ស្មាតហ្វូនស៊េរីថ្មី Xiaomi 17 Ultra នឹងបង្ហាញខ្លួនជាផ្លូវការនៅខែក្រោយនេះហើយ!

ផ្អែកតាមព័ត៌មានថ្មីនៅថ្ងៃនេះ បានបង្ហើបថា ស្មាតហ្វូនស៊េរីថ្មី Xiaomi 17 Ultra នឹងប្រកាសបង្ហាញខ្លួននៅសប្តាហ៍ក្រោយនេះ ហើយ។ ស្មាតហ្វូននេះ ត្រូវបានចាត់ទុកថាជាស្មាតហ្វូនប្រណិតរបស់ក្រុមហ៊ុន Xiaomi ដែលមានកិច្ចសហការរយៈពេលវែងជាមួយនឹងក្រុមហ៊ុន Leica ហើយក៏ជាស្មាតហ្វូន Flagship មួយ ដែលនឹងមានការផ្លាស់ប្តូរជាច្រើន គួរអោយទាក់ទាញទៀតផង ជាពិសេសទៅលើផ្នែកកាមេរ៉ា និងសមាសភាគផលិតតែម្តង។

លោក Lei Jun ដែលជាស្ថាបនិក និងជាអគ្គនាយក ក៏ដូចជានាយកប្រតិបត្តិរបស់ក្រុមហ៊ុន Xiaomi ទើបតែបញ្ជាក់ថា ស្មាតហ្វូន Xiaomi 17 Ultra នឹងមានប្រកាសជាផ្លូវការនៅខែសប្តាហ៍ក្រោយនេះ នៅក្នុងប្រទេសចិន។ ជាមួយនឹងការបញ្ជាក់អំពីការប្រកាសជាផ្លូវការនេះ ក្រុមហ៊ុន Xiaomi ក៏នឹងមានការប្រកាសអំពីការ upgrade ទៅលើបច្ចេកវិទ្យាកាមេរ៉ារបស់ខ្លួនដែលជាកិច្ចសហការជាមួយនឹងក្រុមហ៊ុន Leica ផងដែរ។ កិច្ចសហការនេះ មានឈ្មោះថា “strategic co-creation” ដែលមិនត្រឹមតែផ្តោតទៅលើការឌីស្សាញនោះទេ ប៉ុន្តែក៏មានការពង្រឹងទៅលើបច្ចេកវិទ្យាកាមេរ៉ាកាន់តែអស្ចារ្យមួយកម្រិតទៀតផង។

ក្រុមហ៊ុន Xiaomi ក៏បានបង្ហាញនូវប្រព័ន្ធ Optical System ថ្មីរបស់ខ្លួនសម្រាប់ប្រើប្រាស់នៅលើស្មាតហ្វូនផងដែរ។ ប្រព័ន្ធនេះ គឺជា Leica APO-certified telephoto lens ដំបូងបំផុត ដែលត្រូវបានឌីស្សាញឡើងដើម្បីពង្រឹងទៅលើពណ៌កាន់តែច្បាស់ និងរូបភាពកាន់តែស្រស់ស្អាត។ ស្មាតហ្វូនជំនាន់ថ្មី Xiaomi 17 Ultra នេះ នឹងមានអេក្រង់ឌីស្សាញ Flat Display ជាមួយនឹងកម្រិតភាពច្បាស់ 2K។ បន្ថែមពីនេះ ស្មាតហ្វូននេះដំនើរការនូវ Snapdragon 8 Elite Gen 5 និងថាមពលថ្មទំហំ 7,000mAh ផងដែរ។

សម្រាប់បច្ចេកវិទ្យាសាកថ្មរបស់ស្មាតហ្វូនថ្មីនេះ គឺ 100W wired និង 50W wireless fast charging។ ស្មាតហ្វូននេះនឹងទ្រទ្រង់ទៅលើសិនស័រស្កែន Ultrasonic និងបច្ចេកវិទ្យា IP68 សម្រាប់ការពារទឹក និងធូលីជាដើម។ ស្មាតហ្វូននេះមានកាមេរ៉ា 3 គ្រាប់ដែលមានទំហំ 50MP OV50X 1 អ៊ីង HDR, 50MP Ultra-Wide ជាមួយនឹង Macro និង 200MP Periscope Telephoto 5x Optical Zoom ផងដែរ។ ក្រុមហ៊ុន Xiaomi អាចនឹងប្រកាសចេញនូវផលិតផលថ្មីនោះគឺ NAS របស់ខ្លួនផងដែរជាមួយនឹងស្មាតហ្វូន Xiaomi 17 Ultra. នាពេលខាងមុខ៕