំហំ 14 អ៊ីញ និង អេក្រង់សម្រាប់អ្នកដំណើរខាងមុខ ទំហំ 14 អ៊ីញ ផងដែរ។

​មិនតែប៉ុណ្ណោះ CLA 220 Hybrid ក៏បានបំពាក់នូវដៃចង្កូតរចនាថ្មី ដំបូងគេបង្អស់ដែរ នៅក្នុងត្រកូល CLA។ ទោះបីជាយ៉ាងណាក៏ដោយ លក្ខណៈពិសេស និង Option ទំនើបៗមួយចំនួនទៀត គឺមិនត្រូវបានផ្លាស់ប្តូរនោះទេ៕