ការបង្ហាញខ្លួន Xiaomi 17 Ultra នៅលើទីផ្សារសកលកាន់តែខិតជិតមកដល់ហើយ

មកដល់ថ្ងៃនេះ ក្រុមហ៊ុន Xiaomi បានត្រៀមខ្លួនក្នុងការពង្រីកទៅលើស្មាតហ្វូន Flagship របស់ខ្លួន តាមរយៈការប្រកាសចេញស្មាតហ្វូនជំនាន់ថ្មី Xiaomi 17 Ultra ដែលជាម៉ូដែល Top-End របស់ខ្លួន។ សូមជំរាបថា ស្មាតហ្វូនជំនាន់ថ្មី Xiaomi 17 Series បានបង្ហាញខ្លួននៅក្នុងប្រទេសចិន កាលពីខែកញ្ញាឆ្នាំ 2025 ជាមួយនឹងជម្រើស 3 ម៉ូដែលរួមមាន Xiaomi 17, Xiaomi 17 Pro និង Xiaomi 17 Pro Max ខណៈដែលស្មាតហ្វូន Xiaomi 17 Ultra ថ្មីនេះ នឹងក្លាយជាស្មាតហ្វូនប្រណិតបំផុតរបស់ក្រុមហ៊ុននេះ។

នៅថ្ងៃនេះ ក្រុមហ៊ុន Xiaomi បញ្ជាក់ថា ស្មាតហ្វូន Xiaomi 17 Ultra នឹងបង្ហាញខ្លួននៅក្នុងប្រទេសចិន នៅសប្តាហ៍ក្រោយនេះហើយ។ សម្រាប់ការប្រកាសនៅទីផ្សារសកល ក៏មិនយូរទៀតដែរ។ ពេលនេះ ស្មាតហ្វូនជំនាន់ថ្មី Xiaomi 17 Ultra ត្រូវបានគេមើលឃើញថា បានបង្ហាញខ្លួននៅលើវិញ្ញាបនបត្រ FCC របស់សហរដ្ឋអាមេរិកដូចគ្នា។ នៅក្នុងវិញ្ញាបនបត្រ FCC នេះ បានបញ្ជាក់ថា ស្មាតហ្វូនថ្មីនេះ នឹងដំណើរការនូវ HyperOS 3 ហើយនិងមានការទ្រទ្រង់ទៅលើ 5G , WiFi 7 ដោយផ្អែកទៅលើស្តង់ដារ 802.11be និង Bluetooth Low Energy ផងដែរ។

នៅក្នុងបញ្ជី FCC នេះ បានបន្ថែមថា សម្រាប់ស្មាតហ្វូនដែលនឹងលក់នៅលើទីផ្សារចិនរបស់ Xiaomi 17 Ultra គឺមានលេខកូដ  2512BPNDAC ហើយក៏ទទួលបាននូវការអនុម័តចេញពី3C របស់ចិនផងដែរ។ សម្រាប់ម៉ូដែលលក់នលើទីផ្សារសកលវិញគឺមានលេខកូដ 2512BPNDAG ហើយក៏មានការបង្ហាញខ្លួននៅលើ IMEI Database ដូចគ្នា។ ក្រុមហ៊ុន Xiaomi នៅមិនទាន់បានទម្លាយអំពីកាលបរិច្ឆេទនៃការប្រកាសជាផ្លូវការនៅឡើយទេ តែប្រសិនបើស្មាតហ្វូននេះ ប្រកាសនៅចិននៅសប្តាហ៍ក្រោយនេះ ការប្រកាសនៅទីផ្សារសកលប្រហែលជានៅខែមករា ឆ្នាំ 2026។

សម្រាប់លក្ខណៈសម្បត្តិជាច្រើនទៀតរបស់ស្មាតហ្វូននេះ មិនទាន់បានទម្លាយនៅឡើយទេ ប៉ុន្តែស្មាតហ្វូន Xiaomi 17 Ultra នេះនឹងប្រើប្រាស់នូវបន្ទះឈីប Snapdragon 8 Elite Gen 5 និងថាមពលថ្មប្រហែលជា 7,000mAh។ ស្មាតហ្វូន Xiaomi 17 Ultra នេះ នឹងបំពាក់នូវកាមេរ៉ា Leica និងគាំទ្រដោយសិនស័រ 1-អ៊ីងកាមេរ៉ាទំហំ 50MP OV50X របស់ក្រុមហ៊ុន OmniVision ដែលពង្រឹងទៅលើបច្ចេកវិទ្យា HDR ផងដែរ។ នៅក្នុងនោះ ក៏មានកាមេរ៉ា 50MP ultra-wide ជាមួយនឹង Macro និង 200MP periscope telephoto ដែលមានកម្រិត 5x optical zoom ផងដែរ៕