តាមទិន្នន័យលក់រថយន្តរបស់ក្រុមហ៊ុន BYD បានបង្ហាញថា ក្នុងខែធ្នូ ឆ្នាំ 2025 ទើបកន្លងផុតទៅ ក្រុមហ៊ុន BYD លក់រថយន្តដឹកអ្នកដំណើរនៅទូទាំងទីផ្សារសកលបានចំនួន 414,784 គ្រឿង ធ្លាក់ចុះ 18.6% ធៀបនឹងខែដូចគ្នាកាលពីឆ្នាំ 2024 និងធ្លាក់ចុះ 12.7% ធៀបនឹងខែវិច្ឆិកា ឆ្នាំ 2025។ ដែលទិន្នន័យនេះបង្ហាញពីការធ្លាក់ចុះ 4 ខែជាប់គ្នាពីមួយឆ្នាំទៅមួយឆ្នាំ។ ទោះជាយ៉ាងណាសម្រាប់ការលក់រថយន្តនៅលើទីផ្សារបរទេសវិញ គឺមានចំនួន 133,172 គ្រឿង ក្នុងខែធ្នូ ដែលបានបំបែកកំណត់ត្រាថ្មីនៃការលក់ជាមួយកំណើនកើនឡើង 133% ធៀបនឹងឆ្នាំ 2024។
.jpg)
នៅក្នុងខែធ្នូ ឆ្នាំ 2025, BYD បានលក់រថយន្តអគ្គិសនីសុទ្ធ (BEV) ចំនួន 190,712 គ្រឿង ធ្លាក់ចុះ 8.2% ធៀបនឹងខែដូចគ្នាកាលពីឆ្នាំ 2024។ ជាមួយគ្នានេះការលក់រថយន្តប្រភេទ Plug-in-hybrid របស់ BYD ក៏មានការថយចុះបន្តិចផងដែរក្នុងខែធ្នូ កន្លងទៅ ដោយលក់បានចំនួន 224,072 គ្រឿង ថយចុះប្រមាណ 25.7% ធៀបនឹងខែដូចគ្នាក្នុងឆ្នាំ 2024។ សម្រាប់ការលក់រថយន្តសរុបទាំងប្រភេទរថយន្តដឹកអ្នកដំណើរ រថយន្តប្រភេទពាណិជ្ជកម្ម និងរថយន្តក្រុងក្នុងខែធ្នូ ឆ្នាំ 2025 គឺមានចំនួន 420,398 គ្រឿង ដែលធ្វើឲ្យការលក់រថយន្ត BYD នៅឆ្នាំ 2025 គឺមានចំនួន 4,602,436 គ្រឿង។
សរុបមកក្នុងឆ្នាំ 2025, BYD លក់រថយន្តសរុបចំនួន 4,550,036 គ្រឿង មានការកើនឡើង 7.1% បើប្រៀបធៀបនឹងឆ្នាំ 2024 ដែលលក់បានចំនួន 4,250,370 គ្រឿង។ ក្នុងតួរលេខនេះ ការលក់រថយន្តអគ្គិសនីសុទ្ធ គឺមានចំនួន 2,254,714 គ្រឿង កើនឡើង 27.9% ធៀបនឹងឆ្នាំ 2024 ចំនែកការលក់រថយន្ត Plug-in-hybrid (PHEV) វិញ គឺមានចំនួន 2,288,709 គ្រឿង ថយចុះ 7.9% ធៀបនឹងការលក់ក្នុងឆ្នាំ 2024។
បច្ចុប្បន្នការលក់ឡានអគ្គិសនីរបស់ BYD ក្នុងឆ្នាំ 2025 បានក្តោបក្តាប់ចំនែកលក់សរុបរបស់ក្រុមហ៊ុនប្រមាណ 49.6% កើនឡើងពីចំនួន 41.5% កាលពីឆ្នាំ 2024 ខណៈឡាន PHEV មានចំនួនលក់សរុប 50.4%។ ជាមួយគ្នានេះ BYD បានសម្រេចគោលដៅក្នុងការលក់រថយន្តសរុបបានលើសពី 1 លានគ្រឿងជាលើកដំបូងនៅលើទីផ្សារក្រៅប្រទេស ដោយលក់បានចំនួន 1,046,083 គ្រឿង កើនឡើងដល់ទៅ 150.7% ធៀបនឹងឆ្នាំ 2024៕
