ជាមួយនិងវត្តមានរបស់ស្មាតហ្វូនជំនាន់ថ្មី Magic8 Pro Air នៅពេលឆាប់ៗនេះ ក្រុមហ៊ុន Honor ក៏នឹងមានការប្រកាសពីស្មាត ហ្វូនជំនាន់ថ្មី RSR Porsche Design ដែលត្រូវបានគេស្គាល់ថា គឺជាស្មាតហ្វូនថ្នាក់ប្រណិត និងមានលក្ខណៈសម្បត្តិខ្ពស់បំផុតស្ថិតនៅក្នុងត្រកូល Magic8 series។ មុននេះ ស្មាតហ្វូននេះត្រូវបានគេរាយការណ៍ថា នឹងមានការប្រើប្រាស់នូវសិនស័រកាមេរ៉ា 1 អ៊ីង ដែលគាំទ្រដោយបច្ចេកវិទ្យាកាមេរ៉ាថា variable aperture ថែមទៀតផង។
នៅថ្ងៃនេះ មានការបង្ហាញចេញនូវរូបភាពជាលើកដំបូងរបស់ស្មាតហ្វូននេះ នៅលើបណ្តាញសង្គមចិន ជាមួយការបញ្ចេញនូវលក្ខណៈសម្បតិ្តសំខាន់ៗមួយចំនួនរបស់ស្មាតហ្វូនថ្មីនេះផងដែរ។ ផ្អែកតាមរូបភាពMagic8 RSR នៅថ្ងៃនេះ អាចនិយាយបាន នេះគឺជារូបភាពផ្សព្វផ្សាយថ្មី ដែលមានការបង្ហាញគ្រប់ម៉ូដែលទាំងអស់របស់ Magic8 series ដោយមានទាំងម៉ូដែល Magic8 Pro Air ត្រៀមនឹងប្រកាសចេញឆាប់ៗនេះទៀតផង។ ជាមួយនិង Porsche Design គឺមានជម្រើសពណ៌ស្វាយ។
ស្មាតហ្វូននេះ គឺមានការឌីស្សាញម៉ូឌុលកាមេរ៉ា “squircle” ដែលមានសិនស័រ 3 គ្រាប់។ ផ្អែកតាមរបាយការណ៌មុននេះ បានបង្ហើបថាMagic8 RSR នឹងមានកាមេរ៉ា 200MP periscope telephoto គាំទ្រដោយ f/2.6 aperture និងឡែន 85mm focal length រួមជាមួយនិងកាមេរ៉ាគោលទំហំ 50MP ដែលមានសិនស័រ 1 អ៊ីង និងគ្រាប់ទីបី គឺជាឡែន ultrawide lens។
Magic8 RSR ថ្មីនេះ ក៏នឹងមានការប្រើប្រាស់នូវបន្ទះឈីប Qualcomm Snapdragon 8 Gen 5 Elite រ៉េម ទំហំ 24GB និងថាមពលថ្មទំហំ 7,200mAh គាំទ្រនូវកម្លាំងសាក 120W charging ហើយអាចនឹងមានការប្រកាសចេញនៅលើទីផ្សារចិននាថ្ងៃទី 19 ខែមករាឆ្នាំ 2026 ខាងមុខនេះហើយ។
